იმის მიუხედავად, რომ საქმის გამოძიება უკვე დასრულებულია, მოსამართლემ არ გაიზიარა ადვოკატის შუამდგომლობა ბრალდებული ხასაიას სხვა აღკვეთის ღონისძიებით გათავისუფლების შესახებ. ადვოკატი აღნიშნავდა, რომ ხასაიას გაქცევა არ უცდია, ამას კი მოწმობს 1 სექტემბერს მომხდარ ინციდენტზე მისი 29 სექტემბერს დაკავება.
„პროკურატურამ ბრალში აღწერა, როგორც მძიმე დანაშაული და ამით ქმნის ილუზიას, რომ გელა ხასაიასთვის პატიმრობის მოთხოვნა აბსოლუტურად ლეგიტიმურია“, - თქვა სხდომაზე ადვოკატმა ომარ ფურცელაძემ.
მომდევნო სხდომა 3 დეკემბერს, 14:00 საათზე გაიმართება.
გელა ხასაია პოლიციამ 29 სექტემბერს დააკავა. მას ედავებიან 1 სექტემბერს თბილისში, სადგურის მოედანზე მომხდარი კონფლიქტის დროს დაზიანების მიყენებას. ადვოკატი ომარ ფურცელაძე აღნიშნავდა, რომ იმ დღეს ხასაია კონფლიქტს შეესწრო, თუმცა მასთან არაფერი აკავშირებდა.
