მელანია ტრამპი მემუარებზე მუშაობს. ამის შესახებ NBC News-ი წერს.

გამოცემის ინფორმაციით, აშშ-ის ყოფილი პირველი ლედის წიგნი შემოდგომაზე, საპრეზიდენტო არჩევნებამდე ცოტა ხნით ადრე გამოვა. ცნობილია მემუარების სახელწოდებაც - „მელანია“. ტრამპის ვებგვერდზე ნამუშევარს ახასიათებენ, როგორც „იმ ქალის პირად პორტრეტს, რომელიც არაჩვეულებრივი ცხოვრებით ცხოვრობს“.

მელანიას მემუარებში წარმოდგენილი იქნება ოჯახური ფოტოები და პირადული ისტორიები, რომლებიც მას საზოგადოებასთან აქამდე არ გაუზიარებია.

მელანია ტრამპი დიდი ხანია არ გამოჩენილა საჯაროდ, თუმცა „რესპუბლიკური“ პარტიის ყრილობაზე, რომელსაც დონალდ ტრამპი პრეზიდენტობის კანდიდატად ოფიციალურად დაასახელეს, ის სცენაზეც გავიდა და მეუღლეს აკოცა.

სელინ დიონი სცენას ოლიმპიადის გახსნის ცერემონიაზე დაუბრუნდება. ამის შესახებ ENews-ი წერს.

გამოცემის ინფორმაციით, კანადელი მომღერალი, რომელმაც საკონცერტო მოღვაწეობაზე უარი ნევროლოგიური დაავადების გამო თქვა, უკვე პარიზშია.

ამ ეტაპზე 56 წლის დიონის გამოსვლის დეტალები არ საჯაროდვე, უცნობია ისიც თუ რა სიმღერებს შეასრულებს ის. ეს დიონის პირველი კონცერტი იქნება 2022 წლის შემდეგ.

პარიზის ოლიმპიური თამაშების გახსნის ცერემონია 26 ივლისს გაიმართება.

აშშ-ის ფლორიდის შტატში, ოჯახურ ძალადობაში ბრალდებულ მამაკაცს ცოლის პაემანზე მიპატიჟება დაავალეს. იმის ნაცვლად, რომ დამნაშავესთვის ჯარიმა ან შესაბამისი ვადით პატიმრობა დაეკისრებინა, მოსამართლე ჯონ ჰერლიმ, 47 წლის ბრალდებულ ჯოზეფ ბრეის განუცხადა, რომ ვალდებულია, მეუღლეს დაბადების დღეზე ყვავილები აჩუქოს, მისალოცი ბარათიც მიართვას და რესტორანშიც დაპატიჟოს. მართალია, სასჯელი უცნაურია, მაგრამ არც ისეთი, როგორიც 100 ღორი - ასეთი სასჯელი სამოას რაგბის ნაკრების მწვრთნელს ლოთობისთვის დააკისრეს. ყველაფერი კი იმით დაიწყო, რომ ბრეის დაავიწყდა, ცოლისთვის დაბადების დღე მიელოცა. თავიდან მათ ჯერ იჩხუბეს, მერე კამათი ცემა-ტყეპაში გადაიზარდა. ამ დროს კაცმა ცოლს ხელი ჰკრა, დივანზე დააგდო და ახრჩობდა. როგორც მოსამართლემ აღნიშნა, ინციდენტი უმნიშვნელო იყო და ქალსაც არ მიუღია არანაირი დაზიანება, ამიტომ ქმარს მკაცრი სასჯელი არ დააკისრეს.

კომპანია Adidas-მა ამერიკელ მოდელს, ბელა ჰადიდს ბოდიში მოუხადა მას შემდეგ, რაც კრიტიკის ფონზე კომპანიამ ფეხსაცმლის (SL72) სარეკლამო კამპანიაში ჰადიდის ჩართვის გამო ბოდიში მოიხადა და კამპანია შეწყვიტა.

კომპანია Adidas-მა ჰადიდი იმ ფეხსაცმლის (SL72) სარეკლამო კამპანიაში ჩართო, რომელიც პირველად 1972 წელს მიუნხენის ოლიმპიურ თამაშებზე გამოუშვეს, რასაც მოგვიანებით ისრაელის სახელმწიფოს მხრიდან სარეკლამო კამპანიის კრიტიკა მოჰყვა:

"გამოიცანით ვინ არის მათი [Adidas-ის] კამპანიის სახე? ბელა ჰადიდი, მოდელი, რომელსაც ანტისემიტიზმის გავრცელებისა და ისრაელისა და ებრაელების წინააღმდეგ ძალადობისკენ მოწოდებების ისტორია აქვს". - განაცხადა ისრაელის ოფიციალურმა ანგარიშმა X-ზე.

კრიტიკის შემდეგ Adidas-მა მომხდარის გამო ბოდიში მოიხადა, სარეკლამო კამპანია შეწყვიტა და NBC News-თან საუბრისას დაადასტურა, რომ დარჩენილ სარეკლამო კამპანიასაც "გადახედავდნენ".მომდევნო დღეს TMZ-იმ გაავრცელა ცნობა, რომ Adidas-ის გადაწყვეტილების შემდეგ, ჰადიდმა იურიდიული მრჩეველი და ადვოკატები დაიქირავა. ტაბლოიდის ინფორმაციით, ამერიკელი სუპერმოდელი სასამართლოში Adidas-ის წინააღმდეგ საჩივრის შესატანად ემზადება. 

TMZ-ს წყაროებმა უთხრეს, რომ ბელა შეშფოთებულია, რადგან Adidas-მა თავისი კამპანიით იგი მიუნხენის ოლიმპიადაზე მომხდარ 1972 წლის ტრაგედიას დაუკავშირა, რაც ბელას შეხედულებებს ეწინააღმდეგება. სუპერმოდელის თქმით, კამპანია "სასტიკი და დამაზიანებელი" იყო. ცნობისთვის, 1972 წლის ოლიმპიური თამაშების დროს 8 პალესტინელმა, რომლებიც ტერორისტულ დაჯგუფება შავ სექტემბერთან იყვნენ დაკავშირებული, მიუნხენში ისრაელელი ოლიმპიური ათლეტები მძევლად აიყვანეს და სანაცვლოდ ისრაელისა და გერმანიის ციხეებში მყოფი პალესტინელი პატიმრების გათავისუფლება მოითხოვეს. გერმანიის პოლიციასა და ტერორისტებს შორის შეიარაღებული დაპირისპირების შედეგად ტერორისტებმა 11 ისრაელელი ათლეტი და ერთი გერმანელი პოლიციელი მოკლეს.

ცხელი ზაფხული ყველასთვის დასვენებასთან ასოცირდება, დამღლელი ყოველდღიური რუტინის შემდეგ ახალი ძალებისა და ენერგიების მოსაკრებად სხვადასხვა ადგილებს ვსტუმრობთ, რადგან დატვირთული შემდეგი წლისთვის მოვემზადოთ.  ცხელი დღეები განტვირთვისა და მოგზაურობის პერიოდია, მათ შორის - ლიტერატურული მოგზაურობის. ვისაც კითხვა გიყვართ დამეთანხმებით, რომ ჩვენს ჩემოდანში წიგნის ადგილი ყოველთვის არის, რადგან ჩვენი დასვენება უფრო სასიამოვნო და მრავალფეროვანი გავხადოთ. განტვირთვა უფრო საინტერესო ხდება, როდესაც სხვადასხვა სამყაროში ვიწყებთ მოგზაურობას და ყოველთვის ვნახულობთ დროს, რომ ჩვენთვის უცნობ ამბებში გადავეშვათ და რაღაც ახალი შევიცნოთ.

"ჰოტ-ნიუსი" გთავაზობთ იმ წიგნების ჩამონათვალს, რომელიც ზაფხულის დღეებს უფრო მეტად გაგილამაზებთ და სხვადასხვა “საოცარ ახალ სამყაროში” ემოციების კორიანტელით გამოგზაურებთ.

1. "რაზე ვლაპარაკობთ, როცა სიყვარულზე ვლაპარაკობთ ხოლმე" - რეიმონდ კარვერი

ამერიკელი მწერალი რეიმონდ კარვერი (1938-1988) მოთხრობის ჟანრის ოსტატია. წინამდებარე კრებულში, რომელიც 1981 წელს გამოქვეყნდა, თავს იჩენს კარვერის მხატვრული აზროვნების ყველაზე ტიპური ნიშნები: მინიმალისტური სტილი და ღრმა ქვეტექსტი, რომლის ამოცნობას მწერალი მკითხველს ანდობს. კარვერის მოთხრობების პერსონაჟები არიან სასოწარკვეთილი, ცხოვრებისგან გაუბედურებული ადამიანები, რომლებიც ძუნწად გამოხატავენ თავიანთ აზრებსა და განცდებს, მაგრამ ეს სიტყვაძუნწობა ძალზე შთამბეჭდავი და მრავლისმეტყველია. რეიმონდ კარვერის თითოეული მოთხრობა ღრმააზროვანი ენიგმაა, რომელიც გვაიძულებს, ახლებურად გავიაზროთ მარადიული თემები: სიცოცხლე, სიკვდილი, სიყვარული...

2. "ჭამე,ილოცე,შეიყვარე“ -  ელიზაბეტ ჯილბერტი

"ჭამე, ილოცე, შეიყვარე" ავტობიოგრაფიული რომანია. ელიზაბეტი მტკიცედ გადაწყვეტს, იპოვოს ის, რაც აქამდე ესოდენ აკლდა. ამდენად, ის იწყებს ძიებას... რომში ის თავს ნებაზე მიუშვებს, ინდოეთში კი სულის განწმენდას ჰპოვებს... საბოლოოდ კუნძულ ბალიზე მცხოვრები ექიმბაში ახალ გზას დაანახვებს სიმშვიდისკენ და კვლავ გაუღვივებს სიყვარულის სურვილს. ეს წიგნი ერთდროულად სამ განსხვავებულ ადგილას, იტალიაში, ინდოეთსა და ინდონეზიაში გამოგზაურებთ. 

3. "კარი ზაფხულში" - რობერტ ჰაინლაინი 

დენიელ ბუნ დეივისი ნიჭიერი გამომგონებელი, საკმაოდ წარმატებული ადამიანი და ბედნიერი კაცია. აქვს საყვარელი საქმე, ჰყავს საუკეთესო მეგობარი და ლამაზი შეყვარებული. ერთ დღესაც კი ყველაფერს დაკარგავს. მას აღარავინ დარჩება, კატის – პეტრონიუსის გარდა... სწორედ მათი ცხოვრების ნანგრევებზე იწყება ყველაზე საინტერესო თავგადასავალი: ყველაფრის დავიწყება და ბედნიერების ძებნა, საიდუმლოს გამოაშკარავება, დროის მანქანით დროში მოგზაურობა, ფანტასტიკური გამოგონებები და შეშლილი მეცნიერები...

4. "ოქროს ტაძარი" - იუკიო მიშიმა 

მე-20 საუკუნის იაპონური ლიტერატურის შედევრს, იუკიო მიშიმას (1925-1970) „ოქროს ტაძარს“ საფუძვლად კიოტოში მომხდარი ნამდვილი ამბავი უდევს. მწერალი ადამიანის ყველაზე რთულად ასახსნელი ინსტინქტების ჩვენებას ისე ახერხებს, რომ მკითხველს დამზაფრავი გულწრფელობით გამორჩეული მთავარი გმირის თანამზრახველად აქცევს. სილამაზის არსის შეცნობა სიკვდილ-სიცოცხლის საკითხად ქცეულა ბუდისტი მორჩილისთვის, რომლის ფიქრებიც მუდმივად დასტრიალებს ოქროს ტაძარს – სრულყოფილების განსახიერებას. რამდენად ძლიერია განადგურების ვნება მაშინ, როცა საკუთარ არასრულყოფილებას ბოლომდე აცნობიერებ? წლების შემდეგ იუკიო მიშიმა სიცოცხლეს თვითმკვლელობით დაასრულებს, მისი მთავარი გმირის ნააზრევი კი სულ სხვა მნიშვნელობას შეიძენს.

5. "ლამაზად გაქცევა" - ანა გავალდა 

გარანსი, სიმონი, ვანსანი და ლოლა - ოთხი ერთმანეთისგან სრულიად განსხვავებული და-ძმა ერთ მშვენიერ დღეს დაუგეგმავად გადაწყვეტს, ყველაფერს გაექცეს. ნათესავის ქორწილიდან ისინი გარბიან შორს ყოფითი პრობლემებისგან, განქორწინებისა და ოჯახური ცხოვრების კრიზისებისგან, ფინანსური სიძნელეებისა და მარტოობისგან და ბავშვობის უკანასკნელ, ულამაზეს დღეს იწყობენ.

6. "სამი მეგობარი" - ერიხ მარია რემარკი 

თუკი შეიძლება სიყვარული და მეგობრობა ისწავლებოდეს, მაშინ ამ საგნების სასწავლებლად მთავარი სახელმძღვანელო ერიხ მარია რემარკის “სამი მეგობარი” იქნებოდა. ეს არის გულისშემძვრელი ისტორია თაობაზე, რომელმაც დაკარგა ყველაფერი, მაგრამ არ დაკარგა მთავარი. მეგობრებზე და მათ თავგანწირვაზე. სიყვარულზე, რომელიც ფიზიკურად შეიძლება აღარ არსებობდეს, მაგრამ არასდროს მოკვდება. ეს არის ერთ- ერთი ყველაზე ემოციური წიგნი, რომელიც მართლაც გვასწავლის თავგანწირვასა და სიყვარულს და ალბათ არც ის არის შემთხვევითი, რომ რემარკიც, რომლის წიგნებსაც დიდი ხნის მანძილზე წვავდნენ და კრძალავდნენ, სწორედ ამ წიგნში წერს, გიყვარდეთ, რადგან "სიყვარულის გარეშე ადამიანი იგივეა, რაც შვებულებაში გასული მიცვალებული."

7. "ოცნებობენ ანდროიდები ელექტრონულ ცხვრებზე?" - ფილიპ კ. დიკი

„ოცნებობენ ანდროიდები ელექტრონულ ცხვრებზე?“ ფილიპ დიკის ყველაზე პოპულარული ნაწარმოებია. ეს პოპულარობა ბევრმა რამემ განაპირობა – ორიგინალურმა სიუჟეტმა, თხრობის არაჩვეულებრივმა მანერამ, ალუზიებმა, დინამიკამ, დამაინტრიგებელმა ამბავმა... ეს წიგნი მარტოობაზეა, სწორედ ისეთ მარტოობაზე, როგორისაც ყველა ადამიანს ეშინია... ამ წიგნში ტელევიზორები მუდამ ჩართულია – სიჩუმეს ვერ იტანენ. აქ ყველას ჰყავს ოჯახი, მაგრამ თითოეული იმდენად მარტოსულია, რომ ყველაზე სანუკვარ, ყველაზე დიდ მიღწევად შინაური ცხოველის ყოლა ითვლება – თუ ცხოველი გყავს, ე.ი. მიზანი გაქვს, ე.ი. არის ვიღაც, ვისაც შენი ზრუნვა სჭირდება... შინაური ცხოველი უკეთეს ცხოვრებას განასახიერებს – ყველაფერს, რაც რადიაციულ მტვრამდე არსებობდა, რაც უყვარდათ, რაც ჯერ კიდევ ახსოვთ... ამიტომ, ადამიანები გაუთავებლად ოცნებობენ ნამდვილ ცხოველზე. ადამიანის გარდა, არიან ანდროიდები, რომლებსაც ზოგჯერ თავისუფლება და ადამიანებში შერევა სწყურიათ. ვინ იცის, იქნებ, ისინიც ოცნებობენ თავიანთ საკუთარ, ელექტრონულ ცხვრებზე, რომლებსაც ყოველ დილით მოუვლიან, სამსახურში წასვლამდე თივას მიუტანენ, გამოელაპარაკებიან და თავიანთ ანდროიდულ მარტოობას შეიმსუბუქებენ?!

8. "ცხოველების ფერმა" - ჯორჯ ორუელი

ორჯ ორუელის ცხოველების ფერმა - აკრძალული რომანი, ანუ ვინ აშენებს უტოპიურ სახელმწიფოს! რით ჰგვანან ცხოველების ფერმის პერსონაჟები - ღორი ნაპოლეონი, ძაღლი პინჩერი, თვინიერი ცხვარი, დამონებული ცხენები, იხვის ჭუჭულები და მათი მეგობრები გაცილებით ადრე ჯორჯ ორუელის ეს მინირომანი; რა დაეხმარება ძველ თაობას იმისთვის, რომ არასოდეს დაივიწყოს, საიდან მოდიან და რატომ არ უნდა გაუჩნდეთ ახალგაზრდებს ცხოველების ფერმაში დაბრუნების სურვილი... ეს მცირე ჩამონათვალია იმისა, რაზეც პასუხებს ამ წიგნში ამოიკითხავთ.

9. "თუ ზამთრის ღამით მოგზაური" - იტალო კალვინო 

პოსტმოდერნული რომანი. ჰიპერრომანი. მეტარომანი. ათასნაირად მოინათლა კალვინოს ეს წიგნი გამოსვლისთანავე. მკითხველი მინიშნებას, დახმარებას, ინტერპრეტაციის გასაღებს, მწერლის განზრახვას ეძებს ამ წიგნში, გზას, რომელსაც დაადგება, ამბავს, რომელსაც დაამთავრებს. ცდილობს, გაუმკლავდეს ამ უცნაურ ენობრივ და სტილისტიკურ თამაშს, გამოაღწიოს დაწყებული, ერთმანეთში გადამავალი და უკვალოდ გამქრალი ამბების ხლართიდან, არ შეეგუოს აზრს, რომ მის ცნობისმოყვარეობას დაკმაყოფილება არ უწერია. დაბოლოს, როცა წიგნს ხურავს, ხვდება, რომ იმ გზის გასავლელად, იმ წრედის შესაკრავად სულაც არ ყოფილა აუცილებელი ამბის დასრულება. მეტიც: ისიც კი არ ყოფილა აუცილებელი, ამბავს დასასრული ჰქონოდა... იტალო კალვინო (1923-1985) თანამედროვე იტალიური ლიტერატურის ერთ-ერთი ყველაზე მნიშვნელოვანი ავტორია. იტალიური პოსტმოდერნული პროზა სწორედ კალვინოს რომანებით იღებს სათავეს. მსოფლიო მკითხველისთვის კალვინო ცნობილია ტრილოგიით „ჩვენი წინაპრები“, რომანებითა და კრებულებით „მარკოვალდო“, „ობობის ქსელის ბილიკები“, „უხილავი ქალაქები“, „თუ ზამთრის ღამით მოგზაური“, „კოსმოკომიკური ამბები“, „იტალიური ზღაპრები“ და სხვა.

10. "ყოფის აუტანელი სიმსუბუქე" - მილან კუნდერა

„ყოფის აუტანელი სიმსუბუქე“ - მილან კუნდერას ყველაზე ცნობილი რომანი - 1982 წელს დაიწერა, თუმცა მისი გამოქვეყნება ავტორმა მხოლოდ ორი წლის შემდეგ მოახერხა. ჩეხურ ენაზე დაწერილი წიგნი პირველად ფრანგულად გამოიცა. რომანის გმირები 1960-70-იანი წლების პრაღაში ცხოვრობენ, თუმცა ის რთული ურთიერთობები და ფილოსოფიური საკითხები, რომლებსაც კუნდერა ეხება, ნებისმიერ ეპოქასა თუ ადგილს გულისხმობს.

ავტორი: ანი სარდლიშვილი 

ნუცა ბუზალაძე საქართველოში იმყოფება. მომღერალმა მის გეგმებზე და პირად ცხოვრებაზე „იმედის დღეში“ ისაუბრა.

ერთ-ერთი წამყვანის, ნუცა ქავთარაძის კითხვაზე – „ნუცა ბუზალაძე ისევ მარტოა თუ არა“, მომღერალი პასუხობს:

„ უკვე ერთი წელია, შეყვარებული ვარ. საკმაოდ ბედნიერი ვარ პირად ცხოვრებაში, ამიტომ არასდროს არ ვასაჯაროებ. ბავშვობიდან ყოველთვის იმის შიში მქონდა, როგორ უნდა შემეთავსებინა სიყვარული კარიერას, როცა ასე გიყვარს შენი საქმე. მაგრამ თურმე ეს შესაძლებელია...“, -ამბობს ნუცა.

ბელა ჰადიდი didas-ის წინააღმდეგ სასამართლოში საჩივრის შესატანად ემზადება. მან ამისთვის ადვოკატები უკვე დაიქირავა, - ამის შესახებ ინფორმაციას TMZ ავრცელებს.

სუპერმოდელი Adidas-ს იმაში ადანაშაულებს, რომ ბრენდმა სარეკლამო კამპანიით იგი მიუნხენის ოლიმპიადაზე მომხდარ 1972 წლის ტრაგედიას დაუკავშირა. სუპერმოდელის თქმით, კამპანია „სასტიკი და დამაზიანებელი“ იყო.

იქამდე, სამოსის გერმანულმა ბრენდმა Adidas თავისი ახალი კამპანიის ერთ-ერთ სახედ ბელა ჰადიდის წარდგენის გამო მწვავე კრიტიკა დაიმსახურა. კომპანიამ მიუნხენის 1972 წლის ოლიმპიადისთვის დამზადებული წითელი სპორტული ფეხსაცმელი ხელახლა გამოუშვა და მის სარეკლამო კამპანიაში მოდელი ბელა ჰადიდიც გადაიღო.

საქმე ისაა, რომ მიუნხენის ოლიმპიადას ტრაგიკული ამბავი უკავშირდება: ღონისძიების მიმდინარეობისას, ოლიმპიურ სოფელში პალესტინელი ტერორისტები შეიჭრნენ და ისრაელის დელეგაციის 11 წევრი, მწვრთნელები და სპორტსმენები, დახოცეს. თავდასხმას ემსხვერპლა გერმანელი პოლიციელიც.

ჰადიდი კი, რომელიც ნახევრად პალესტინელია, ხშირად აკრიტიკებს ისრაელს. რამდენიმე წლის წინ მოდელი ისრაელმა „ებრაული სახელმწიფოს გაქრობის“ მხარდაჭერაშიც კი დაადანაშაულა. ადიდასის ახალ კამპანიაში მის მონაწილეობას კი რამდენიმე ორგანიზაციის, ასევე ისრაელის მხრიდან უარყოფითი გამოხმაურება მოჰყვა.

ანჯელინა ჯოლის და ბრეტის პიტის ქალიშვილმა შაილომ, მამის გვარზე ოფიციალურად თქვა უარი. ინფორმაციას independent-ი ავრცელებს.

შაილო სრულწლოვანი მაისში გახდა და გვარის ცვლილებასთან აკავშირებდათ განაცხადი სასამართლოში მაისშივე შეიტანა. მისი მოთხოვნა სასამართლომ ივლისში დაკმაყოფილდა და შაილო ნუველ ჯოლი - პიტი ახლა უკვე შაილო ნუველ ჯოლია.

წყვილის კიდევ ორი ქალიშვილი ვივიენი და ზაჰარა მამის გვარს არ იყენებენ, თუმცა შაილო პირველია, რომელმაც მამის გვარზე ოფიციალურად განაცხადა უარი და სასამართლოს მიმართა.

ცნობისთვის, 49 წლის ჯოლიმ და 60 წლის პიტმა ერთმანეთი 2004 წელს, "მისტერ და მისის სმიტების" გადასაღებ მოედანზე გაიცნეს. ისინი ოფიციალურად 2014 წელს დაქორწინდნენ. მათ ექვსი შვილი ჰყავთ.

დევიდ და ვიქტორია ბექჰემების შესახებ გადაღებული დოკუმენტური ფილმი Emmy Awards-ზეა წარდგენილი. წყვილი ნომინირებულია ხუთ კატეგორიაში Netflix-ის დოკუმენტურ სერიალში Beckham, რომელიც გამოვიდა 2023 წელს. სერიალმა გულშემატკივრებს აჩვენა ობიექტური ისტორია დევიდის კარიერულ გზაზე და საშუალება მისცა მათ დაენახათ მისი ურთიერთობის დასაწყისი ვიქტორიასთან.

4 ეპიზოდიანი ფილმი ნომინირებულია კატეგორიებში საუკეთესო დოკუმენტური სერიები, კინემატოგრაფია, მონტაჟი, მუსიკალური კომპოზიცია და რეჟისურა. ნომინაციის შესახებ ცნობის საპასუხოდ, დავითმა HELLO!-ს განუცხადა, რომ ძალიან მოეწონა აკადემიის ასეთი ყურადღება.

„ჩემთვის და Beckham-ის მთელი შემოქმედებითი გუნდისთვის დიდი პატივია სატელევიზიო აკადემიის აღიარება. ამ სერიალის გადაღება იყო პირადი მოგზაურობა, ჩემთვის და ვიქტორიისთვის სასიხარულოა, რომ სერიალზე ასეთი თბილი და დადებითი გამოხმაურება მივიღეთ. მადლობელი ვარ გუნდის, რომელსაც ხელმძღვანელობს ფიშერ სტივენსი, და ყველა იმ ადამიანის, ვინც მონაწილეობა მიიღო და ითამაშა ასეთი მნიშვნელოვანი როლი ჩემს ისტორიაში“, - განაცხადა ბექჰემმა.

გერმანიაში, ქალაქ გელზენკირხენში პოლიციამ 34 წლის ამერიკის მოქალაქე დააკავა. მას მეგა პოპ-ვარსკვლავის, ტეილორ სვიფტის თვალთვალი და მუქარა ედება ბრალად. ინფორმაციას reuters-ი ავრცელებს.

პოლიციის ინფორმაციით, მამაკაცი ტეილორ სვიფტს და მის პარტნიორს, სოციალურ ქსელში ემუქრებოდა და უთვალთვალებდა.

მისი იდენტიფიცირება საკონცერტო ბილეთის მეშვეობით მოხდა, რის შემდეგაც მამაკაცი პოლიციამ კონცერტის შესასვლელ საკონტროლო პუნქტზე დააკავა.

მამაკაცი პოლიციამ ოთხშაბათს დააკავა. სასამართლოს გადაწყვეტილებით, უსაფრთხოების მიზნით, ის შაბათის ჩათვლით პატიმრობაში იქნება.

გელზენკირხენში, ოთხშაბათს გამართული კონცერტი ერთ-ერთი იყო იმ სამი კონცერტიდან, რომელიც მომღერალმა გერმანიაში Eras Tour-ის ფარგლებში ჩაატარა და სადაც 60 000 ფანი შეიკრიბა.

უკანასკნელ დღეებში სოციალურ ქსელში ვირუსულად გავრცელდა 2007 წელს გადაღებული ფოტო, სადაც რამდენიმე თვის ლამინ იამალი ლიონელ მესისთან ერთადაა გამოსახული.

ამ ფოტოზე "ბარსელონას" სუპერტალანტს RAC1-თან ჩაწერილ ინტერვიუში ჰკითხეს.

"მესისთან არასდროს მილაპარაკია. ვისურვებდი, რომ მასთან საუბრის შანსი მქონოდა. ფოტოს გადაღების დროს ვერც ვიაზრებდი, რომ მესისთან ვიყავი.

პირველი, ვინც ამაზე მითხრა, მამაჩემი იყო.  რათა ლეოსა და ჩემი შედარება არ დაეწყოთ," - თქვა ლამინმა.

შეგახსენებთ, რომ იამალი 14 ივლისს ევროპის ჩემპიონატის ფინალში ითამაშებს. ესპანეთის ნაკრების მეტოქე ინგლისის ეროვნული გუნდი იქნება.

„მეტა“ დონალდ ტრამპის „ინსტაგრამისა“ და „ფეისბუქის“ ანგარიშებზე შეზღუდვებს მოხსნის. ამის შესახებ ინფორმაციას „ფოქს ნიუსი“ ავრცელებს. „მეტას“ სპიკერმა დაადასტურა, რომ კომპანია გააუქმებს ტრამპის ანგარიშებზე დაწესებულ აკრძალვებს, რომლებიც 2021 წლის იანვრიდან მოქმედებს.

კომპანიაში განაცხადეს, რომ ეს გადაწყვეტილება საპრეზიდენტო არჩევნების კანდიდატებს შორის თანასწორობის უზრუნველყოფის მიზნით მიიღეს „მეტას“ სპიკერის თქმით, შეზღუდვები მომავალ კვირაში მოიხსნება.

„ჩვენ გვჯერა, რომ ამერიკელ ხალხს უნდა შეეძლოს პრეზიდენტობის კანდიდატების მოსმენა“, – აღნიშნულია კომპანიის განცხადებაში.

ამასთან, „მეტას“ განცხადებაში ნათქვამია, რომ თუ ტრამპი კვლავ დაარღვევს კომპანიის წესებს, მას გამკაცრებული ჯარიმები დაუწესდება.

ცნობისთვის, 2021 წლის 6 იანვარს, კაპიტოლიუმზე შტურმის შემდეგ, „მეტამ“ ტრამპს სოციალური მედიის ანგარიშებზე წვდომა შეუზღუდა და განაცხადა, რომ ის „აქებდა“ ადამიანებს, რომლებიც „ძალადობაში იყვნენ ჩართულნი“.