2023 წელს ევროკავშირის წევრმა სახელმწიფოებმა ბინადრობის ნებართვა საქართველოს 33 898 მოქალაქეზე გასცეს - ამის შესახებ Eurostat-ის მონაცემთა ბაზაში ვკითხულობთ.

სტატისტიკის თანახმად, ყველაზე მეტი, 19 411 ნებართვა "სამუშაო" კატეგორიაში გაიცა. "ჰუმანიტარული და სხვა" მიზნით ბინადრობის უფლება საქართველოს 8 371-მა მოქალაქემ მიიღო, ოჯახური მიზნით - 4 050-მა, ხოლო საგანმანათლებლო მიზნით ყველაზე ცოტა, საქართველოს 2 066-მა მოქალაქემ.

აღსანიშნავია, რომ საქართველოს მოქალაქეებზე 2023 წელს გაცემული ბინადრობის ნებართვების რაოდენობა 4 144-ით ჩამორჩება 2022 წლის რეკორდულ მაჩვენებელს - 38 042 ნებართვას. (ევროკავშირი სტატისტიკურ მონაცემებს 2013 წლიდან აგროვებს, სწორედ 2013-23 წლებში იყო 2022 წელი რეკორდული)

Statista-ს თანახმად, ბოლო ხუთი წლის განმავლობაში საქართველოს მოქალაქეებზე გაცემული ნებართვების სტატისტიკა ასე გამოიყურება:

წელი/მიზანი    2019    2020    2021    2022    2023
სულ    23 504    14 560    22 915    38 042    33 898
სამუშაო    12 388    6 644    13 969    25 228    19 411
საოჯახო    2 864    2 190    2 868    3 405    4 050
საგანმანათლებლო    1 408    754    1 599    1 749    2 066
სხვა    6 884    4 972    4 479    7 660    8 371
ევროკავშირის სტატისტიკის სამსახურის მონაცემთა ბაზაში ასახულია, რომ გასულ წელს საქართველოს მოქალაქეებზე ყველაზე მეტი, 12 403 ბინადრობის ნებართვა პოლონეთმა გასცა. მეორე ადგილზეა იტალია - 6 205 ნებართვით, შემდეგ გერმანია - 3 273, სლოვაკეთი - 2 951 და ესპანეთი - 1 951 ნებართვით.

წყარო: bm.ge