ჯანმრთელობის მდგომარეობის გაუარესების გამო, საქართველოს პატრიარქი, ღამით, კლინიკაში გადაიყვანეს. ილია მეორე ახლა ექიმების მეთვალყურეობის ქვეშ იმყოფება და ყველა საჭირო კვლევა უტარდება. მედიკოსების თქმით, მისი მდგომარეობა საყურადღებოა.

პატრიარქის ჯანმრთელობის მდგომარეობას ადგილზე გაეცნენ ჯანდაცვის მინისტრი და სახელმწიფო უსაფრთხოების სამსახურის უფროსი.

"პაციენტი შემოყვანილია კუჭიდან მასიური სისხლდენით. მას ჩაუტარდა შესაბამისი სამკურნალო-დიაგნოსტიკური პროცედურები, მოთავსებულია კრიტიკული რეანიმაციის დეპარტამენტში, მდგომარეობა საყურადღებოა, ჰემოდინამიკა არასტაბილური გვაქვს," - განაცხადა კავკასიის მედიცინის ცენტრის დირექტორმა, სოფიო ასპანიძემ.

ადგილზე იმყოფებიან ტახტის მოსაყდრე შიო და საპატრიარქოს საზოგადოებასთან ურთიერთობის სამსახურის ხელმძღვანელი, დეკანოზი ანდრია ჯაღმაიძე.

სამეგრელოში და იმერეთში არალეგალური სასაკლაოები გამოვლინდა, - ამის შესახებ ინფორმაციას სურსათის ეროვნული სააგენტო ავრცელებს.

"ჩატარებული არაგეგმური ინსპექტირების შედეგად დადგინდა, რომ ფიზიკური პირი ჯ.ს. (მის: აბაშა, გამსახურდიას ქ.N116.) განმეორებით და სააგენტოსაგან მინიჭებული სავალდებულო საქმიანობის აღიარების გარეშე, შემდგომი რეალიზაციის მიზნით, კლავდა მსხვილფეხა პირუტყვს.

არალეგალური საწარმოები გამოვლინდა ასევე თერჯოლასა და ზესტაფონში. ინდმეწარმე გ. ზ. (მის: თერჯოლის რ-ნი, სოფ. ღვანკითი) და ფიზიკური პირი ს.მ. (მის: ზესტაფონი, მეორე სვირი ) სააგენტოსაგან მინიჭებული სავალდებულო აღიარებისა და ვეტერინარული ზედამხედველობის გარეშე კლავდნენ ცხოველებს.

ორივე ობიექტზე გამოვლინდა კრიტიკული შეუსაბამობები. გ.ზ.-ს არალეგალურ სასაკლაოზე, შემდგომი განადგურების მიზნით, დაილუქა ვეტერინარული ზედამხედველობის გარეშე დაკლული 70 კილოგრამზე მეტი გოჭის და მსხვილფეხა საქონლის ხორცი, ხოლო ს.მ.-ს სასაკლაოზე დაილუქა 8 კილოგრამი ბოცვრის ხორცი", - ნათქვამია პრესრელიზში.

სააგენტო აქცენტირებს, რომ ვეტერინარული ზედამხედველობის გარეშე ცხოველის დაკვლა ადამიანისთვის ჯანმრთელობისა და სიცოცხლისთვის საფრთხეს ქმნის და ზრდის ზოონოზური დაავადებების გავრცელების რისკს.

ყაზბეგის მუნიციპალიტეტის მერიის ინფორმაციით, სოფელ კარკუჩის მისასვლელ საავტომობილო გზაზე, ზვავის ჩამოწოლის შედეგად, ავტოტრანსპორტის გადაადგილება დროებით შეზღუდულია.

როგორც ინფორმაციაშია აღნიშნული, ამ დროისთვის სპეციალისტების მიერ ფასდება არსებული ვითარება.

„ტერიტორიის დათვალიერებისა და შესაძლო რისკების განსაზღვრის შემდეგ დაიწყება გზის გაწმენდითი სამუშაოები და აღდგება საავტომობილო მოძრაობა.

ყაზბეგის მუნიციპალიტეტის მერია მოქალაქეებს მოუწოდებს, თავი შეიკავონ აღნიშნული მონაკვეთის მიმართულებით გადაადგილებისგან და დაელოდონ დამატებით ოფიციალურ ინფორმაციას“, - ნათქვამია ინფორმაციაში.

დუბაის აეროპორტმა ოპერირება დროებით შეაჩერა. მიზეზი უსაფრთხოებაა. ინფორმაციას აეროპორტი აქვეყნებს.

ცნობისთვის, დუბაის აეროპორტის მახლობლად დრონების თავდასხმის გამო ხანძარი გაჩნდა, თუმცა Reuters-ის ცნობით, გაჩენილი ხანძარი ლოკალიზებულია.

„დუბაის საერთაშორისო აეროპორტში, უსაფრთხოების ზომების გამო, ფრენები დროებით შეჩერებულია.

მგზავრებს ვურჩევთ, არ გაემგზავრონ აეროპორტისკენ, გარდა იმ შემთხვევებისა, როდესაც მათ უშუალოდ დაუკავშირდება ავიაკომპანია და გამგზავრების დროს დაუდასტურებს, რადგან განრიგი შესაძლოა კვლავ შეიცვალოს.

ფრენებთან დაკავშირებული უახლესი ინფორმაციის მისაღებად მოგზაურებმა ავიაკომპანიებს პირდაპირ უნდა მიმართონ“, - ნათქვამია აეროპორტის განცხადებაში და აღნიშნულია, რომ აეროპორტის ადმინისტრაცია ფრენების შესახებ არსებულ ვითარებას განაახლებს.

Reuters-ის ცნობით, ახლო აღმოსავლეთში მიმდინარე ომის გამო ფრენები უქმდება, იცვლება მათი განრიგი და მარშრუტები, რადგან ახლო აღმოსავლეთის საჰაერო სივრცის უდიდესი ნაწილი სარაკეტო და დრონებით თავდასხმების საშიშროების გამო დაკეტილია. დღევანდელი ინცინდენტი დუბაის აეროპორტში უკვე მესამეა.
მიუხედავად იმისა, რომ არაბთა გაერთიანებული საამიროები და სპარსეთის ყურის სხვა ქვეყნები, ისევე როგორც ერაყი, იორდანია და თურქეთი, აშშ-ის სამხედრო ობიექტებს მასპინძლობენ, ირანი რაკეტებსა და დრონებს ისეთი სამოქალაქო ობიექტების წინააღმდეგ იყენებს, როგორიცაა აეროპორტები, სასტუმროები და პორტები.
„დუბაის საერთაშორისო აეროპორტის მიმდებარე ტერიტორიაზე დრონით მომხდარმა ინციდენტმა ერთ-ერთი საწვავის ავზი დააზიანა,“ — ნათქვამია დუბაის მედია ოფისის განცხადებაში (X-ზე).