პოლიტიკაში მთავარია მოთმინება, მოუთმენლობის გამო, საქართველოს დამოუკიდებლობის აღდგენის შემდეგ ძალიან დიდი შეცდომები დავუშვით, - ამის შესახებ საქართველოს პრემიერ-მინისტრმა ირაკლი კობახიძემ შვეიცარიულ ყოველკვირეულ ჟურნალ Die Weltwoche-თან ინტერვიუში განაცხადა. პრემიერ-მინისტრთან ინტერვიუ ჟურნალის მთავარმა რედაქტორმა და მფლობელმა როჯერ კოპელმა ჩაწერა.

როგორც მთავრობის მეთაურმა აღნიშნა, მოთმინების ნაკლებობა იყო მთავარი პრობლემა საქართველოსთვის, ქართული საზოგადოებისთვის და ქართველი პოლიტიკოსებისთვის.

„მოთმინება არის ის, რაც გეხმარებათ თქვენი ქვეყნის მაქსიმალურად წინსვლაში. შესაძლოა, ეს არის ერთ-ერთი მთავარი გაკვეთილი. თუ მოთმინება არ გაქვს, სპორტშიც ასეა და პოლიტიკაშიც ზუსტად ასეა. მოთმინება უნდა გქონდეთ, რათა მიაღწიოთ საუკეთესო შედეგებს“, - განაცხადა ირაკლი კობახიძემ.

მთავრობის მეთაურმა აღნიშნა, რომ საქართველოს ხელისუფლება ორიენტირებულია სახელმწიფოებრიობის, დამოუკიდებლობისა და სუვერენიტეტის განმტკიცებაზე.

“ჩვენ ვისწავლეთ არა მხოლოდ უკრაინის ისტორიიდან, არამედ, პირველ რიგში, საკუთარი ისტორიიდან.

როგორც აღვნიშნე, 90-იანი წლებიდან საქართველოს ძალიან ბევრი ტანჯვა მოუწია და ჩვენ ოთხი სხვადასხვა ომი გვქონდა. ერთ-ერთი მათგანი იყო სამოქალაქო ომი. 90-იანი წლების დასაწყისში სამი ომი იყო. ერთი სამოქალაქო ომი და ორი ომი საქართველოს ორ რეგიონში. 2008 წელს კი იყო რუსეთ-საქართველოს ომი. ჩვენ ბევრი რამ ვისწავლეთ ამისგან.

ყველაზე ზოგადი გაკვეთილი ჩვენი ისტორიიდან და ასევე უკრაინული ისტორიიდან არის ის, რომ ადამიანი მთლიანად უნდა იყოს კონცენტრირებული საკუთარი სახელმწიფოს დამოუკიდებლობის შენარჩუნებაზე, სახელმწიფოებრიობის უზრუნველყოფაზე და დამოუკიდებლად მოქმედებაზე.

ყოველთვის არიან სხვადასხვა დაინტერესებული მხარეები, გავლენიანი დაინტერესებული მხარეები, რომლებსაც აქვთ საკუთარი ინტერესები, მაგრამ ზრუნავენ საკუთარი სახელმწიფოსა და ერის ინტერესებზე. ასე რომ, ეს არის გასაღები: თუ შეინარჩუნებთ დამოუკიდებლობას, შეძლებთ თავიდან აიცილოთ თქვენს გარშემო არსებული უსიამოვნებების უმეტესობა. ეს არის მთავარი საკითხი.

ამიტომ ჩვენ ვართ ორიენტირებულები ჩვენი სახელმწიფოებრიობის, ჩვენი დამოუკიდებლობისა და სუვერენიტეტის განმტკიცებაზე.

ჩვენს ირგვლივ ზოგიერთი დაინტერესებული მხარე ცდილობს დაუპირისპირდეს ჩვენს სუვერენიტეტს, მაგრამ საქართველოს უახლესი ისტორია, ვგულისხმობ ბოლო სამი-ოთხი წლის განმავლობაში, იყო მხოლოდ ბრძოლა სუვერენიტეტისთვის,”- განაცხადა პრემიერმა.

პრემიერის შეფასებით, მთავრობასთან მოდიოდნენ ოფიციალური სტატუსის მქონე ადამიანები, მაგრამ  ისინი არ საუბრობდნენ თავიანთი სახელმწიფოების ან შესაბამისი ინსტიტუტების სახელით.

„რამდენჯერმე აღვნიშნეთ შეხვედრები დახურულ კარს მიღმა, როდესაც ჩვენთან მოდიოდნენ კონკრეტული ოფიციალური პირები და საუბრობდნენ ომზე, მეორე ფრონტის ხაზზე, რუსეთის ფედერაციის წინააღმდეგ სანქციების შემოღებაზე, რაც გაანადგურებდა საქართველოს ეკონომიკას და უზარმაზარ რეცესიას გამოიწვევდა საქართველოს ეკონომიკაში.
ისინი ჩვენთან საუბრობდნენ მთავრობის ოფიციალური თანხმობით სამხედრო მოხალისეების უკრაინაში გაგზავნაზე, რაც საქართველოს პირდაპირ ჩართვას ნიშნავდა რუსეთ-უკრაინის ომში.
ჩვენთან მოდიოდნენ ოფიციალური სტატუსის მქონე ადამიანები, მაგრამ არ ვფიქრობთ, რომ ისინი საუბრობდნენ თავიანთი სახელმწიფოების ან შესაბამისი ინსტიტუტების სახელით“,- განაცხადა პრემიერ-მინისტრმა.

როგორც მთავრობის მეთაურმა აღნიშნა, გამჭვირვალობის კანონში საუბარი არ არის რაიმეს შეზღუდვაზე. 

„კანონში არის უბრალოდ ადმინისტრაციული ჯარიმები, მხოლოდ ფინანსური ჯარიმები, რომლებიც დაწესებულია ამ ვალდებულების შეუსრულებლობისთვის. საუბარი არ არის რაიმე შეზღუდვაზე, ამიტომ ამ კანონით გათვალისწინებული შეზღუდვები არ არსებობს. საუბარია მხოლოდ გამჭვირვალობაზე. ზოგჯერ ჩვენ ვამბობთ, რომ ეს არის კანონი რევოლუციების გამჭვირვალობის შესახებ. ეს არც კი არის კანონი რევოლუციების წინააღმდეგ. თუ ვინმეს უცხოეთიდან სურს საქართველოში რევოლუციის მოწყობა, კიბატონო, მაგრამ გთხოვთ, გახადოთ ეს გამჭვირვალე ქართული საზოგადოებისთვის. როცა ვინმე აფინანსებს არასამთავრობო ორგანიზაციებს უცხოეთიდან და როცა ეს არასამთავრობო ორგანიზაციები უშუალოდ არიან ჩართულნი ქართულ პოლიტიკაში, კონკრეტული პოლიტიკური პარტიების მხარდასაჭერად, შესაბამისი ფონდები უნდა იყოს სრულად გამჭვირვალე. ეს არის ერთადერთი, რასაც ჩვენ ვამტკიცებთ და რაც ასახული გვაქვს კანონში გამჭვირვალობის შესახებ, მაგრამ იყო უზარმაზარი თავდასხმა საქართველოს ხელისუფლებაზე, რადგან ზოგს სურდა ამ ქვეყანაში რევოლუციების დაფინანსება ყოველგვარი გამჭვირვალობის გარეშე“, - განაცხადა ირაკლი კობახიძემ. 

პრემიერის შეფასებით, დღევანდელი პოლიტიკური ვითარება უკიდურესად რთულია რეგიონში, ზოგადად მსოფლიოში და არ აქვს აზრი რუსეთის ქმედებების სიღრმისეული ანალიზის გაკეთებას.

„მე შემიძლია საქართველოს მაგალითი გითხრათ რუსეთთან დაკავშირებით. მე ვფიქრობ, რომ რუსეთი შეიძლება იყოს უფრო პრაგმატული საქართველოს მიმართ, მაგრამ ამდენი წელია საქართველოს მიმართ არაპრაგმატულ პოლიტიკას ატარებენ.

ასე რომ, ეს არის ჩემი აღქმა, მაგრამ დღევანდელი პოლიტიკური ვითარება უკიდურესად რთულია რეგიონში, ზოგადად მსოფლიოში და არ აქვს აზრი რუსეთის ქმედებების სიღრმისეული ანალიზის გაკეთებას.

მნიშვნელოვანია, რომ ყველამ იმოქმედოს პრაგმატულად და ყველა ცდილობდეს მშვიდობის ხელშეწყობას და თუ მსოფლიოს ყველა სხვადასხვა ძალა მხარს დაუჭერს მშვიდობას, ამ შემთხვევაში, მრავალი განსხვავებული დაინტერესებული მხარე ასევე იმოქმედებს უფრო პრაგმატულად“, -  განაცხადა ირაკლი კობახიძემ.

პრემიერის თქმით,  სამყარო დღეს საკმაოდ პროგნოზირებადია, პოლიტიკური მოვლენები კი  არაპროგნოზირებადი.

„ჩვენ ვიმედოვნებთ, რომ მომდევნო 4 წლის განმავლობაში სამყარო ბევრად უფრო მშვიდობიანი იქნება. ბოლო 4 წლის განმავლობაში მსოფლიო დიდი პრობლემების წინაშე იდგა, განსაკუთრებით ომის და მშვიდობის საკითხთან დაკავშირებით. მომდევნო 4 წლის შემთხვევაში უფრო მშვიდობიანი უნდა იყოს. ასე რომ, ჩვენი ოპტიმისტური მოლოდინი არის, რომ მომდევნო 4 წლის განმავლობაში მსოფლიოში ნაკლები დაძაბულობა იქნება. სამყარო ამ მომენტში საკმაოდ პროგნოზირებადია. პოლიტიკური მოვლენები საკმაოდ არაპროგნოზირებადი. ასე რომ, კიდევ ერთხელ, ჩვენ საკმაოდ ოპტიმისტურად ვართ განწყობილი, რომ ომი დასრულდება და მსოფლიო იქნება უფრო მშვიდობიანი მომდევნო 4 წლის განმავლობაში“, - განაცხადა პრემიერმა.

როგორც მთავრობის მეთაურმა აღნიშნა, საქართველოს რუსეთთან დიპლომატიური ურთიერთობები ამ დრომდე არ აქვს. 

„როგორც აღვნიშნე, ოთხივე განსხვავებული ომი მოგვიწია და ამ ოთხივე სხვადასხვა ომში ჩართული იყო რუსული მხარე, რუსული სახელმწიფო. ამიტომაც გვაქვს ეს ფრთხილი პოლიტიკა, გვაქვს პრაგმატული პოლიტიკა, რომელსაც ვატარებთ რუსეთის ფედერაციის მიმართ.

რუსეთის ფედერაციასთან დიპლომატიური ურთიერთობა ამ დრომდე არ გვაქვს. ჩვენ არ გვაქვს პოლიტიკური კავშირები, არც პოლიტიკური კონტაქტები, ამიტომ კომუნიკაციის ეს ნაწილი უბრალოდ უკიდურესად შეზღუდულია, მაგრამ ჩვენ გვაქვს სავაჭრო, ეკონომიკური ურთიერთობები, ეს არის დღევანდელი მდგომარეობა და ჩვენ ვაპირებთ შევინარჩუნოთ ეს სურათი ჩვენს ურთიერთობებში.

ჩვენ გვაქვს კონკრეტული მიმართულებები იმ ურთიერთობებში, რომლებიც დაკავშირებულია საქართველოს ტერიტორიულ მთლიანობასთან. ჩვენი ქვეყნის ტერიტორიული მთლიანობის აღდგენის გარეშე, რა თქმა უნდა, დიპლომატიური ურთიერთობები ვერ აღდგება. ეს ასევე იურიდიული საკითხია, არა მხოლოდ პოლიტიკური, არამედ სამართლებრივი საკითხიც. არ გვაქვს დიპლომატიური ურთიერთობები და არც გვექნება საქართველოს ტერიტორიული მთლიანობის აღდგენის გარეშე.  მაგრამ ისევ გავიმეორებ, ჩვენ ვატარებთ პრაგმატულ პოლიტიკას. პრაგმატიზმის გარეშე, რა თქმა უნდა, საქართველო ვერ გადარჩება. ეს არის ერთ-ერთი მთავარი გაკვეთილი ჩვენი ისტორიიდან“, - განაცხადა პრემიერ-მინისტრმა.

პრემიერის თქმით, 2011 წელს, როცა ის პოლიტიკაში მოვიდა, ბევრი რამის დათმობა მოუწია, რადგან მნიშვნელოვანი ბარიერების წინაშე აღმოჩნდა.

„ჩვენ ძალიან ვამაყობთ საქართველოს ისტორიით. რა თქმა უნდა, ჩვენ ყველას გვყავს ჩვენი მისაბაძი მაგალითი, ძალიან ცნობილი მეფეები, რომლებმაც ბევრი გააკეთეს ამ ქვეყნისთვის. ჩვენ გვყავს, მაგალითად, მეფე დავით IV, რომელმაც საქართველო მართლაც დიდებულად აქცია ჩვენს ისტორიაში.

ჩვენ გვყავს ძალიან ცნობილი მეფე ერეკლე II და მან მიიღო ძალიან ბრძნული გადაწყვეტილებები, რომლის წყალობითაც საქართველომ მოახერხა გადარჩენა, რელიგიის დაცვა და საბოლოოდ კიდევ ერთხელ გამხდა დამოუკიდებელი ქვეყანა.

ჩვენ გვყავს, მაგალითად, ძალიან ცნობილი საზოგადო მოღვაწე, ილია ჭავჭავაძე, რომელიც ყველა ჩვენგანისთვის მისაბაძი მაგალითია.

ჩვენ ბევრი მისაბაძი მაგალითი გვყავს და ვამაყობთ საქართველოს ისტორიით.

როცა ვსაუბრობთ თანამედროვე პოლიტიკაზე, ეს მხოლოდ ჩემი პოზიცია არ არის, ამას ჩვენი თანაგუნდელებიც დაადასტურებენ, რომ გვყავს ჩვენი პარტიის ლიდერი, პარტიის საპატიო თავმჯდომარე, რომელიც ბიზნესმენი იყო, ახლა კი საქველმოქმედო საქმიანობას ეწევა და ბევრი რამ გააკეთა ამ ქვეყნისთვის. მან ბევრი გაიღო ამ ქვეყნის ინტერესებისთვის.

2011 წელს, როცა ის პოლიტიკაში მოვიდა, ბევრი რამის დათმობა მოუწია, რადგან მნიშვნელოვანი ბარიერების წინაშე აღმოჩნდა. ადამიანებისთვის ადვილი არ არის მსხვერპლის გაღება, განსაკუთრებით მაშინ, როდესაც მათ აქვთ ასეთი დიდი დაბრკოლებები.

მაგრამ მან ყველაფერი შესწირა, როცა დაინახა, რომ საქართველო ძალიან რთულ მდგომარეობაში იყო.

ბოლო სამი წლის განმავლობაშიც კი, ამ ქვეყნის ეროვნული ინტერესებისთვის ბრძოლის გამო, მას უამრავი პირადი პრობლემა შეექმნა. შემიძლია ძალიან მტკიცედ ვთქვა, რომ ჩვენთვისაც და ჩემთვისაც ბატონი ივანიშვილი ერთ-ერთი მისაბაძი მაგალითია და მის ნაბიჯებს მივყვებით”, - განაცხადა პრემიერმა.