პრეზიდენტი ზურაბიშვილი შეხვდა თბილისში მყოფ ლატვიის, ესტონეთის, ისლანდიისა და ლიეტუვის საგარეო საქმეთა მინისტრებს: ბაიბა ბრაჟე, მარგუს ცაჰკნა, თორდის კოლბრუნ რეიკფიორდ გილფადოტირი და გაბრიელიუს ლანდსბერგისი ეწვევიან.

მისი განცხადებით, საქართველოს ევროპული მომავლისთვის უმნიშვნელოვანესი სიგნალია დღეს მათი აქ ყოფნა და მხარდაჭერა, რისთვისაც პრეზიდენტმა მინისტრებს მადლობა გადაუხადა.

"დღეს ვისაუბრეთ იმის შესახებ, თუ რა მძიმე არის ის წერტილი დასმული, რაც დაისვა გუშინ გუშინდელი გადაწყვეტილებით, 84 ადამიანის მიერ კენჭისყრით. მძიმე წერტილი იმ ხელისუფლების განაცხადისთვის, რომელსაც ჰქონდა განაცხადი, რომ ევროპულ გზაზე მივდიოდით. ეს არის წერტილი რომელიც აჩვენებს რომ ხელისუფლებას არ მოისმინა არც თავისი ხალხის ხმა, არც თავისი მეგობრების რჩევები, არც არავის გაფრთხილება და თავის გზას შეუდგა, ეს არის გზა, მცდელობა ყოველ შემთხვევაში, რომ საქართველო რომელიც იდგა მყარად შუა გზაზე კანდიდატის სტატუსის მიღების შემდეგ და გაწევრიანების მოლაპარაკებების გახსნის მოლოდინში, რომ ამ შუა გზიდან, ამ ძალიან სერიოზული გზიდან გადაყვანილი ყოფილიყო და დაბრუნებული ყოფილიყო წარსულში. ეს მცდელობა და ეს არის მცდელობა, რომელსაც ხალხმა, საქართველოს საზოგადოებამ უპასუხა 30 დღის, პრაქტიკულად, ყოველდღიური გამოსვლებით და თავისი პოზიციის დაფიქსირებით", - თქვა ზურაბიშვილმა.

მისი თქმით, ეს აჩვენებს, რომ კვლევებში არსებული ციფრები, რომ უმრავლესობა მხარს უჭერს ევროპულ მომავალს, არაა მხოლოდ ციფრები და რომ ეს საზოგადოება ნამდვილად დგას იმ ღირებულებებზე, რომლებიც ევროპული ღირებულებებია.

"მე ძალიან გარკვეულად ჩვენი მეგობარი ქვეყნების წარმომადგენლებს ავუხსენი, რომ არავითარ შემთხვევაში მე ჩემი ვეტოს დადებით არ შევიდოდი ყალბ, ხელოვნურ, მატყუარ მოლაპარაკებებში, არა და არასოდეს, იმიტომ, რომ მე არ ვუღალატებ იმ სულისკვეთებას, რომელიც არის დღეს ამ ქვეყანაში და რომელსაც სჭირდება, რომ გზა გაეხსნას, მე ვიქნები ამ გზის გამხსნელი და არა ამ გზიდან გადასვლის ერთ-ერთი ფორმა", - თქვა ზურაბიშვილმა.

ლატვიის, ლიეტუვის, ესტონეთისა და ისლანდიის საგარეო საქმეთა მინისტრები: ბაიბა ბრაჟე, გაბრიელიუს ლანდსბერგისი, მარგუს ცაჰკნა და თორდის კოლბრუნ რეიკფიორდ გილფადოტირი საქართველოში არიან. 

ფოტო სოციალურ ქსელში ესტონეთის საგარეო საქმეთა მინისტრმამ მარგუს ცაჰკნამ გაავრცელა. 

"რთულ დროს, შეგიძლიათ თქვენი მეგობრების იმედი გქონდეთ" - წერს ის.

მინისტრები დღეს შეხვდებიან პრეზიდენტ სალომე ზურაბიშვილს, რის შემდეგაც განცხადებებს გააკეთებენ.

ცნობისთვის, 14 მაისს მასშტაბური პროტესტისა და საერთაშორისო კრიტიკის მიუხედავად პარლამენტმტა მესამე მოსმენით მიიღო რუსული კანონი. გადაწყვეტილებას კიდევ ერთხელ მოჰყვა კრიტიკული განცხადებები პარტნიორების მხრიდან.

რაც შეეხება ინცინდენტებს, გამოძება არის დაწყებული, მათ შორის, პერსონალური გამოძიება, მთელ რიგ საქმეებთან დაკავშირებით, - ამის შესახებ საქართველოს პრემიერ-მინისტრმა ირაკლი კობახიძემ, მთავრობის ადმინისტრაციაში გამართულ პრესკონფერენციაზე, დავით ქაცარავასთან დაკავშირებით დასმული შეკითხვის საპასუხოდ განაცხადა.

პრემიერის თქმით, საერთაშორისო სტანდარტების მიხედვით, სამართალდამცავებს აქვთ ნიღბების ტარების უფლება, თუმცა ამის უფლება არ უნდა ჰქონდეთ მომიტინგეებს.

„რაც შეეხება ინცინდენტებს, გამოძება არის დაწყებული, მათ შორის, პერსონალური გამოძიება, მთელ რიგ საქმეებთან დაკავშირებით. ეს გამოძიება, ბუნებრივია, გრძელდება. რაც შეეხება ჩართულობას, სამართალდამცავები წყვეტენ ამას სტანდარტების მიხედვით, აგრძელებს თუ არა შესაბამისი პირი მონაწილეობას შესაბამის მოქმედებებში. რაც შეეხება ნიღბებს, ნიღბების ტარება სამართალდამცავების მიერ ეს არის საერთაშორისო სტანდარტი. საინტერესო ის არის, რომ ნიღბების არ ტარება მომიტინგეების მხრიდან არის ასევე ფართოდ გავრცელებული ევროპაში, ამერიკაში. ძალიან ბევრი ქვეყნის კანონმდებლობით, მომიტინგეების მიერ ნიღბების ტარება სისხლის სამართლებრივად ისჯება. წესით, სამართალდამცავებს აქვთ ნიღბების ტარების უფლება, საერთაშორისო სტანდარტების მიხედვით, თუმცა ამის უფლება არ უნდა ჰქონდეთ მომიტინგეებს, თუმცა, აქაც, საქართველოში მოქმედებს ევროპულზე და ამერიკულზე მაღალი სტანდარტი.

პოლიციელები დღესაც უნიღბოდ გამოდიან, მაგრამ, როდესაც გამოდის სპეცრაზმი, აქ არის სტანდარტი. ეს ჩვეულებრივი მოვლენაა და არის ევროპული და ამერიკული სტანდარტი. თავისი მიზეზი და ახსნა აქვს ამ ყველაფერს. ამოცნობადი არ უნდა იყოს სამართალდამცავი ორგანოს წარმომადგენელი. უსაფრთხოების მოსაზრებიდან გამომდინარე“, - განაცხადა პრემიერმა.

საქართველოს პრეზიდენტმა სალომე ზურაბიშვილმა CNN-თან ინტერვიუში ქვეყანაში მიმდინარე მოვლენებისა და მოახლოვებული არჩევნების შესახებ ისაუბრა.

"საქართველოს მოსახლეობამ უკვე ბევრი ტესტი ჩააბარა და ბევრი წინააღმდეგობა გასწია. ეს ძალიან მშვიდობიანი დემონსტრაციაა. ჩვენთან არჩევნებია და მე ვიქნები პროევროპული ფრონტის ლიდერი ამ არჩევნებზე, რომელიც იქნება ერთგვარი რეფერენდუმი. ამას გავაკეთებ არა უშუალო ჩართვით არჩევნებში, არამედ როგორც პროდასავლური, პროევროპული ფრონტის გარანტორი პოლიტიკური პარტიებისთვის და სამოქალაქო საზოგადოებისთვის. ძალიან მნიშვნელოვანია ის, რომ ჩვენ გვყავს ძალიან მოწიფული სამოქალაქო საზოგადოება, ძალიან მოწიფული ახალგაზრდები, რომლებიც უკვე მესამე კვირაა მართავენ დემონსტრაციებს ერთი ფანჯრის გატეხის ან მანქანის დაწვის გარეშე. და ეს იქნება ბევრისმეტყველი სხვა ქვეყნებისთვისაც, თუ რაოდენ მოწიფულია საქართველოს მოსახლეობა და რაოდენ მიზანმიმართულია თავისი ევროპული გზის შესანარჩუნებლად

ეს კრიტიკული [მომენტია] საქართველოსთვის, რადგან თქვენ იცით, რომ საქართველომ გასული წლის დეკემბერში მიიღო კანდიდატის სტატუსი და წლის ბოლომდე გაწევრების შესახებ მოლაპარაკებების გახსნისკენ გზაზე იყო. ეს შუა წერტილია, ვინაიდან არსებობს ახალი ზეწოლა, რუსული კანონის ხელახლა წარდგენა. ეს სხვა არაფერია, თუ არა რუსული კანონი. გარდა ამისა, ხდება სხვა კანონების წარდგენაც, რომლებიც ძალიან შემაშფოთებელია, რადგან ევროკომისიის რეკომენდაციებსა და ზოგადად ევროპულ გზას გვაშორებს", - თქვა პრეზიდენტმა.

პარტია „მოქალაქეების“ საპარლამენტო ბოიკოტს აცხადებს - ამის შესახებ პარტიის თავმჯდომარემ ალეკო ელისაშვილმა სოციალურ ქსელში დაწერა.

მანამდე საპარლამენტო საქმიანობის შეწყვეტის შესახებ განაცხადეს „ნაციონალურმა მოძრაობამ“, „ლელომ“, „სტრატეგია აღმაშენებელმა“.

ბოიკოტს არ უერთდება პარტია „გახარია საქართველოსთვის“. მისი წარმომადგენლები აცხადებენ, რომ ყველა პოლიტიკურ ბერკეტს გამოიყენებენ.

რუსთაველზე მიმდინარე აქციაზე სიტყვით გამოსვლისას გერმანიის ბუნდესთაგის საგარეო საქმეთა კომიტეტის თავმჯდომარემ მიხაილ როთმა ახალგაზრდებს სიტყვით მიმართა:

„ჩვენ ყველანი ვამაყობთ თქვენით. თქვენი ბრძოლა, ჩვენი ბრძოლაა. თქვენ შეგიძლიათ, უფრო მეტს ელოდოთ ჩვენგან, ვიდრე მხოლოდ საუბარია. გთხოვთ, ძვირფასო ქართველებო, ქართული კოშმარის მხარდაჭერებო, მოუსმინეთ ახალგაზრდა თაობას. მე ვიცი, რომ თქვენი გული სავსეა ბრაზით, მაგრამ გთხოვთ, მე დავესესხები მიშელ ობამას და ვიტყვი, თუ ისინი მიდიან დაბლა, ჩვენ ავდივართ ზემოთ. არ დაიჯეროთ ტყუილები და კონსპირაციული თეორიები.

ჩვენ არ ვართ რადიკალები. თქვენ არ ხართ რადიკალები, თქვენ ჩვეულებრივი ევროპელები ხართ, რადგან თქვენ იბრძვით იმისთვის, რაც არის ევროპა რეალურად. დემოკრატია, თავისუფლება. მე გესაუბრებით თქვენ, რადგან თქვენ გაქვთ შესაძლებლობა, თქვენი მთავრობის წარმომადგენლებს შეხვდეთ. ჩვენ აქ ვართ მხოლოდ იმისთვის, რომ სოლიდარობა გამოგიცხადოთ, ჩვენ ასევე ვართ იმისთვის, რომ მოვუსმინოთ ერთმანეთს.

ჩვენი მესიჯი ამ მთავრობისთვის და მმართველი პარტიისთვის არის ძალიან ნათელი – შეაჩერეთ ეს კანონი. ჩვენ წარმოვადგენთ სხვადასხვა პარტიას, თაობებს, რწმენას, თუმცა ჩვენ ყველანი ერთიანი ვართ როგორც ქართველი ხალხის მეგობრები და მოკავშირეები. ეს არის ზუსტად ის, რატომაც უნდა გთხოვოთ, რომ არ დანებდეთ. გჯეროდეთ თქვენი იდეების სიძლიერის, რადგან ამაყი ევროპელები წარსულში ანგრევდნენ კედლებს, მათ გადალახეს სიძულვილი და ბრაზი, რადგან მათ სჯერათ თავისუფლების და დემოკრატიის. თქვენ ყველანი გვამხნევებთ ევროპაში. გთხოვთ, დარჩით მტკიცედ და ერთიანად. მე ვამაყობ თქვენით“

კატეგორიულად მიუღებელია ასეთი ტიპის ინციდენტები და კიდევ ერთხელ ყველას მოვუწოდებ მოთმინებისკენ, - ამის შესახებ საქართველოს პრემიერ-მინისტრმა ირაკლი კობახიძემ მთავრობის ადმინისტრაციაში გამართულ ბრიფინგზე დავით ქაცარავას ცემასთან დაკავშირებით დასმული კითხვის საპასუხოდ განაცხადა.

მთავრობის მეთაურმა აღნიშნა, რომ ადგილი ჰქონდა შეურაცხყოფის და გინების ფაქტს, თუმცა ეს გამართლება არ არის და სამართალდამცავი სტრუქტურების წარმომადგენლებს მაქსიმალური მოთმინება მართებთ.

ჟურნალისტის კითხვას, ხომ არ იყო რუსეთის დაკვეთა დავით ქაცარავას ცემა, ვინაიდან ის რუსეთს აღიზიანებს, პრემიერმა უპასუხა, რომ არ ფიქრობს, რომ ქაცარავა რუსეთში ვინმეს აღიზიანებს.

„არ მგონია, რომ რუსეთს საერთოდ აღიზიანებდეს დავით ქაცარავა. თუ ვინმე აწყობდა პროვოკაციებს, რომელიც ეწინააღმდეგებოდა ჩვენს ინტერესებს, ე.წ საზღვართან, გამყოფ ხაზთან, ეს იყო სწორედ დავით ქაცარავა. ძალიან მალე მას შემდეგ, რაც რუსეთმა განახორციელა ჩვენი ტერიტორიების ოკუპაცია, დავით ქაცარავა წავიდა რუსეთში, სადაც მონაწილეობდა ფილმებში, მათ შორის ასრულებდა FSB-ს აგენტის როლს რუსეთის ფედერაციაში და უცბად შემდეგ გახდა ანტირუსი. ამ ყველაფრის გათვალისწინებით, არ მგონია, რომ ქაცარავა აღიზიანებდეს ვინმეს რუსეთში. რაც შეეხება ამ ფაქტს, კატეგორიულად მიუღებელია ასეთი ტიპის ინციდენტები და კიდევ ერთხელ ყველას მოვუწოდებ მოთმინებისკენ. ამ შემთხვევაში იყო შეურაცხყოფის ფაქტი, გინების ფაქტი. ეს არ არის გამართლება, ამას არ ვამბობ, მაგრამ როდესაც არის თუნდაც შეურაცხყოფა და ძალადობა, სამართალდამცავი სტრუქტურების წარმომადგენლებს მართებთ მაქსიმალური მოთმინება. ეს არის კიდევ ერთხელ ჩემი მოწოდება“, - განაცხადა ირაკლი კობახიძემ.

ჩვეულებრივი მოვლენაა, როდესაც ოპოზიციის მხარდამჭერები, ან ოპოზიციის დღის წესრიგს მიმყოლი ადამიანები გამოდიან ქუჩაში, ეს არის პოლიტიკური უმცირესობის უფლება, მათ შეუძლიათ ამის გაკეთება, ეს არის დემოკრატიის შემადგენელი ნაწილი, მაგრამ გადაწყვეტილებებს დემოკრატიულ სისტემაში იღებს პოლიტიკური უმრავლესობა, - ამის შესახებ საქართველოს პრემიერ-მინისტრმა, ირაკლი კობახიძემ დღევანდელ პრესკონფერენციაზე განაცხადა. 

როგორც პრემიერ-მინისტრმა აღნიშნა, საქართველოში არსებობს პოლიტიკური ოპოზიცია ეს არის დემოკრატიის ნაწილი და პოლიტიკურ ოპოზიციას ჰყავს საკუთარი მხარდამჭერები, ეს არის მთლიანობაში პოლიტიკური უმცირესობა.

„როდესაც პოლიტიკური ოპოზიცია თავის მხარდამჭერებს არწმუნებს, რაღაცაში და შემდეგ ისინი გამოდიან ქუჩაში, ეს არის აბსოლუტურად ნორმალური და ჯანსაღი მოვლენა, მაგრამ პოლიტიკური უმცირესობა ვერავითარ შემთხვევაში ვერ აიძულებს პოლიტიკურ უმრავლესობას, რომ მიიღოს ან არ მიიღოს ისეთი გადაწყვეტილება, რომელიც ემსახურება საქართველოს სახელმწიფო ინტერესების განმტკიცებას. ეს გადაწყვეტილებები მიიღება პოლიტიკური უმრავლესობის მიერ. რაც შეეხება რაოდენობას, ყველამ ნახეთ, რომ ჩვენს აქციაზე იყო დაახლოებით 5-ჯერ მეტი გამოსული, ვიდრე ოპოზიციის აქციაზე, ეს არის ის თანაფარდობა, რაც არსებობს მაგალითად, „ქართულ ოცნებასა“ და კოლექტიურ „ნაცმოძრაობას“ შორის. რაც არის თანაფარდობა, ის თანაფარდობა იხილა საზოგადოებამ აქციებზეც, რომლებიც გაიმართა ერთი უმრავლესობისა და მეორე პოლიტიკური უმცირესობის ორგანიზებით. აქედან გამომდინარე, რა თქმა უნდა, ჩვეულებრივი მოვლენაა, როდესაც ოპოზიციის მხარდამჭერები, ან ოპოზიციის დღის წესრიგს მიმყოლი ადამიანები გამოდიან ქუჩაში, ეს არის პოლიტიკური უმცირესობის უფლება, მათ შეუძლიათ ამის გაკეთება, ეს არის დემოკრატიის შემადგენელი ნაწილი, მაგრამ გადაწყვეტილებებს დემოკრატიულ სისტემაში იღებს პოლიტიკური უმრავლესობა. 

როდესაც უშუალოდ კანონპროექტს მხარს უჭერს მოსახლეობის 60 პროცენტზე მეტი, გამჭვირვალობას მხარს უჭერს 80 პროცენტზე მეტი, უშუალოდ ამ კანონს მხარს უჭერს მოსახლეობის 60 პროცენტზე მეტი, ასეთ დროს პარლამენტი, რომელიც ამ ხალხის მიერ არის არჩეული, ვალდებულია, იმოქმედოს სწორედ უმრავლესობის რაციონალური ნების შესაბამისად და არა პოლიტიკური უმცირესობის ჩემი აზრია, ირაციონალური განწყობის მიხედვით. შესაბამისად, აქ ყველაფერი არის დღესავით ნათელი, დემოკრატიაა, დემოკრატიაში ყველას აქვს პროტესტის უფლება, მაგრამ გადაწყვეტილებები მიიღება იმ წესით, რომელიც არის დადგენილი დემოკრატიულ სისტემაში“, - განაცხადა პრემიერ-მინისტრმა.

კიდევ ერთხელ ვადასტურებ, რომ ჩვენ გვაქვს სრული მზაობა, ვიზრუნოთ აშშ-სა და საქართველოს შორის ორმხრივი ურთიერთობების გაღრმავებისთვის, რაც პირადად დავუდასტურე ო'ბრაიენსაც, - ამის შესახებ საქართველოს პრემიერ-მინისტრმა ირაკლი კობახიძემ, მტავრობის ადმინისტრაციაში გამართულ პრესკონფერენციაზე განაცხადა.

მთავრობის მეთაურის თქმით, შედგა გულწრფელი საუბარი ყველა საკითხთან დაკავშირებით, რაც ეხება საქართველოსა და აშშ-ს ორმხრივ ურთიერთობებს.

ჩვენ გვქონდა საკმაოდ ხანგრძლივი შეხვედრა ბატონ ო'ბრაიენთან. გაგრძელდა ორ საათნახევარი, როცა ერთიო საათი იყო დაგეგმილი. იყო ძალიან გულწრფელი შეხვედრა. ჩვენ გულწრფელად ვისაუბრეთ ყველა საკითხთან დაკავშირებით, რომელიც ეხება საქართველოსა და აშშ-ს ორმხრივ ურთიერთობებს. მათ შორის, გვქონდა გულწრფელი საუბარი იმ პროცესებთან დაკავშირებით, რომელიც წარიმართა ჩვენს ქვეყანაში გასული სამი წლის მანძილზე. ჩვენ ავუხსენით, განვუმარტეთ ყველაფერი ბატონ ო'ბრაიენს. ჩვენ ასევე კიდევ ერთხელ დავადასტურეთ ჩვენი სურვილი და მზაობა, მაქსიმალურად ვიზრუნოთ ორმხრივი ურთიერთობების გაღრმავებაზე. ეს არის სურვილი, მთავარია, რომ მეორე მხრიდანაც მივიღოთ სათანადო დამოკიდებულება, სამართლიანი დამოკიდებულება. ეს არის ჩვენთვის მნიშვნელოვანი. თუ იქნება ასეთი დამოკიდებულება, ასეთ შემთხვევაში აუცილებლად მივაღწევთ წარმატებებს ორმხრივი ურთიერთობების განვითარების გზაზე.

ჩვენ გვქონდა საუბარი მათ შორის უშუალოდ კანონზე „უცხოური გავლენის გამჭვირვალობის შესახებ“. ჩვენ განვუმარტეთ ყველა დეტალი ბატონ ო'ბრაიენს, რაც დაკავშირებულია ამ კანონთან. თუ იქნება რაიმე შენიშვნები, ვართ მზად დისკუსიისთვის, ეს მზაობა ბატონ ო'ბრაიენსაც დავუდასტურე. აქედან გამომდინარე, მე მგონია, რომ ძალიან ბევრი რამ გახდა ცხადი ჩვენი პარტნიორისთვის, იმ ყველაფერთან დაკავშირებით, რაც ხდება ჩვენი ქვეყნის გარშემო, რაც ხდებოდა ამ ორმხრივ ურთიერთობებში გასული სამი წლის მანძილზე. კიდევ ერთხელ ვადასტურებ, რომ ჩვენ გვაქვს სრული მზაობა, ვიზრუნოთ ორმხრივი ურთიერთობების გაღრმავებისთვის, რაც პირადად დავუდასტურე ო'ბრაიენსაც“, - განაცხადა პრემიერმა.

დღევანდელი დღე არის უმნიშვნელოვანესი ჩვენი ქვეყნის დამოუკიდებლობის და სუვერენიტეტის განმტკიცების თვალსაზრისით. „უცხოური გავლენის გამჭვირვალობის შესახებ“ კანონის მიღება ქმნის მტკიცე გარანტიებს საქართველოში გრძელვადიანი მშვიდობისა და სიმშვიდის უზრუნველსაყოფად და ე.წ. პოლარიზაციის დასაძლევად, რაც საქართველოს ევროკავშირში ინტეგრაციის აუცილებელი პირობაა, - ამის შესახებ პრემიერ-მინისტრმა ირაკლი კობახიძემ მთავრობის ადმინისტრაციაში გამართულ ბრიფინგზე განაცხადა.

მისივე თქმით, სოციოლოგიური კვლევის თანახმად, არასამთავრობო ორგანიზაციების გამჭვირვალობას მხარს უჭერს საქართველოს მოსახლეობის 80 %-ზე მეტი, ხოლო უშუალოდ კანონს „უცხოური გავლენის გამჭვირვალობის შესახებ“, მოსახლეობის 60%-ზე მეტი უჭერს მხარს.

„ეს კანონი ითვალისწინებს ერთადერთ რამეს - უცხოური ძალის ინტერესების გამტარებელი ორგანიზაციების მიწე ყოველწლიური ფინანსური დეკლარაციების წარდგენას. შეუძლებელია, გამჭვირვალობის წინააღმდეგი იყოს ვინმე, ვისაც წაკითხული აქვს ეს კანონი და გააზრებული აქვს, რომ გამჭვირვალობა ერთ-ერთი საკვანძო ევროპული ღირებულებაა.

მადლობა მინდა გადავუხადო მმართველი გუნდის თითოეულ წევრს, განსაკუთრებით, საპარლამენტო უმრავლესობის წევრებს საქართველოს ეროვნული ინტერესები ერთგულებისთვის. კიდევ ერთხელ მინდა გადავუხადო მადლობა შინაგან საქმეთა სამინისტროს, პოლიციელებს, რომლებიც მიტინგებზე ძალადობასა და სხვა კანონსაწინააღმდეგო ქმედებებს არსებითად ევროპულზე და ამერიკულზე მაღალი სტანდარტით პასუხობდნენ. კიდევ ერთხელ მოვუწოდებ მომიტინგეებს, თავი შეიკავონ ძალადობისა და სხვა კანონსაწინააღმდეგო ქმედებებისგან, ასევე კიდევ ერთხელ ვთხოვ სამართალდამცველებს, ძალადობასა და შეურაცხყოფას მაქსიმალური მოთმინებით უპასუხონ,“- აღნიშნა პრემიერმა.

ირაკლი კობახიძის განცხადებით, ხელისუფლება მომავალშიც ყველაფერს გააკეთებს საქართველოს ეროვნული ინტერესების დასაცავად.

„საქართველო არის თავისუფალი, დამოუკიდებელი, სუვერენული და ღირსეული სახელმწიფო. ჩვენ მომავალშიც ვიმოქმედებთ უმაღლესი პასუხისმგებლობით ჩვენი სახელმწიფოსა და ხალხის წინაშე და გავაკეთებთ ყველაფერს საქართველოს ეროვნული ინტერესების დასაცავად. ევროკავშირში გაწევრიანება მხოლოდ ღირსებით და სუვერენიტეტით არის შესაძლებელიც და ფასეულიც, რაც საქართველოს მოქალაქეების უმრავლესობას ძალიან კარგად აქვს გააზრებული.

მადლობა ქართველ ხალხს, რადგანაც სწორედ ქართველი ხალხის მხარდაჭერამ მოგვცა გასულ წლებში რევოლუციის ორი მცდელობის თავიდან აცილების, მშვიდობის შენარჩუნებისა და ევროკავშირის წევრობის კანდიდატის სტატუსის მიღების შესაძლებლობა. „უცხოური გავლენის გამჭვირვალობის შესახებ“ კანონის მირების შესაძლებლობაც, სწორედ, ქართველი ხალხის მხარდაჭერამ მოგვცა. დარწმუნებული ვარ, ქართველი ხალხის მხარდაჭერით ,მომავალშიც დიდ წარმატებებს მივაღწევთ და 2030 წლისთვის საქართველო აუცილებლად გახდება ევროკავშირის სრულუფლებიანი წევრი,“- აღნიშნა პრემიერ-მინისტრმა.

ევროპისა და ევრაზიის საკითხებში აშშ-ის სახელმწიფო მდივნის თანაშემწემ, ჯიმ ო’ბრაიენმა მედიასთან შეხვედრაზე ქვეყანაში მიმდინარე მოვლენებზე ისაუბრა:

,,ასეთი საკითხების რეგულირებაში საქართველო უნდა იყოს შესაბამისობაში ევროკავშირთან მიმართებაში. აღნიშნული კანონი უნდა იყოს საერთაშორისო ორგანიზაციების წესებთან და სტანდარტებთან თანხვედრაში. ჩვენ ძალიან კარგად ვხედავთ რომ ეს არის ის გზა რაც ქართველი ხალხის უმრავლესობას სურს და მზად ვართ ამ მისწრაფებას მხარი დავუჭიროთ. შესაბამისად დღევანდელი საუბრების შედეგად თუ მოხდება ამ კანონის ისე შეცვლა, რომ ევროკავშირის სტანდარტებთან მოხდეს დაახლოება, ეს ჩვენს ურთიერთობას უფრო გააძლიერებს. რაც შეეხება კონსპირაციის თეორიებს და გლობალური ომის პარტიას, ჩემი აზრით ეს არის მცდარი და არასწორი აღქმა საერთაშორისო საზოგადოების ერთგულებისა საქართველოს მიმართ. ჩვენ გქონდა საუბრები კანონთან დაკავშირებით და შეხვედრები პრემიერთანაც, ჩვენ გვინდოდა შეხვედრა ივანიშვილთანაც, თუმცა პრემიერმა კობახიძემ განგვიცხადა რომ ის იმყოფება სანქციების ქვეშ. მინდა გითხრათ რომ შეერთებული შტატებისგან ივანიშვილი სანქციების ქვეშ არ იმყოფება. ძალიან სამწუხაროა რომ ეს ნიშნავს იმას რომ პირადი ინტერესი მას, ასეთ გავლენიან ადამიანს დაყენებული აქვს ქვეყნის ინტერესზე მაღლა. 
თუკი გაგრძელდება გამოსვლები მნიშვნელოვანია რომ ეს დემონსტრაციები იყოს მშვიდობიანი და პოლიციაც იყოს მშვიდობიანი და არ იყოს თავდასხმები აქციის წევრების მიმართ, რაც ვრცელდებოდა ბოლო დღეების განმავლობაში. 
თუკი ამერიკის და დასავლეთის წინააღმდეგ მსგავსი რიტორიკა გაგრძელდება ეს იქნება ძალიან სახიფათო ჩვენ მომავალ ურთიერთობებში.  მაგალითისთვის 390 მილიონი დოლარი, რომელიც გამოჰყო ამერიკამ, მათ შორის, სამხედრო დახმარების მიმართულებით , ეს დახმარება კითხვის ქვეშ დადგება თუ მსგავსი დამოკიდებულება იქნება და დარჩება ისე ეს კანონი რომ არ იყოს შესაბამისობაში ევროკავშირთან. იქნება შეზღუდვები გადაადგილებასთან და ფინანსებთან დაკავშირებით. „