... ... hotnews.ge - მსოფლიო

სამხრეთ ჩინეთის ზღვაში ჩინეთი და რუსეთი ერთობლივ სამხედრო წვრთნებს ატარებენ

რუსეთისა და ჩინეთის საზღვაო ძალებმა, დღეს, 14 ივლისს, სამხრეთ ჩინეთის ზღვაში, გუანდონგის პროვინციის მახლობლად, ერთობლივი წვრთნები სახელწოდებით "საზღვაო ურთიერთქმედება - 2024" დაიწყეს. ამის შესახებ ინფორმაციას ჩინეთის სახალხო რესპუბლიკის თავდაცვის სამინისტრო ავრცელებს.

წვრთნები დაყოფილია სამ ეტაპად, მათ შორის ძალების კონცენტრაცია, ნავსადგურში დაგეგმვა და ტაქტიკურ კოორდინაციის რუკაზე ვარჯიში, ასევე, 15-17 ივლისს პრაქტიკული საზღვაო წვრთნა პროვინციის მიმდებარე სამხრეთ ჩინეთის ზღვის ტერიტორიაზე.

სწავლების პირველ ეტაპზე, დეპარტამენტის სხვა განცხადების თანახმად, ჩინურმა სამხედრო ხომალდებმა და ორმა რუსულმა კორვეტმა მეოთხე ერთობლივი საზღვაო პატრულირება განახორციელეს წყნარი ოკეანის დასავლეთ და ჩრდილოეთ ნაწილში.

"ეს პატრულირება არ არის მიმართული მესამე მხარის წინააღმდეგ და არანაირი კავშირი არ აქვს არსებულ საერთაშორისო და რეგიონულ ვითარებასთან," - განაცხადეს თავდაცვის სამინისტროში.

საფრანგეთი 14 ივლისს ეროვნულ დღესასწაულს, ბასტილიის დღეს აღნიშნავს

საფრანგეთი დღეს ეროვნულ დღესასწაულს აღნიშნავს. ბასტილიის ციხის აღების დღე საფრანგეთის რევოლუციის სიმბოლოა, რომელიც 1880 წლიდან აღინიშნება. ეროვნული დღესასწაული პარიზში, შანზ-ელიზეს მოედანზე, სამხედრო აღლუმით აღინიშნა. მსვლელობაში 4000-ზე მეტი სამხედრო მონაწილეობდა. შეკრებილებს სიტყვით მიმართა პრეზიდენტმა ემანუელ მაკრონმა. დღესასწაულთან დაკავშირებით რამდენიმე დღის წინ საქართველოში საფრანგეთის საელჩოში მიღება გაიმართა.

"წარმოუდგენელია, რომ ასეთი რამ შეიძლება მოხდეს ჩვენს ქვეყანაში... ვუსამძიმრებ აქციაზე დაღუპულის ოჯახს" - ტრამპი

"წარმოუდგენელია, რომ ასეთი რამ შეიძლება მოხდეს ჩვენს ქვეყანაში... ვუსამძიმრებ აქციაზე დაღუპულის ოჯახს", - ამის შესახებ აშშ-ის ყოფილი პრეზიდენტი დონალდ ტრამპი თავდასხმის შემდეგ საუბრობს.

მინდა მადლობა გადავუხადო აშშ-ის საიდუმლო სამსახურს და მთელ სამართალდამცავ ორგანოს მათი სწრაფი რეაგირებისთვის სროლაზე, რომელიც ახლახან მოხდა ბატლერში, პენსილვანიაში. რაც მთავარია, მინდა, მივუსამძიმრო აქციაზე დაღუპული ადამიანის ოჯახს და ასევე, მივმართო მძიმედ დაშავებულის ოჯახს. წარმოუდგენელია, რომ ასეთი რამ შეიძლება მოხდეს ჩვენს ქვეყანაში. მსროლელის შესახებ, რომელიც ახლა გარდაცვლილია, ამ დროისთვის არაფერია ცნობილი. მე მესროლა ტყვია, რომელმაც მარჯვენა ყურის ზედა ნაწილი გამიხვრიტა. მაშინვე მივხვდი, რომ რაღაც არ იყო წესრიგში, როცა გავიგე ხმა, გასროლა და მაშინვე ვიგრძენი კანზე ტყვია. ბევრი სისხლი დავინახე, ამიტომ მივხვდი, რაც ხდებოდა, - განაცხადა ტრამპმა.

თავდასხმა დონალდ ტრამპზე - მსოფლიო ლიდერების გამოხმაურებები

პენსილვანიაში, წინასაარჩევნო მიტინდის დროს, აშშ-ის ყოფილ პრეზიდენტ, დონალდ ტრამპზე თავდასხმას მსოფლიო ლიდერები ეხმაურებიან და მსგავს ძალადობას გმობენ. 

აშშ-ის პრეზიდენტი, ჯო ბაიდენი:

"მე ინფორმირებული ვარ პენსილვანიაში დონალდ ტრამპის მხარდაჭერების შეხვედრაზე სროლის შესახებ. მოხარული ვარ, რომ გავიგე, რომ ის უსაფრთხოდ არის და თავს კარგად გრძნობს. მე ვლოცულობ მისთვის და მისი ოჯახისთვის და ყველასთვის, ვინც აქციაზე იყო, რადგან ველოდებით დამატებით ინფორმაციას. მე და ჯილი მადლობელი ვართ საიდუმლო სამსახურის, რომ ის უსაფრთხოდ მიიყვანეს. ამერიკაში ამ ტიპის ძალადობის ადგილი არ არის. ჩვენ უნდა გავერთიანდეთ, როგორც ერთი ერი, რათა დავგმოთ ის," - განაცხადა ბაიდენმა. 

აშშ-ის ვიცე პრეზიდენტი, კამალა ჰარისი:

"მე ინფორმირებული ვარ პენსილვანიაში ყოფილი პრეზიდენტის, ტრამპის ღონისძიებაზე სროლის შესახებ. მე და დაგი [მეუღლე] შვებას ვგრძნობთ, რომ ის სერიოზულად არ დაშავებულა. ჩვენ ვლოცულობთ მისთვის, მისი ოჯახისა და ყველასთვის, ვინც დაშავდა და დაზარალდა ამ უაზრო სროლის შედეგად. ჩვენ მადლობელი ვართ შეერთებული შტატების საიდუმლო სამსახურს, პირველ რეაგირებას და ადგილობრივ ხელისუფლებას მათი დაუყოვნებელი მოქმედებისთვის. ასეთ ძალადობას ჩვენს ქვეყანაში ადგილი არ აქვს. ჩვენ ყველამ უნდა დავგმოთ ეს ამაზრზენი ქმედება და ჩვენი წვლილი შევიტანოთ იმისთვის, რომ მას არ მოჰყვეს მეტი ძალადობა," - განაცხადა კამალა ჰარისმა. 

აშშ-ის თავდაცვის მდივანი, ლოიდ ოსტინი:

"მთელი თავდაცვის დეპარტამენტი გმობს ამ ძალადობას, რომელსაც აბსოლუტურად არ აქვს ადგილი ჩვენს დემოკრატიაში. ეს არ არის გზა, რომლითაც ჩვენ ვაგვარებთ ჩვენს უთანხმოებებს ამერიკაში - და ეს არასოდეს უნდა იყოს. მე მშვიდად ვარ, რომ გავრცელებული ინფორმაციით, ყოფილი პრეზიდენტი ტრამპი უსაფრთხოდ არის და მე ვლოცულობ მისთვის და მისი ოჯახისთვის და ყველასთვის, ვინც დაზარალებულია ამ საშინელი ინციდენტით," - წერს ოსტინი.

აშშ-ის სახელმწიფო მდივანი, ენტონი ბლინკენი:

"შოკირებული და დამწუხრებული ვარ ყოფილი პრეზიდენტის, ტრამპის ყრილობაზე სროლით და მადლობელი ვარ, რომ ის უსაფრთხოდაა. როგორც პრეზიდენტმა ბაიდენმა თქვა, ამერიკაში პოლიტიკური ძალადობის ადგილი არ არის და ის ყველამ უნდა დავგმოთ", - დაწერა ენტონი ბლინკენმა.

აშშ-ის ყოფილი პრეზიდენტი, ბარაკ ობამა:

"ჩვენს დემოკრატიაში პოლიტიკური ძალადობის ადგილი აბსოლუტურად არ არის. მიუხედავად იმისა, რომ ჩვენ ჯერ არ ვიცით ზუსტად რა მოხდა, ყველამ ვიგრძენით შვება, რომ ყოფილი პრეზიდენტი ტრამპი სერიოზულად არ დაშავებულა. ჩვენ უნდა გამოვიყენოთ ეს მომენტი იმისათვის, რომ ჩვენს პოლიტიკაში ცივილიზებულობა და პატივისცემა დაბრუნდეს. მე და მიშელი მას სწრაფ გამოჯანმრთელებას ვუსურვებთ," - წერს ობამა. 

აშშ-ის ყოფილი პრეზიდენტი, ბილ კლინტონი:

"ძალადობას ამერიკაში ადგილი არ აქვს, განსაკუთრებით ჩვენს პოლიტიკურ პროცესში. მე და ჰილარი მადლობელი ვართ, რომ პრეზიდენტი ტრამპი უსაფრთხოდ არის, გული დამწყდა ყველაზე, ვინც დაზარალდა პენსილვანიის დღევანდელ მიტინგზე თავდასხმის შედეგად და მადლობელი ვართ აშშ-ის საიდუმლო სამსახურის სწრაფი მოქმედებისთვის," - დაწერა კლინტონმა.

საფრანგეთის პრეზიდენტი, ემანუელ მაკრონი:

"ჩემი ფიქრები პრეზიდენტ დონალდ ტრამპთანაა. მკვლელობის მცდელობის მსხვერპლთან, რომელსაც სწრაფ გამოჯანმრთელებას ვუსურვებ. ერთი აქტივისტი დაიღუპა, რამდენიმე კი დაშავდა. ეს ტრაგედიაა ჩვენი დემოკრატიისთვის. საფრანგეთი იზიარებს ამერიკელი ხალხის შოკსა და აღშფოთებას", - წერს ემანუელ მაკრონი.

უკრაინის პრეზიდენტი, ვოლოდიმირ ზელენსკი:

"შეძრწუნებული ვარ პენსილვანიაში, ყრილობაზე, აშშ-ის ყოფილი პრეზიდენტის, დონალდ ტრამპისთვის სროლის შესახებ. ასეთ ძალადობას მსოფლიოში გამართლება და ადგილი არ აქვს. ძალადობა არასოდეს უნდა ჭარბობდეს. მე შვება ვიგრძენი, რომ დონალდ ტრამპი ახლა უსაფრთხოდაა და მას სწრაფ გამოჯანმრთელებას ვუსურვებ. სამძიმარს ვუცხადებ თავდასხმის მსხვერპლის ახლობლებს, აქციის მონაწილეს. ძალას ვუსურვებ ყველას, ვინც შეძრწუნებულია ამ მოვლენით. ვისურვებდი, რომ ამერიკა ამისგან უფრო ძლიერი დარჩეს," - განაცხადა ზელენსკიმ.

ევროკავშირის უმაღლესი წარმომადგენელი ჯოზეფ ბორელი:

"შოკირებული ვარ პრეზიდენტ ტრამპზე თავდასხმის ამბებით, რომელსაც მე მკაცრად ვგმობ. კიდევ ერთხელ ვხედავთ პოლიტიკური წარმომადგენლების მიმართ მიუღებელი ძალადობის აქტებს," - წერს ბორელი. 

ევროკომისიის პრეზიდენტი, ურსულა ფონ დერ ლაიენი:

"ღრმად ვარ შოკირებული იმ სროლით, რომელიც მოხდა ყოფილი პრეზიდენტის ტრამპის წინასაარჩევნო მიტინგის დროს. დონალდ ტრამპს ვუსურვებ სწრაფ გამოჯანმრთელებას და ვუსამძიმრებ უდანაშაულო მსხვერპლის ოჯახს. პოლიტიკურ ძალადობას ადგილი არ აქვს დემოკრატიაში," - წერს ურსულა ფონ დერ ლაიენი. 

ევროპული საბჭოს თავმჯდომარე, შარლ მიშელი:

"პოლიტიკური ძალადობა დემოკრატიულ ქვეყანაში აბსოლუტურად მიუღებელია. ყოფილ პრეზიდენტ დონალდ ტრამპზე თავდასხმას მკაცრას ვგმობ", - წერს შარლ მიშელი.

ევროპარლამენტის პრეზიდენტი, რობერტა მეცოლა:

"შოკირებული ვარ პენსილვანიაში ყოფილი პრეზიდენტის ტრამპის მიტინგზე მომხდარი საშინელი თავდასხმით. პოლიტიკური ძალადობა მიუღებელია, მას ადგილი არ უნდა ჰქონდეს ჩვენს საზოგადოებებში. ჩემი ფიქრები მასთან და მსხვერპლებთანაა," - წერს მეცოლა. 

ისრაელის პრემიერმინისტრი, ბენიამინ ნეთანიაჰუ:

"მე და სარა შოკირებული ვიყავით პრეზიდენტ ტრამპზე აშკარა თავდასხმით. ვლოცულობთ მისი უსაფრთხოებისა და მალე გამოჯანმრთელებისთვის," - წერს ნეთანიაჰუ. 

მოლდოვის პრეზიდენტი, მაია სანდუ: 

"შეშფოთებული ვარ ყოფილი პრეზიდენტის, ტრამპის წინასაარჩევნო ღონისძიებაზე სროლით. ჩვენს საზოგადოებებში პოლიტიკურ ძალადობას ადგილი არ აქვს. დონალდ ტრამპს სწრაფ გამოჯანმრთელებას ვუსურვებ. თავდასხმისას დაღუპული აქციის მონაწილეების მეგობრებსა და ოჯახს სამძიმარს ვუცხადებ", - დაწერა მაია სანდუმ.

ესტონეთის პრემიერმინისტრი, კაია კალასი:

"შოკირებული ვარ პენსილვანიაში ყოფილი პრეზიდენტის დონალდ ტრამპის წინასაარჩევნო ღონისძიებაზე სროლით. სწრაფ გამოჯანმრთელებას ვუსურვებთ მას. ჩემი ფიქრები მსხვერპლებთანაა. პოლიტიკურ ძალადობას ნებისმიერი ფორმით არ აქვს გამართლება," - წერს კალასი.

გერმანიის კანცლერი, ოლაფ შოლცი:

"აშშ-ის პრეზიდენტობის კანდიდატზე დონალდ ტრამპზე თავდასხმა საზიზღარია. ვუსურვებ მას სწრაფ გამოჯანმრთელებას. ჩემი ფიქრები ასევე ეხება ყველა მათგანს, ვინც დაზარალდა თავდასხმის შედეგად. ასეთი ძალადობრივი აქტები საფრთხეს უქმნის დემოკრატიას," - წერს შოლცი. 

დონალდ ტრამპზე თავდამსხმელი იდენტიფიცირებულია - FBI

გამოძიების ფედერალური ბიუროს (FBI) ინფორმაციით, პირი, რომელმაც აშშ-ის ყოფილ პრეზიდენტს, დონალდ ტრამპს პენსილვანიაში წინასაარჩევნო მიტინგის დროს ესროლა, იდენტიფიცირებულია, როგორც  20 წლის თომას მეთიუ კრუკსი.

"FBI-მ დაადგინა 20 წლის თომას მეთიუ კრუკსი, პენსილვანიიდან, როგორც სუბიექტი, რომელიც მონაწილეობდა ყოფილი პრეზიდენტის დონალდ ტრამპის მკვლელობის მცდელობაში 13 ივლისს, პენსილვანიაში... ეს რჩება აქტიურ და მიმდინარე გამოძიებად და ნებისმიერს, ვისაც აქვს ინფორმაცია, რომელიც შეიძლება დაეხმაროს გამოძიებას, შეუძლია გამოაგზავნოს ფოტოები ან ვიდეოები ონლაინ მისამართზე (FBI.gov/butler), ან დარეკოს FBI-ში (1-800-CALL-FBI)," - განუცხადა FBI-იმ Fox News Digital-ს. 

პენსილვანიაში ჩასულ დონალდ ტრამპს თავს დაესხნენ - აშშ-ის ყოფილი პრეზიდენტი მის გამოსვლაზე შეკრებილ მხარდამჭერებს სცენიდან მიმართავდა, რა დროსაც მისი მიმართულებით გაისროლეს. 

მედია უსაფრთხოების სამსახურზე დაყრდნობით წერს, რომ ამ დროისთვის, ის უსაფრთხო ადგილას იმყოფება. ასევე ცნობილია, რომ მის სიცოცხლეს საფრთხე არ ემუქრება. 

"პრეზიდენტი ტრამპი მადლობას უხდის სამართალდამცველებს ამ საზარელი ფაქტის პირველადი რეაგირებისთვის. ის თავს კარგად გრძნობს და შემოწმებას ადგილობრივ სამედიცინო დაწესებულებაში გადის. დამატებით დეტალებზე მოგვიანებით ვისაუბრებთ", - განაცხადა მისმა სპიკერმა. 

შეერთებული შტატების საიდუმლო სამსახურის ცნობით, მიტინგზე მომხდარი თავდასხმის შემდეგ დონალდ ტრამპი უსაფრთხოდაა. განცხადება უწყების კომუნიკაციების უფროსმა, ენტონი გულელმა გააკეთა:

ინციდენტი 13 ივლისს, საღამოს, პენსილვანიაში, ტრამპის გამოსვლაზე მოხდა. საიდუმლო სამსახურმა დამცავი ზომები გაატარა და ყოფილი პრეზიდენტი უსაფრთხოდ იმყოფება. ახლა ეს საიდუმლო სამსახურის აქტიური გამოძიების საკითხია და შემდგომი ინფორმაცია გამოქვეყნდება, როდესაც ხელმისაწვდომი იქნება, - განაცხადა მან.

"ძალადობა, რომელიც მიმართულია რომელიმე პოლიტიკურ პარტიაზე ან პოლიტიკურ ლიდერზე, აბსოლუტურად მიუღებელია“, - ამის შესახებ კი X-ზე პენსილვანიის გუბერნატორმა, ჯოშ შაპირომ დაწერა. 

სერიულ მკვლელს, რომელიც ქალებს სასტიკად უსწორდებოდა, სამუდამო პატიმრობა მიესაჯა

კანადის პროვინცია მანიტობაში, მამაკაცი, რომელიც ოთხი ადგილობრივი ქალის სიცოცხლის მოსპობაში იყო ბრალდებული, სასამართლომ პირველი ხარიხის მკვლელობაში დამნაშავედ სცნო და მას სამუდამო პატიმრობა მიუსაჯა. სასამართლო დარბაზი, სადაც ჯერემი სკიბიცკის განაჩენი გამოცხადდა, გადაჭედილი იყო. მოსამართლის გადაწყვეტილებით ოჯახის მსხვერპლთა ოჯახის წევრები გახარებულები არიან.

"ამისთვის ამდენი ხანი ვიბრძოდით. მან მიიღო ის, რაც დაიმსახურა"- განაცხადა ერთ-ერთი მსხვერპლის დამ.

37 წლის ჯერემი სკიბიცკის ადვოკატები ამტკიცებდნენ, რომ ის არ არის კრიმინალი და მამაკაცი შიზოფრენიით არის დაავადებული.

პროკურორების მტკიცებით კიმან დანაშაული რასობრივი მოტივით ჩაიდინა და აღნიშნა, რომ ჯერემი სკიბიცკის ფსიქიკური დაავადების შესახებ დიაგნოზი ოფიციალურად დასმული არ აქვს.

სკიბიცკის მსხვერპლი 39 წლის მორგან ჰარისი, 26 წლის მარსედეს მირანი და 24 წლის რებეკა კონტოისია. მეოთხე მოკლულის იდენტიფიცირება ამ დრომდე არ მომხდარა.

სასამართლო დოკუმენტების თანახმად, სკიბიცკიმ მკვლელობა 2022 წლის მარტისა და მაისის შუალედში ჩაიდინა, რებეკა კონტოისი კი მისი უკანასკნელი მსხვერპლია.

მოსამართლემ პროკურორებზე დაყრდნობით თქვა, რომ სკიბიცკიმ მიზანმიმართულად უწევდა ექსპლუატაციას "დაუცველ" ქალებს.

დანაშაული, რამდენიმემ თვის შემდეგ, მას შემდეგ გამოაშკარავდა, რაც უცნობი მამაკაცი, სკიბიცკის სახლის მახლობლად ნაგვის ურნაში ჯართს ეძებდა, ამ დროს კი მან ადამიანის ნაწილები იპოვა. პოლიციამ ერთ-ერთი მოკლული ქალის იდენტიფიცირება შეძლო. დაკავების შემდეგ, სიბიცკიმ აღიარა დანარჩენი სამი ქალის მკვლელობაც.

პროკურორები ამტკიცებდნენ, რომ სკიბიცკი სრულად ჰქონდა გააზრებული მისი ქმედებების შესახებ და ეს ჩადენილი იყო "განზრახ, მიზანმიმართული და რასობრივი მოტივაციით".

მეწყერს ვიეტნამში 11 ადამიანის სიცოცხლე ემსხვერპლა

ვიეტნამის ჩრდილოეთ ნაწილში უხვი ნალექის მოსვლით გამოწვეულ მეწყერს 11 ადამიანის სიცოცხლე ემსხვერპლა. ინფორმაციას ამის შესახებ Reuters-ი ავრცელებს.

სააგენტოს ცნობით, ჩამოწოლილმა მიწის მასამ ავტომობილი მოიყოლა, რომელშიც 16 ადამიანი იჯდა. 11 ადამიანის ცხედარი უკვე ნაპოვნია, ხოლო ხუთს ჯერ კიდევ ეძებენ.

ადგილობრივი ხელისუფლების მტკიცებით, სამაშველო ოპერაცია სტიქიის ზონაში გართულებულია, ვინაიდან უამინდობა ისევ გრძელდება.

ვიეტნამის პრემიერ-მინისტრმა ფან მინ ჩინმა უკვე დაავალა ადგილობრივ ხელისუფლებას და შესაბამის უწყებებს რაც შეიძლება სწრაფად გაუმკლავდნენ სტიქიის შედეგებს და ახალი წყალდიდობებისა და მეწყრებისთვის მოემზადონ.

სტიქიური მოვლენები ვიეტნამში ხშირად ხდება. ყოველწლიურად ტაიფუნებისა და წყალდიდობების შედეგად ასობით ადამიანი იღუპება. ვიეტნამის მთავრობის ცნობით, გასულ წელს სტიქიების შედეგად 389 ადამიანი დაიღუპა, ხოლო 668 - დაშავდა.

სლოვაკეთში მუსიკალურ ფესტივალზე ძლიერი ქარიშხლის შედეგად სულ მცირე 34 ადამიანი დაშავდა

სლოვაკეთში, მუსიკალურ ფესტივალზე ძლიერი ქარიშხლის შედეგად სულ მცირე 34 ადამიანი დაშავდა - ადგილობრივი მედიის ცნობით, შემთხვევა ტრენჩინის აეროდრომზე მოხდა, სადაც ძლიერმა ქარმა ფესტივალისთვის მოწყობილი კარვები დაშალა. 

ცნობილია, რომ კარვების ქვეშ ასზე მეტი ადამიანი იმყოფებოდა, მათგან 34 ამ დროისთვის საავადმყოფოშია გადაყვანილი.

ავიაკატასტროფა პოლონეთში - წვრთნების დროს თვითმფრინავი ჩამოვარდა

ავიაკატასტროფა პოლონეთში - ქალაქ გდინიაში წვრთნების დროს პოლონეთის საჰაერო ძალების კუთვნილი სამხედრო თვითმფრინავი აეროდრომზე ჩამოვარდა. 

არსებული ინფორმაციით, მომხდარის შედეგად მაიორი რობერტ იელი დაიღუპა. ირკვევა, რომ შემთხვევის დროს მან თვითმფრინავიდან კატაპულტირება ვერ მოასწრო.

ამ დროისთვის უცნობია, თუ რა გახდა ინციდენტის გამოწვევის მიზეზი. 

 
 
 
 

პირველად 40 წლის განმავლობაში, რუსული ტელეარხები ოლიმპიურ თამაშებს არ გადასცემენ

პირველად 40 წლის განმავლობაში, რუსული ტელეარხები ოლიმპიურ თამაშებს არ გადასცემენ. ამის შესახებ ინფორმაციას Sports.ru და სხვა გამოცემები ავრცელებენ. 

Sports.ru-ს ინფორმაციით, პოლიტიკური მიზეზების, "ამჟამინდელი რეალობის" გამო,  ფედერალურმა ტელეარხებმა Pervy-მ და Russia-1-მა უარი თქვეს ოლიმპიადის გადაცემაზე. მანამდე,  Комсомольская правда-მ დაწერა, რომ ტელეარხებმა ოლიმპიადის ჩვენება "არასწორად" მიიჩნიეს, ვინაიდან 2024 წლის პარიზის ოლიმპიადაზე რუსეთიდან მონაწილეობის უფლება მხოლოდ 15 სპორტსმენს მისცეს, ნეიტრალური სტატუსით. 

მაუწყებლობის უფლების შესყიდვის თაობაზე მოლაპარაკებებს აწარმოებდნენ Match TV და VK ჰოლდინგი. თუმცა, აპრილში რუსეთში ოლიმპიადის მაუწყებლობის უფლებების მფლობელი,  ტელესპორტის ხელმძღვანელი, პიოტრ მაკარენკო თაღლითობის ბრალდებით დააკავეს. ამასთანავე, მედიის ცნობით, მას შემდეგ, რაც ცნობილი გახდა, რომ ზოგიერთი აღიარებული რუსი სპორტსმენი ოლიმპიადაზე არ გაემგზავრებოდა, ტელეარხებმა შეუსაბამოდ მიიჩნიეს  მილიონდოლარიანი კონტრაქტების გაფორმება. შედეგად, უფლებები არც Match TV-მ და არც VK-მ არ იყიდეს.

რუსეთში ოლიმპიური თამაშები ტელევიზიით, ბოლოს, 40 წლის წინ 1984 წელს, არ აჩვენეს, როდესაც სსრკ-მ მათ ბოიკოტი გამოუცხადა.

შეგახსენებთ, რომ 2024 წლის პარიზის ოლიმპიადაზე რუს და ბელარუს სპორტსმენებს მონაწილეობის უფლება მხოლოდ ნეიტრალური სტატუსით დროშის გარეშე ასპარეზობის შემთხვევაში მისცეს. მათ ასევე აეკრძალათ გახსნის ცერემონიალზე მონაწილეობა. 

ნიგერიაში სკოლის შენობის ჩამონგრევის შედეგად 22 ბავშვი დაიღუპა - დაშავებულია 130-ზე მეტი

ნიგერიაში სკოლის შენობის ჩამონგრევის შედეგად 22 ბავშვი დაიღუპა და 130-ზე მეტი დაშავდა. BBC-ის ცნობით, შემთხვევა ცენტრალური პლატოს შტატის დედაქალაქ ჯოსში, პარასკევს დილით მოხდა, როდესაც მოსწავლეები გამოცდებს წერდნენ. პოლიციის ცნობით, დაშავებულები მკურნალობას საავადმყოფოში აგრძელებენ. ცნობილია, რომ სკოლაში 1000-ზე მეტი ბავშვი სწავლობს.

ადგილობრივმა მცხოვრებმა, აბელ ფუანდაიმ BBC-ს განუცხადა, რომ "ტრაგედიის მასშტაბები საშინელია". ნგრევის მიზეზი, ამ დროისთვის, უცნობია, თუმცა, ადგილობრივების თქმით, ეს სამდღიანი ძლიერი წვიმის შემდეგ მოხდა. 

ნეპალში 2 სამგზავრო ავტობუსი მეწყერმა ჩაიტანა-60-ზე მეტ ადამიანს ეძებენ

ნეპალში, დედაქალაქ კატმანდუდან დაახლოებით 90 კილომეტრის მოშორებით, მდინარეში 60-ზე მეტ ადამიანს ეძებენ. ძლიერი წვიმების შედეგად ჩამოწოლილმა მეწყერმა ორი სამგზავრო ავტობუსი ადიდებულ წყალში ჩაიტანა. 

სამძებრო სამუშაოებს ართულებს წყალდიდობა. 

მედიის ინფორმაციით, შემთხვევას მხოლოდ სამი ადამიანი გადაურჩა. მათ ავტობუსიდან გადახტომა იქამდე მოასწრეს, ვიდრე სატრანსპორტო საშუალება მდინარეში ჩავარდებოდა.

ოფიციალური მონაცემებით, ივნისის შუა რიცხვებიდან მოყოლებული, ძლიერი მუსონური წვიმებით გამოწვეული წყალდიდობებისა და მეწყრების შედეგად ნეპალში 90-ზე მეტი ადამიანი დაიღუპა.