... ... hotnews.ge - კრიმინალი

ბლოგერი უჩა აბაშიძისა და მისი მეუღლის საქმეზე გიგა მაქარაშვილი გამოიკითხა

ბლოგერ უჩა აბაშიძისა და მისი მეუღლის, მარიამ იაშვილის საქმეზე სამოქალაქო აქტივისტი მაგისტრი მოსამართლის წინაშე გამოიკითხა.

საქალაქო სასამართლოში რამდენიმე საათიანი გამოკითხვის შემდეგ, გიგა მაქარაშვილმა თქვა, რომ სამართალდამცველებმა გაუთქმელობაზე ხელი მოაწერინეს, თუმცა დაადასტურა, რომ სასამართლოში მოწმის სახით დაიბარეს და ის საქმეში დაზარალებული არ არის.

შეგახსენებთ, რომ გამოძიება უჩა აბაშიძესა და მის მეუღლეს პირადი ცხოვრების საიდუმლოს ამსახველი მასალების უკანონოდ მოპოვებასა და შენახვას, ასევე საბრძოლო მასალის უკანონოდ შეძენა-შენახვას ედავება. დანაშაული 7 წლამდე პატიმრობას ითვალისწინებს.

ცოლისა და სიდედრის მკვლელობა რუსთავში - პროკურატურამ ერთ პირს ბრალდება წარუდგინა

საქართველოს პროკურატურამ რუსთავში მეუღლისა და მეუღლის დედის დამამძიმებელ გარემოებებში ჩადენილი განზრახ მკვლელობის ფაქტზე ერთ პირს ბრალდება წარუდგინა. ინფორმაციას პროკურატურა ავრცელებს: 

შინაგან საქმეთა სამინისტროს მიერ ჩატარებული გამოძიებით დადგინდა, რომ 22 მაისს, რუსთავში, ბრალდებულმა მეუღლეს და მეუღლის დედას, რომლებიც ჩვილ ბავშვთან ერთად საბავშვო ეტლით გადაადგილდებოდნენ, გენდერის ნიშნით,შეუწყნარებლობის მოტივით,სანადირო თოფიდან მრავალჯერადი გასროლით, გულ-მკერდის არეში სიცოცხლისთვის სახიფათო, მძიმე ხარისხის დაზიანებები მიაყენა, რის შედეგადაც ორივე მათგანი შემთხვევის ადგილზე გარდაიცვალა.
სამართალდამცველებმა ბრალდებული იმავე დღეს დააკავეს. მას ბრალდება საქართველოს სისხლის სამართლის კოდექსის 11 პრიმა, 109-ე მუხლის ,,ბ’’, ,,თ’’, ,,კ’’ და ,,ლ’’ ქვეპუნქტებით (ოჯახის ორი წევრის განზრახ მკვლელობა, ჩადენილი გენდერის ნიშნით და ისეთი საშუალებით, რომელიც განზრახ უქმნის საფრთხეს სხვის სიცოცხლესა და ჯანმრთელობას) და ამავე კოდექსის 126-ე პრიმა მუხლის პირველი ნაწილით (სისტემატური ფსიქოლოგიური და ფიზიკური ძალადობა) წარედგინა, რაც სასჯელის სახედ და ზომად 16-დან 20 წლამდე ვადით ან უვადო თავისუფლების აღკვეთას ითვალისწინებს. 
პროკურატურა ბრალდებულისთვის აღკვეთი ღონისძიების სახით პატიმრობის შეფარდების შუამდგომლობით  სასამართლოს კანონით დადგენილ ვადაში მიმართავს, - წერია განცხადებაში.

ლევან ხაბეიშვილი პროკურატურამ დაზარებულად ცნო

“ერთიანი ნაციონალური მოძრაობის” თავმჯდომარე ლევან ხაბეიშვილი 23 დღის შემდეგ პროკურატურამ დაზარებულად ცნო" - ნათქვამია ენმ-ის მიერ გავრცელებულ ინფორმაციაში. განცხადებაში ნათქვამია, რომ ხაბეიშვილს შესაბამისი დადგენილების გამოცემის თაობაზე სპეციალური საგამოძიებო სამსახურის გამომძიებელმა შეატყობინა.

"ერეკლე ბენაშვილი, სპეციალური საგამოძიებო სამსახურის გამომძიებელი პარტიის თავმჯდომარეს 23 დღის შემდეგ დაუკავშირდა და შეატყობინა, რომ პროკურორმა მის მიმართ გამოიტანა დადგენილება დაზარალებულად ცნობის თაობაზე.
რუსული კანონის საწინააღმდეგო აქციაზე, “ერთიანი ნაციონალური მოძრაობის” თავმჯდომარეს, ლევან ხაბეიშვილს, ხარება (ზვიად ხარაზიშვილი) და მისი დაჯგუფება ფიზიკურად სასტიკად გაუსწორდნენ.” აცხადებს ენმ.

რაჭაში მიკროავტობუსი გზიდან გადავარდა - დაღუპულია ერთი და დაშავებულია რამდენიმე ადამიანი

რაჭაში ავტოსაგზაო შემთხვევა მსხვერპლით დასრულდა.  მიკროავტობუსი ამბროლაურის მუნიციპალიტეტში გზის სავალი ნაწილიდან გადავარდა, რის შედეგადაც 1 ადამიანი დაიღუპა, რამდენიმე კი დაშავდა. არსებული ინფორმაციით, მიკროავტობუსი ამბროლაური-თბილისის სამარშრუტო ხაზე მუშაობდა. მომხდარზე გამოძიება დაიწყო. 

 

სროლა შარდენზე- არსებული ინფორმაციით, დაჭრილია ერთი ადამიანი

თბილისში, ბამბის რიგის ქუჩაზე სროლა იყო. ადგილზე ამ წუთებში პოლიციაა მობილიზებული.

ჩვენი ინფორმაციით, დაჭრილია ერთი ადამიანი. არსებული ინფორმაციით, ერთ-ერთ ობიექტში შესული კლიენტი ამ ობიექტის თანამშრომელს დაუპირისპირდა. სავარაუდოდ, ის ნასვამი იყო. დაპირისპირების შემდეგ მან მანქანიდან ცეცხლსასროლი იარაღით უმისამართოთ ისროლა, ტყვია კი გამვლელს მოხვდა. დაჭრილი, კლინიკაშია გადაყვანილი.

ინფორმაციას ჯერ შინაგან საქმეთა სამინისტროსი ოფიციალურად არ ადასტურებენ, თუმცა, "მთავარის" ინფორმაციით, დაკავებულია პირი, რომელმაც უმისამართოდ ისროლა. 

სამეგრელოს პოლიციამ ოჯახის წევრის მიმართ დამამძიმებელ გარემოებებში ჩადენილი განზრახ მკვლელობის მცდელობის ფაქტი ცხელ კვალზე გახსნა

შინაგან საქმეთა სამინისტროს სამეგრელო-ზემო სვანეთის პოლიციის დეპარტამენტის მარტვილის რაიონული სამმართველოს თანამშრომლებმა, ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად, ოჯახის წევრის მიმართ დამამძიმებელ გარემოებებში ჩადენილი განზრახ მკვლელობის მცდელობის ბრალდებით 1958 წელს დაბადებული მ.ჯ. დააკავეს.
დანაშაული 16-დან 20 წლამდე ვადით თავისუფლების აღკვეთას ითვალისწინებს.
გამოძიებით დადგინდა, რომ მარტვილის მუნიციპალიტეტში, ბრალდებულმა ურთიერთშელაპარაკების ნიადაგზე შვილს - 1994 წელს დაბადებულ ლ.ჯ.-ს სანადირო თოფიდან გასროლით სახისა და ზურგის არეში დაზიანებები მიაყენა.
დაჭრილი ლ.ჯ. სასწრაფო სამედიცინო დახმარების ჯგუფმა სამედიცინო დაწესებულებაში გადაიყვანა.
ჩატარებული საგამოძიებო მოქმედებების შედეგად ბრალდებული პოლიციამ ცხელ კვალზე დააკავა.
სამართალდამცველებმა დანაშაულის ჩადენის იარაღი ნივთმტკიცებად ამოიღეს.
გამოძიება ოჯახის წევრის მიმართ დამამძიმებელ გარემოებებში ჩადენილი განზრახ მკვლელობის მცდელობის ფაქტზე, სისხლის სამართლის კოდექსის 19-109-ე მუხლის “კ” ქვეპუნქტით მიმდინარეობს.

ქუთაისში, ბანკში შეჭრილმა თავდამსხმელმა თანხის წაღება ვერ მოახერხა და ადგილიდან მიიმალა

ქუთაისში, ილია ჭავჭავაძის #37 ნომერში, "საქართველოს ბანკის" შენობაში შეიარაღებული, ნიღბიანი პირი შეიჭრა. ის ბანკის თანამშრომლებს სიცოცხლის მოსპობით დაემუქრა და თანხა მოითხოვა. ამ დროს ბანკში რამდენიმე მომხმარებელი იმყოფებოდა, რომელმაც შენობის დატოვება მოახერხა. თავდამსხმელმა აღნიშნულის შემდეგ ობიექტი ისე დატოვა, რომ თანხის წაღება ვერ მოახერხა. 

ადგილზე საგამოძიებო მოქმედებები ამ წუთებშიც მიმდინარეობს. ბანკის თანამშრომლები საგამოძიებო ორგანოში გადაიყვანეს ჩვენების მისაცემად.

შსს-მ მომხდარზე გამოძიება სისხლის სამართლის კოდექსის 179-ე მუხლით დაიწყო, რაც ყაჩაღობას გულისხმობს.

ქუთაისში, ბანკში შეიარაღებული პირი შეიჭრა

ქუთაისში, "საქართველოს ბანკში" შეიარაღებული, ნიღბიანი პირი შეიჭრა. 

მოახერხა თუ არა თავდამსხმელმა ფულის წაღება, ჯერჯერობით უცნობია. ადგილზე საგამოძიებო მოქმედებები ამ დრომდე გრძელდება, ნიღბიანმა პირმა კი, სავარაუდოდ, ტერიტორიის დატოვება მოასწრო.

უკრაინაში კიდევ ერთი ქართველი მებრძოლი დაიღუპა

უკრაინაში, რუსეთთან ბრძოლაში კიდევ ერთი ქართველი მებრძოლი, სერგო გორნაკაშვილი დაიღუპა. ინფორმაციას სოციალურ ქსელში მისი თანამებრძოლი, ვანო ნადირაძე ავრცელებს. 

მისი ინფორმაციით, წარმოშობით ქისტი სერგო გორნაკაშვილი ხარკოვის მიმართულებით დაიღუპა. ხარკოვის ოლქი ფრონტის ცხელი წერტილია. რუსულმა ძალებმა ცოტა ხნის წინ დაიწყეს ახალი შეტევა და განაცხადეს, რომ დაიპყრეს რამდენიმე სოფელი უკრაინის ჩრდილო-აღმოსავლეთ საზღვარზე, ქალაქ ხარკოვთან. კრემლის ძალები ცდილობენ გაარღვიონ უკრაინის ფრონტის ხაზი. 

რუსეთმა ომი უკრაინაში 2022 წლის 24 თებერვალს დაიწყო. დღემდე საომარ მოქმედებებს 60-ზე მეტი ქართველი მებრძოლის სიცოცხლე ემსხვერპლა. 

მარტვილში მამამ შვილი დაჭრა

მარტვილში, სოფელ ნალებსაოში მამამ შვილი დაჭრა. არსებული ინფორმაციით, კაცმა 30 წლამდე შვილი ცეცხლსასროლი იარაღიდან გასროლით დაჭრა.

დაშავებული სამედიცინო დაწესებულებაშია გადაყვანილი. 

ბრალდებული პოლიციამ საკუთარ სახლში დააკავა. 

მომხდარზე გამოძიება საქართველოს სისხლის სამართლის კოდექსის 11 პრიმა-19-109-ე მუხლის მე-2 ნაწილის "ვ" ქვეპუნქტით მიმდინარეობს, რაც ოჯახის წევრის მიმართ განხორციელებულ განზრახ მკვლელობის მცდელობას გულისხმობს.

რუსთავში ორი ქალი მოკლეს - ცოლისა და სიდედრის მკვლელობის საქმეზე კაცი დააკავეს

22 მაისს რუსთავში, ქალაქის ცენტრში, მერიიდან დაახლოებით 300 მეტრში, დუმბაძის ქუჩაზე, ორი ქალი მოკლეს. შემთხვევის ადგილზე იმყოფებოდა მცირეწლოვანი ბავშვიც.

ცოლისა და სიდედრის მკვლელობის საქმეზე კაცი დააკავეს. შსს-ს ინფორმაციით, გამოძიება დაწყებულია სისხლის სამართლის კოდექსის 109-ე მუხლით, რაც გულისხმობს განზრახ მკვლელობას დამამძიმებელ გარემოებაში.

ამჟამად შემთხვევის ადგილზე საგამოძიებო მოქმედებები მიმდინარეობს. რა გახდა მკვლელობის მიზეზი ამ დომდე უცნობია.

რუსთავში, 2 ქალი მოკლეს - რა ხდება ადგილზე

ინფო რუსთავის ინფორმაციით, რუსთავში, დუმბაძის ქუჩაზე, ორი ადამიანი მოკლეს. ადგილზე ამ წუთებში პოლიციაა მობილიზებული.

არსებული ინფორმაციით, მოკლულია დედა-შვილი, რომლებიც ქუჩაში ეტლით, ჩვილ ბავშვთან ერთად გადაადგილდებოდნენ, რა დროსაც კაცმა, სავარაუდოდ ერთ-ერთის ქმარმა, ცეცხლი გახსნა. ბავშვი ამჟამად მედიკოსებთან იმყოფება, უცნობია მისი მდგომარეობა.  

შსს-მ გამოძიება სსკ-ის 109-ე, დამამძიმებელ გარემოებებში განზრახ მკვლელობის მუხლით დაიწყო