წინააღმდეგობის პლატფორმის მეორე შეხვედრა ჩატარდა. ეს არის პლატფორმა, რომელიც ღიაა ყველა პროევროპული პარტიისთვის ან იმისთვის, რომელიც შეიქმნება ახლო მომავალში. ასევე, მათთვის, ვინც იზიარებენ ჩვენს მთავარ პრიორიტეტებს, რომელიც არის ახალი არჩევნები და სინდისის პატიმრების გათავისუფლება, – ამის შესახებ საქართველოს ყოფილმა პრეზიდენტმა, სალომე ზურაბიშვილმა განაცხადა.

ზურაბიშვილის თქმით, პარტიები, რომლებიც არიან წინააღმდეგობის პლატფორმის შემადგენლობაში, თანხმდებიან იმ მოცემულობებს, რომლებიც პლატფორმას გააჩნია.

„ეს მოცემულობები ქმნის და უხსნის გზას პარტიებს, რომ შემოვიდნენ ამ პლატფორმაში. კოორდინაციამ დღეს განიხილა ერთი აქტუალური თემა, რომელიც არის ე.წ. საგამოძიებო კომისიის საქმიანობა და ადამიანების დაბარება. ჩვენ დავაფიქსირეთ კოორდინაციის პოზიცია, რომ არცერთი აქ შემავალი პოლიტიკური პარტია არ მიიღებს მონაწილეობას ამ კომისიაში, რადგან ეს კომისია, ერთი მხრივ, არის სრულიად არალეგიტიმური და, მეორე მხრივ, ემსახურება მხოლოდ და მხოლოდ რუსულ ინტერესებს. ასე რომ, არ არსებობს არანაირი საფუძველი იმის, რომ ვინმემ მიიღოს მონაწილეობა. ასევე, ეს კომისია ემსახურება, რომ დაითესოს შიში, ახლა უფრო პირდაპირ მიზანში არიან ამოღებული პოლიტიკური ლიდერები, რათა ხალხთან გავრცელდეს აზრი, ყველას მოგწვდებით და ყველა ხართ სამიზნეშიო. ეს არ ნიშნავს, რომ ვინმე უნდა ამას დაექვემდებაროს და შიში გაავრცელოს. დღის წესრიგში კიდევ გვქონდა ორი სხვა თემა, ერთი შიდა მექანიზმები, რომელიც ნელ-ნელა უნდა ჩამოყალიბდეს, შევქმნით ერთიან საერთაშორისო კალენდარს, რომ ჩვენი პოზიციები დროულად იყოს მიწოდებული სხვადასხვა ლიდერთან თუ პარლამენტართან. ეს არ იქნება ჩვეულებრივი ნიუსლეთერი, არამედ ჩვენი პოლიტიკური პოზიციების გაჟღერება ყველა ჩვენს პარტნიორთან დროულად. პირველი ასეთი შემთხვევა არის 7 აპრილის სესია ევროპული საბჭოს ასამბლეის. ასევე, შევქმნით ერთიან საკომუნიკაციო ჯგუფს, რომელიც შექმნის თავის „ფეისბუქს“, „ტვიტერს“ და ამით ჩვენ უფრო მარტივად გავავრცელებთ გადაწყვეტილებებს. ახლა კოორდინაციის წევრები ხვდებიან გერმანიის ჟურნალისტებს და გავაცნობთ კოორდინაციასაც“, – განაცხადა ზურაბიშვილმა.