საქართველოს პრეზიდენტი ხვალ, საღამოს 21 საათზე, რუსთაველის გამზირზე შეკრებილ აქციის მონაწილეებს სიტყვით მიმართავს. ამის შესახებ პრეზიდენტმა ორბელიანების სასახლეში გამართულ ბრიფინგზე ისაუბრა:  

"მე ხვალ ვიქნები პარლამენტის წინ, ხალხთან ერთად, 9 საათზე გამოვალ სიტყვით იმისთვის, რომ ყველამ ერთად, იმ ადამიანებთან, რომლებიც ამდენი დღეა მართავენ პროტესტს სხვადასხვა ფორმით, კიდევ ერთხელ დავაფიქსიროთ ის, რომ არჩევნების გარეშე არაფერი არ იქნება. ხვალ, მე დარწმუნებული ვარ, რომ ვიქნებით კიდევ უფრო მეტნი, რაც ვართ და ვიქნებით ყოველდღიურად" - განაცხადა პრეზიდენტმა. 

ზურაბიშვილმა ეუთო/ოდირის დასკვნაზე,  კიდევ ერთხელ აღნიშნა, რომ დასკვნა ასახავს ყველა იმ დარღვევასა და გაყალბებას რაც საზოგადოებამ ისედაც იცოდა.  

"ვართ ახალ ეტაპზე იმის მერე, რაც ეუთო ოდირმა დადო საბოლოო დასკვნა არჩევნების შესახებ. ჩვენ ყველა, აქ მყოფმა და საზოგადოებამ კარგად იცი, რა მოხდა არჩევნების დროს, როგორ გაყალბდა და ა.შ. ასე, რომ არავის არაფრის დამტკიცება აღარ სჭირდება, მაგრამ საბოლოო დასკვნა მნიშვნელოვანია იმისთვის, რომ თავიანთი პოლიტიკური გადაწყვეტილება მიიღონ, ელოდებოდნენ ამ საბოლოო დასკვნას, სამწუხაროდ ბატონი კობახიძისთვის, არაფერს არ ცვლის ის ფაქტი, რომ 2 წუთში გამოვიდა და თქვა, რომ კარგია ეს დასკვნა და გვაძლევს ლეგიტიმაციას. ჯერ არ ვართ საბჭოთა სისტემაში, რომ მისი ნათქვამი, იმდენად ჩაკეტილ სივრცეში მოხვდეს, რომ ყველამ დაიჯეროს და ვერავინ ვერ გაიგოს სად არის სიმართლე. სიმართლე არის სულ სხვა, ეს დასკვნა არის ძალიან სერიოზული და ასახავს ყველა იმ გაყალბების მეთოდებს, რაც ჩვენ აღვნიშნეთ ყველამ მანამდე. " განაცხადა პრეზიდენტმა.