notnews ganivi3 

    თათია გოჩაძე

    თათია გოჩაძე

    ინფექციური პათოლოგიის და შიდსის ცენტრის გენერალური დირექტორი თენგიზ ცერცვაძე "დღის კურიერში" სტუმრობისას აცხადებს, რომ მას შემდეგ, რაც კოვიდინფიცირებულების რიცხვმა საგრძნობლად მოიმატა, გაჩნდა სხვადასხვა სახის პრობლემები.

    "მას შემდეგ, რაც დაიწყო დრამატული ზრდა შემთხვევების, პრობლემებმა იმატა. საქართველო თავის სერიოზულ წარმატებას მკურნალობისა და გარდაცვლილთა დაბალი რიცხვის კუთხით აღწევდა სწორედ კარგი მოვლის ხარჯზე. როდესაც სამედიცინო პერსონალი თავს ევლებოდნენ პაციენტებს, ასეთი საჩივრები არ იყო. ახლა ამან იმატა, ალბათ, ამას აქვს საფუძველი. ჩვენ ვცდილობთ ჩვენი ხელმისაწვდომი რესურსებით, რომ ეს არ დავუშვათ. საფუძველი ერთადერთია - გადატვირთვა და არასაკმარისი რაოდენობა ადამიანების,"- განაცხადა ცერცვაძემ. 

    გიორგი შაქარაშვილის და, ანი შაქარაშვილი, სოციალურ ქსელში ბრალდებულთა ადვოკატებს მიმართავს:

    „ადვოკატები კი არა ცირკის რიჟიკები ხართ და არაფრით ჩამოუვარდებით მკვლელებს თქვენი დადგმული სპექტაკლებით…

    თქვენი შვილი რომ ეცემათ, მდინარეში გადაეგდოთ და ასე სასტიკად მოეკლათ, მაინტერესებს მაშინაც ასეთი ჰუმანურები თუ იქნებოდით საკუთარი შვილის მკვლელების მიმართ და ასე თავგამოდებით თუ დაიცავდით?!“ – წერს ანი შაქარაშვილი მისი ძმის მკვლელობაში ბრალდებულთა ადვოკატების მიმართ.

    ელჩებთან ოპოზიციის შეხვედრას დღეს „პატრიოტთა ალიანსის“ წარმომადგენლები არ დაესწრნენ. როგორც ირმა ინაშვილი საქართველოს პირველ არხთან საუბარში აცხადებს, მას და მის პარტიას გაცხადებული პოზიცია აქვთ, დამოუკიდებლად და ცალკე გაწერილი სტრატეგიით მოქმედებენ. ირმა ინაშვილის განცხადებით, ამ დღეებში პარტიის წარმომადგენლებს ინდივიდუალური შეხვედრები ჰქონდათ როგორც აშშ-ის, ასევე ევროკავშირის ელჩებთან და მათ თავიანთი მოთხოვნების პაკეტი გააცნეს, სადაც გაწერილია, რომ „პატრიოტთა ალიანსი“ ითხოვს ახალ არჩევნებს და ცესკო-ს რეფორმირებას.

    ინაშვილი ამბობს, რომ დღეს შეხვედრაზე მისულმა ოპოზიციურმა პარტიებმა ელჩებს მათი საერთო ხედვების პაკეტი გააცნეს, რომელსაც „პატრიოტთა ალიანსი“ ძირითად ნაწილში (ცესკო-ს რეფორმირება და ახალი არჩევნების დანიშვნა) ეთანხმება. თუმცა, როგორც ინაშვილი აცხადებს, ამ ეტაპზე პარტია დიპლომატებთან შეხვედრას ინდივიდუალურ რეჟიმში ამჯობინებს. მისივე თქმით, ელჩებთან დიალოგის მესამე რაუნდს აუცილებლად დაესწრება.

    ელჩებთან ოპოზიციის დღევანდელ შეხვედრას არც „ლეიბორისტული პარტიის“ წარმომადგენლები დაესწრნენ.

    ჯანმრთელობის დაცვისა და სოციალურ საკითხთა კომიტეტის თავმჯდომარე, დიმიტრი ხუნდაძე მიიჩნევს, რომ არსებული გამოწვევების ფონზე ქართული ჯანდაცვის სისტემა თავისი შესაძლებლობების მაქსიმუმს აკეთებს და ოპოზიციის გარკვეული ჯგუფების მხრიდან წარმოებული კამპანია, რომელიც ჯანდაცვის მინისტრის და კონკრეტული კლინიკების დისკრედიტაციას ემსახურება, მიუღებელი და სახიფათოა.

    „კოვიდ-19 ვირუსის გავრცელების მეორე ტალღა უკვე რეალობად იქცა და საკმაოდ მაღალია ინფიცირების დადასტურებული შემთხვევების მაჩვენებლები, როგორც საქართველოში, ასევე მთელი მსოფლიოს მასშტაბით. სირთულეები არსებობს, მაგრამ ვფიქრობ, რომ საქართველოს ჯანდაცვა, თავისი შესაძლებლობების ფარგლებში, მაქსიმუმს აკეთებს. ამ ვითარებაში შესამჩნევია ოპოზიციის და პოლიტიკური ჯგუფების მხრიდან თავდასხმა არა მხოლოდ ჯანდაცვის მინისტრსა და სექტორზე, არამედ კონკრეტულ კლინიკებსა და ექიმებზე. ეს მიუღებელია, რამეთუ ამ რთულ ვითარებაში ბრძოლის წინა ხაზი უკავია ჯანდაცვას.

    ვფიქრობ, ექიმებისა და ჯანდაცვის სისტემის დისკრედიტაცია და საზოგადოებისათვის უსაფუძვლო ინფორმაციების მიწოდება ემსახურება მხოლოდ ვითარების კიდევ უფრო დამძიმებას. მაშინ, როდესაც ასეთი მძიმე გამოწვევის წინაშე დგას მთელი მსოფლიო და მათ შორის საქართველო, ვფიქრობ, გამარჯვების უპირობო შემადგენელი არის სტაბილურობა.

    დესტაბილიზაცია, რასაც გარკვეული პოლიტიკური ჯგუფები ცდილობენ, ძალიან სახიფათოა და ეს ხიფათი შესაძლოა, თითოეული მოქალაქის ჯანმრთელობაზე აისახოს“, - განაცხადა დიმიტრი ხუნდაძემ.

    მესამე რაუნდს უახლოეს ორ დღეში ველოდებით, - ამის შესახებ დიპლომატიური კორპუსის წარმომადგენლებთან ოპოზიციის შეხვედრის შემდეგ „ლელო საქართველოსთვის“ ლიდერმა, მამუკა ხაზარაძემ განაცხადა.

    „როგორც გუშინ განვაცხადე, დადგა დრო, რომ ეს მოლაპარაკებები გავასაჯაროოთ და ამომრჩეველმა იცოდეს, რაზე მიმდინარეობს საუბარი. დღეს ჩვენ მოვიტანეთ წინადადებათა პაკეტი, რომელიც გადავეცით დიპლომატებს. ძირითადი კომპონენტი - რიგგარეშე არჩევნები - არ შეცვლილა, მაგრამ არის უამრავი სხვა საკითხიც ამ პაკეტში. ფასილიტატორებმა გვთხოვეს დრო, რათა მივიღოთ ხელისუფლებისგან ჩამოყალიბებული პასუხი ამ პაკეტზე. იმედია, ამის შემდეგ შეჯერდება პოზიციები. მესამე რაუნდს უახლოეს ორ დღეში ველოდებით. თუ არ იქნება რიგგარეშე არჩევნები, თუ არ შეიცვალა ფუნდამენტურად საარჩევნო კოდექსი და ცესკოს შემადგენლობა, ბუნებრივია, შეთანხმება ვერ შედგება", - განაცხადა ხაზარაძემ.

    დღევანდელი შეხვედრა ელჩებთან იყო ძალიან მნიშვნელოვანი, ვინაიდან ოპოზიციამ კიდევ ერთხელ დააფიქსირა საკუთარი შეჯერებული და ერთიანი პოზიცია და ეს მოხდა ძალიან დეტალურად გაწერილი, დოკუმენტური ფორმით. ყველა ის მოთხოვნა, რაც არსებობდა, ჩვენი ხედვა, როგორ უნდა განიმუხტოს კრიზისი და როგორ უნდა წავიდეს ქვეყანა წინ, ჩამოყალიბებული, დეტალური, წერილობითი პოზიციის სახით გადავეცით ელჩებს, - განაცხადა „ევროპული საქართველოს“ ლიდერმა, დავით ბაქრაძემ აშშ-ის ელჩის მოადგილის რეზიდენციაში შეხვედრის დასრულების შემდეგ.

    „ჩვენი თხოვნა იყო, რომ მათ, როგორც ფასილიტატორებმა, ეს პოზიცია ოფიციალურად მიაწოდონ „ქართულ ოცნებას“ და ველოდებით ასეთივე ოფიციალურ, დოკუმენტურ პასუხს „ქართული ოცნებისგან“.

    კონკრეტულად ვერ გეტყვით, რას მოიცავდა ეს მოთხოვნები, ვინაიდან ჩვენი მეგობრების, ფასილიტატორების თხოვნაა, რომ ვიდრე „ქართული ოცნებისგან“ არ იქნება ოფიციალური პასუხი, შეთავაზების დეტალებზე არ ვისაუბროთ, თუმცა, შემიძლია გითხრათ, რომ შეთავაზება შესაბამისობაშია იმ პრინციპებთან, რასაც აქამდეც აყალიბებდა ოპოზიცია“ - განაცხადა დავით ბაქრაძემ.

    პოლიციელებზე თავდასხმაში ბრალდებულ ასლან ვაშაყმაძეს ფოთის საქალაქო სასამართლომ, დღეს ონლაინ რეჟიმში გამართულ სხდომაზე აღმკვეთი ღონისძიების სახით 2-თვიანი პატიმრობა შეუფარდა.

    ბრალდებულის ადვოკატი, გიორგი გოგინავა აცხადებს, რომ მისი დაცვის ქვეშ მყოფმა გავრცელებულ ვიდეომიმართვასთან დაკავშირებით ბოდიში მოიხადა, ხოლო ბრალდების მხარის მიერ წაყენებულ ბრალდებას პოლიციელზე თავდასხმის შესახებ არ ეთანხმება და თვლის, რომ ამ ბრალდების უსაფუძვლობის დადასტურებას მტკიცებულებების შეგროვებით შეძლებს.

    დაცვის მხარე სასამართლოსგან აღკვეთის ღონისძიების სახედ გირაოს გამოყენებაზე შუამდგომლობდა და მზად იყო, გირაოს სახით უძრავი ქონება წარედგინა.

    შეგახსენებთ, რომ ოქრუაშვილის თანაპარტიელმა, ასლან ვაშაყმაძემ რამოდენიმე დღის წინ პირად სოციალურ გვერდზე ვიდეომიმართვა გაავრცელა, რომელიც პოლიციელებზე ძალადობრივი ზემოქმედების მოწოდებას შეიცავდა.  

    "რუსთავი2"

    გორში, ფარნავაზის ქუჩაზე მდებარე თონე ხვალიდან პურს, ლობიანს და ნაზუქს უფასოდ გასცემს.

    პროდუქციის უფასოდ გაცემა ორი დღე გაგრძელდება.

    თონის მეპატრონემ, ხათუნა ჯაფარიძემ აღნიშნული გადაწყვეტილება პანდემიის გამო მიიღო.  

    „ხვალ 5 დეკემბერს დილის 10:00 საათიდან ფარნსვაზის #26 (ყოფილი ძნელაძის ქუჩა) არსებულ თონეში გაიცემა პური, ლობიანი ნიგვზით და უგემრიელესი ნაზუქი. თქვენ გეპატიჟებათ დიდი სიყვარულით ხათო. ეს ყველაფერი გაიცემა უფასოდ“- წერს ხათუნა ჯაფარიძე.

    " პრაიმტაიმი"

    „მესამე რაუნდი ჯერ არ არის გადაწყვეტილი“, - ამის შესახებ „ქართული ოცნების“ ერთ-ერთმა ლიდერმა მამუკა მდინარაძემ განაცხადა.

    მამუკა მდინარაძე იმედოვნებს, რომ ოპოზიციაშიც საღი აზრი გაიმარჯვებს, გარკვეული შეთანხმება შედგება და ისინი პარლამენტში შევლენ.

    „რაც შეეხება წითელ ხაზებს, ნამდვილად არ მჯერა, რომ ოპოზიციის წარმომადგენლებს სიტყვა კომპრომისის, ან კონსენსუსის მნიშვნელობა არ აქვთ გააზრებული, ან არ იციან. როდესაც ვამბობთ კვირების განმავლობაში უკვე, რომ შეუძლებელია, „ქართულმა ოცნებამ“ უღალატოს თავის ამომრჩეველს და მილიონამდე ჩვენი ამომრჩევლის ნების საწინააღმდეგოდ გადადგას მოლაპარაკების დროს ისეთი ნაბიჯი, რომელიც ამომრჩევლის ნებას და მის გადაწყვეტილებას ეწინააღმდეგება. ამიტომ, რა თქმა უნდა, წითელი ხაზია რიგგარეშე თუ ვადამდელი არჩევნები, ეს ჩვენი მხრიდან არც განიხილება და ამის შესახებ ზუსტი ინფორმაცია აქვთ ჩვენს ოპონენტებს. მაგრამ დანარჩენ საკითხზე ჩვენ არაერთხელ ვთქვით, რომ ნებისმიერ საკითხზე ვისაუბრებთ. გადაწყვეტილებასთან დაკავშირებით, წინასწარ, რაიმე კონკრეტულ ხელშესახებ კომენტარს ვერ გავაკეთებ, რადგან აქამდე ჯერ სხვადასხვა ვერსია დევს მაგიდაზე. გადაწყვეტილების შემდეგ ნებისმიერ დეტალზე ვისაუბროთ“, - განაცხადა მამუკა მდინარაძემ.

    შინაგან საქმეთა სამინისტროს საზოგადოებრივი უსაფრთხოების მართვის ცენტრ „112“-ში ჯანდაცვის მინისტრთან ერთად ჩატარებული შეხვედრის შემდეგ ვახტანგ გომელაურმა მედიის კითხვებს უპასუხა. როგორც შინაგან საქმეთა მინისტრმა აღნიშნა, კოვიდსიტუაციიდან გამომდინარე უფრო მეტი მოქალაქე რეკავს 112-ში, შესაბამისად 112-ში ოპერატორების რაოდენობა გასამაგებულია და იგეგმება მათი რიცხვის გაზრდა.

    “დღეს გავეცანით, რა პრობლემებია 112-ის მიმართულებით. იცით, რომ ზარებზე მომლოდინე რეჟიმი გაიზარდა, სწრაფი ტესტების დაწყებიდან, ორი დღის წინ რაც დავიწყეთ სწრაფი ტესტები, უფრო მეტი მოქალაქე რეკავს და მოლოდინის რეჟიმი ავიდა 7 წუთზე, 5 წუთზე ან 6 წუთზე. არის შემთხვევები, როცა უფრო მეტია ოჯახის ექიმთან დაკავშირების ლოდინი. რაც შეეხება რას ვაკეთებთ, გვინდა, რომ უფრო გავამარტივოთ. ჩვენ გვაქვს ურთიერთობა, როგორც სასწრაფო-სამედიცინო მიმართულებით, ასევე ოჯახის ექიმის მიმართულებით. გვინდა, რომ დავამატოთ მეტი ოპერატორები. დღეს ოპერატორების ოდენობა დაახლებით გასამმაგებულია, რაც იყო ჩვეულებრივ რეჟიმში, გასამმაგებულ რეჟიმში მუშაობენ ოპერატორები. დღეს 300 ოპერატორი მუშაობს 24 საათის განმავლობაში თითქმის, 140-150 ოპერატორს კიდევ დავამატებთ უახლოეს ერთ კვირაში, მაქსიმუმ 10 დღეში, რა თქმა უნდა, ეს ზარები შემცირდება და უფრო მეტი ოპერატორი მოემსახურება ჩვენს მოქალაქეებს“, - განაცხადა ვახტანგ გომელაურმა.

    Please publish modules in offcanvas position.