თბილისში საპროტესტო მსვლელობა სპორტის სასახლესთან დასრულდა - აქცია ხვალ, 11:00 საათზე, სააპელაციო სასამართლოსთან განახლდება. 

სპორტის სასახლესთან შეკრებილ მოქალაქეებს პროევროპული ოპოზიციური გაერთიანებების ლიდერებმა მიმართეს და მათ აქციაზე გასვლისკენ მოუწოდეს.

კოალიცია „ცვლილებებისთვის“ ერთ-ერთი ლიდერის, ნიკა მელიას განცხადებით, თბილისის ქუჩებში პროტესტი იქნება ყოველდღიური.

აღნიშნულის შესახებ ნიკა მელიამ სპორტის სასახლესთან გამართულ აქციაზე სიტყვით გამოსვლისას განაცხადა.

„მადლობა ამ სიმართლისთვის, ამ გამძლეობისთვის, მადლობა ამ ჟინისთვის. ყოველდღე, რითიც დავიწყეთ ეს პროცესი, ამით ვაგრძელებთ. ყოველდღიურად, იქნება ქარი, აგვეჩეჩება თმები თუ არ აგვეჩეჩება, დაგვაწვიმდება თუ არ დაგვაწვიმდება, მოთოვს თუ არ მოთოვს, ვიქნებით თბილისის მოედნებზე, გამზირებზე, ქუჩებში, ვიდრე ყველანი არ დავდგებით საპროტესტოდ და რეჟიმს, დემოკრატიულად, ჩვენი სიმრავლით უკვე, არამხოლოდ სიმართლით და ღირსებით, ჩვენი სიმრავლით, დემოკრატიულად არ მოვგუდავთ. ეს არის ამოცანა და მიზანი. მადლობა, გელოდებით ხვალ“, – განაცხადა ნიკა მელიამ.

მოქალაქეები და ოპოზიციური პარტიების წარმომადგენლები "ქართული ოცნების" მიერ გაყალბებულ არჩევნებს აპროტესტებენ. დღეს ისინი სააპელაციო სასამართლოსთან შეიკრიბნენ, სადაც არასამთავრობო ორგანიზაციების სარჩელები უნდა განეხილათ, თუმცა სხდომა სხვალამდე გადაიდო. მოგვიანებით კი თბილისის ქუჩებში მსვლელობა გამართეს.