რუსთაველის გამზირი გადაიკეტა - აქციის მონაწილეების ნაწილი, სტუდენტები და ოპოზიციის წარმომადგენლები მსვლელობით პარლამენტთან უკვე მივიდნენ. 

რუსთაველის გამზირისკენ საპროტესტო მსვლელობით მიემართებიან თსუ-ს სტუდენტები და "კოალიცია ცვლილებისთვის" წარმომადგენლებიც. 

შეგახსენებთ, დღევანდელი აქცია "ჩემი ხმის" მიერ არის დაანონსებული. ადგილობრივი დამკვირვებლები მოქალაქეებს იმ დარღევევების შესახებ მოუყვებიან, რომელიც საარჩევნო უბნებზე საკუთარი თვალით ნახეს. მათი თქმით, აქვთ დარღვევების ვიდეომტკიცებულებებიც.

13 უნივერსიტეტის სტუდენტები საერთო სახალხო პროტესტს უერთდებიან და 26 ოქტომბრის არჩევნების შედეგებს გმობენ.
 

"საქართველოს სტუდენტები ვუერთდებით საერთო სახალხო პროტესტს და ვგმობთ ქართული ოცნების მიერ 2024 წლის ოქტომბრის არჩევნების სისტემურ გაყალბებას, რომელიც ეწინააღმდეგება დემოკრატიის პრინციპებს და მნიშვნელოვან დარტყმას აყენებს სახელმწიფო კონსტიტუციას, ინტერესებსა და რეპუტაციას საერთაშორისო დონეზე.

განათლების საკითხებში ხელისუფლების უხეში ჩარევის ფაქტები: დისკრიმინაციული და შერჩევითი გადაწყევტილებები საგანმანათლებლო დაწესებულებისთვის ავტორიზაციის მინიჭების პროცესში და სწავლების ნაწილში ცენზურის დაწესება განათლებაზე თავდასხმად გვესახება, ხოლო "რუსული" და ცენზურის დამწესებელი კანონებისა და სხვა უფლებებისა და თავისუფლებების შემლახავი რეპრესიული ქმედებების ფონზე, არჩევნების სისტემური გაყალბების ფაქტი ცხადყოფს ქართული ოცნების მხრიდან სახელმწიფოს მიტაცების უხეშ მცდელობას.

ხარისხიანი და სრულფასოვანი განათლება ჩვენი უფლებაა, სახელმწიფო კი ეკუთვნის ხალხს და არავის აქვს უფლება მიითვისოს ხელისუფლება. თუ ხელისუფალი არ პასუხობს ჩვენს ნებას, ჩვენ გვაქვს კონსტიტუციით მონიჭებული უფლება, პროტესტის გზით შევცვალოთ ის.

საქართველოს სტუდენტები, ვიაზრებთ ჩვენს პასუხისმგებლობას სამშობლოსა და ერის წინაშე, ვაგრძელებთ ჯერ კიდევ ჩვენამდე დაწყებულ ბრძოლას თავისუფლებისა და დამოუკიდებლობისთვის.

ისტორიული არჩევანი გაკეთებულია, საქართველო ყოველთვის ირჩევდა და ირჩევს ევროპას, წინსვლასა და განვითარებას. ჩვენ ამ არჩევანის ერთგულებას ვამტკიცებთ. მხარს ვუჭერთ პროტესტის ყველა არაძალადობრივ ფორმას და მოგიწოდებთ სტუდენტებს ერთობისკენ, რადგან ძალა, რომელსაც სასურველი ცვლილების მოტანა შეუძლია, ძალა, რომელსაც ღირსეული სისტემის შექმნა შეუძლია სწორედ ჩვენშია.

ჩვენ არ ვაპირებთ, დავთმოთ ჩვენი ქვეყნის თავისუფლება საქართველოს სტუდენტები, როგორც საქართველოს მოქალაქეები ვრჩებით დემოკრატიული ღირებულებებისა და სახელმწიფო ინტერესების ერთგული არ ვცნობთ ჩატარებულ არჩევნებს და ამ არჩევნების შედეგების შესაბამისად დაკომპლექტებულ პარლამენტს ლეგიტიმურად და მზად ვართ ბოლომდე ვიბრძოლოთ ჩვენი და ჩვენი ქვეყნის თავისუფლებისთვის! გვახსოვდეს, ძალა ერთობაშია და გამარჯვება გარდაუვალია! ვიბრძვით თავისუფლებისთვის!", - წერია სტუდენტების მანიფესტში.