პარლამენტმა 80 ხმით, ერთხმად, „გენდერული თანასწორობის შესახებ“ კანონში ცვლილების შეტანის თაობაზე კანონპროექტი მესამე მოსმენით მიიღო. ცვლილების თანახმად, კანონის სათაურში და ტექსტში ტერმინი „გენდერული თანასწორობა“ „ქალისა და მამაკაცის თანასწორობით“ იცვლება.
კანონპროექტით, ახალი რედაქციით ჩამოყალიბდება ტერმინ „განსაკუთრებული ღონისძიების“ განმარტება.
ცვლილების თანახმად, კანონიდან ის ნორმებიც ამოდის, რომლებიც საქართველოს პარლამენტში გენდერული თანასწორობის მუდმივმოქმედი საპარლამენტო საბჭოს, ავტონომიური რესპუბლიკების უმაღლესი წარმომადგენლობით ორგანოებში გენდერული თანასწორობის საბჭოსა და მუნიციპალიტეტებში გენდერული თანასწორობის საბჭოს შექმნის ვალდებულებას ადგენს.
ასევე
საკანონმდებლო ორგანომ „პარლამენტის რეგლამენტში“ ცვლილება მესამე მოსმენით განიხილა და 81 ხმით მხარი დაუჭირა.
ცვლილების თანახმად, პარლამენტის რეგლამენტით გათვალისწინებულ საჯარო გადაწყვეტილებათა მიღების პროცესში არასამთავრობო ორგანიზაციათა მონაწილეობა სავალდებულო აღარ იქნება.
აღნიშნული კანონპროექტი პლენარულ სხდომაზე საპროცედურო საკითხთა და წესების კომიტეტის თავმჯდომარემ, დავით მათიკაშვილმა წარადგინა.
რეგლამენტის პროექტის თანახმად, ასევე იცვლება და ახლებურად ყალიბდება ცესკო-ს წევრის არჩევის პროცედურა. კერძოდ, ცენტრალური საარჩევნო კომისიის წევრი აირჩევა პარლამენტის სრული შემადგენლობის უმრავლესობით, ისევე როგორც ეს ხდება პარლამენტის თავმჯდომარის არჩევის შემთხვევაში.