შინაგან საქმეთა სამინისტროს მომსახურების სააგენტოს ინფორმაციით, მართვის მოწმობის პრაქტიკული გამოცდის მეორე ეტაპი ახალციხეში შეჩერებულია. ამის მიზეზი დიდთოვლობაა.

ამასთან, უწყება იტყობინება, რომ უამინდობის გამო, შესაძლოა სააგენტოს სხვა სტრუქტურულ ერთეულებშიც შეფერხდეს საგამოცდო პროცესი.

"გაცნობებთ, რომ დიდთოვლობის გამო, მომსახურების სააგენტოს ახალციხის სტრუქტურულ ერთეულში სატრანსპორტო საშუალებათა მართვის უფლების მისაღები პრაქტიკული გამოცდის მეორე ეტაპი (ქალაქი) შეჩერებულია. მიმდინარეობს გაწმენდითი სამუშაოები.

პრაქტიკული გამოცდის მეორე ეტაპის გამოცდაზე ჩაწერილი კანდიდატების მიმართ დისკვალიფიკაცია არ გავრცელდება და გადახდილი თანხა სრულად შეუნარჩუნდებათ. კანდიდატებს, გამოცდაზე გასვლის კონკრეტული თარიღის შესახებ, დეტალური ინფორმაცია ეტაპობრივად ეცნობებათ.

გაითვალისწინეთ, რომ დიდთოვლობის გამო, შესაძლოა სააგენტოს სხვა სტრუქტურულ ერთეულებშიც საგამოცდო პროცესი შეფერხდეს. გთხოვთ, გამოცდაზე გასვლამდე, დაგვიკავშირდეთ ცხელ ხაზზე - 1272", - წერია მომსახურების სააგენტოს მიერ გავრცელებულ ინფორმაციაში.