პოლიტიკური მოძრაობა - "მოძრაობა სოციალური დემოკრატიისთვის" დაფუძნდა

დაფუძნდა მოძრაობა „სოციალური დემოკრატიისთვის“. ახალი მოძრაობის წარდგენა ეგნატე ნინოშვილის ძეგლთან გაიმართა.

როგორც მოძრაობის დამფუძნებლებმა განაცხადეს, მათთვის მნიშვნელოვანია დემოკრატიაზე, სამართლიანობაზე, უკეთეს პოლიტიკურ, ეკონომიკურ სისტემაზე ღიად საუბარი. მათი თქმით, მოძრაობა ამის მიღწევას ახალი წევრების მიღებით, პროტესტის მუხტის გაძლიერებითა და ახალი აქტივობების წამოწყებით გეგმავს.

ამასთან, „სოციალური დემოკრატიისთვის“ წევრების თქმით, ამ ეტაპზე მოძრაობა 100-ზე მეტ ადამიანს აერთიანებს და ღიაა ნებისმიერი მსურველისთვის, რომელიც იზიარებს მის ღირებულებებსა და პრინციპებს.

„მოძრაობა აერთიანებს სხვადასხვა პროფესიის, გამოცდილებისა და ინტერესების მქონე მოქალაქეებს, რომელთაც სჯერათ, რომ საქართველოს გადარჩენისა და განვითარების ერთადერთი სწორი გზა სოციალური დემოკრატიის გზაა. ისინი არა მხოლოდ აკრიტიკებენ წარსულსა და დღევანდელობას, არამედ აქვთ საერთო ხედვა ქვეყნის უკეთესი მომავლისთვის. მოძრაობის წევრებს შორის არიან ადამიანები, რომლებიც წლების განმავლობაში ითხოვდნენ სამართლიან ეკონომიკურ პოლიტიკას, შრომის უსაფრთხოებას, ღირსეულ შრომით პირობებს, ხარისხიან და ხელმისაწვდომ ჯანდაცვასა და განათლებას, თანასწორობას, სამართლიან მართლმსაჯულებას, ეწინააღმდეგებოდნენ ბუნებრივი რესურსების მიტაცებას. მოძრაობის წევრთა ნაწილი პროფკავშირულ გაერთანებას წარმოადგენს, ნაწილი კი აქტიურად მონაწილეობს საზოგადოებრივი მაუწყებლის დაბრუნებისთვის მიმდინარე პროტესტში.

მოძრაობის ხედვები და პრიორიტეტები დეტალურად არის ასახული მის მანიფესტსა და პროგრამულ პრიორიტეტებში. უახლოეს თვეებში დაგეგმილია სრულფასოვანი საპროგრამო დოკუმენტის შემუშავებაც, რომელზეც მოძრაობის შიგნით შექმნილი სამუშაო ჯგუფები აქტიურად მუშაობენ. მოძრაობა „სოციალური დემოკრატიისთვის“ არ არის სპონტანური ინიციატივა. არჩევნებამდე და შემდგომ, მემარცხენე ჯგუფებმა გააძლიერეს კოორდინაცია, ერთობლივი მუშაობა და აქტიური წინააღმდეგობა ერთპარტიული მმართველობისა და კონსოლიდირებული ავტორიტარიზმის წინააღმდეგ“, – აღნიშნავენ მოძრობა „სოციალური დემოკრატიისთვის“.

დღევანდელ ღონისძიებაზე იმყოფებოდნენ ვახუშტი მენაბდე, ლევან ლორთქიფანიძე, თათია დვალი, ელენე ფასური, გიორგი (გოტა) ჭანტურია, გიორგი მაისურაძე და სხვები.

ფოტო: მთავარი არხი