რაღაცის არგამორიცხვა არ ნიშნავს ამის გაკეთებას, - განაცხადა საფრანგეთის პრეზიდენტმა უკრაინაში დასავლური ჯარების გაგზავნის შესაძლებლობასთან დაკავშირებით დასმული კითხვის საპასუხოდ.

27 თებერვალს, მაკრონმა განაცხადა, რომ მომავალში უკრაინაში დასავლური ჯარების გაგზავნა არ უნდა გამოირიცხოს.

"დღეს მშვიდობის მიღწევის ერთადერთი გზა თავდამსხმელის შეჩერებაა. ის, ვინც თავს დაესხა, უნდა დათანხმდეს იარაღის დადებას", - აღნიშნა საფრანგეთის პრეზიდენტმა.

უნგრეთის პრემიერ-მინისტრი ვიქტორ ორბანი აშშ-ის ექსპრეზიდენტ დონალდ ტრამპს შეხვდა. ამის შესახებ NBC News-ი იტყობინება.

შეხვედრა ფლორიდაში, ტრამპის მარ-ა-ლაგოს რეზიდენციაში გაიმართა.

ტრამპის წინასაარჩევნო შტაბის ინფორმაციით, შეხვედრაზე განხილული იყო საკითხების ფართო წრე, რომლებიც უნგრეთსა და აშშ-ს ეხება, მათ შორის ძლიერი და დაცული საზღვრების აუცილებლობა ქვეყნების სუვერენიტეტის დასაცავად.

Warner Bros-ის ხელმძღვანელი პამელა აბდი აცხადებს, რომ კომპანია მოხარული იქნებოდა ფილმ „ბარბის“ გაგრძელება გადაეღო, ვინაიდან ფილმმა „მსოფლიოში დიდი აუდიტორია მოიპოვა“. ამის შესახებ BBC იტყობინება.

გრეტა გერვიგის მიერ გადაღებული ფილმის შემოსავალმა 1,4 მილიარდ დოლარს გადააჭარბა, რის შედეგადაც „ბარბი“ 2023 წლის ყველაზე წარმატებული ფილმი გახდა.

პამელა აბდის თქმით, ფილმმა უამრავი რეკორდი დაამყარა და ორი მხარე საუბრობს „ბარბის“ შესაძლო გაგრძელებაზე, თუმცა საბოლოო გადაწყვეტილება გრეტა გერვიგმა უნდა მიიღოს.

ათენში განათლების კანონპროექტის წინააღმდეგ გამართული მსვლელობის დროს პოლიციასა და დემონსტრანტებს შორის შეტაკება მოხდა.

ბერძენმა სტუდენტებმა პოლიციას ე.წ. მოლოტოვის კოქტეილები ესროლეს, სამართალდამცველებმა კი ცრემლმდენი გაზი გამოიყენეს.

ათასობით სტუდენტი უკვე რამდენიმე კვირაა, აპროტესტებს განათლების ახალ რეფორმას, რომელიც, მათი თქმით, გააუფასურებს საჯარო უნივერსიტეტების ხარისხს და უცხოურ კერძო უნივერსიტეტებს ქვეყანაში ფილიალების გახსნის საშუალებას მისცემს.

ღაზის სექტორში ჰუმანიტარული დახმარების ჰაერიდან მიწოდებას 5 ადამიანი ემსხვერპლა, 11 კი დაშავდა. ამის შესახებ CBS News-ი „ჰამასის“ მიერ მართული ჯანდაცვის სამინისტროზე დაყრდნობით იტყობინება.

არსებული ინფორმაციით, ერთ-ერთი პარაშუტი არ გაიხსნა, რის გამოც ტვირთი ადამიანებს დაეცა.

8 მარტს აშშ-მა, იორდანიამ, ეგვიპტემ, საფრანგეთმა, ნიდერლანდებმა და ბელგიამ თვითმფრინავებიდან ღაზის სექტორის მოსახლეობას ჰუმანიტარული დახმარება მიაწოდეს. როგორც CBS-ს პენტაგონში განუცხადეს, წინასწარი მონაცემებით, ამერიკული თვითმფრინავი არაა პასუხისმგებელი ადამიანთა დაღუპვაზე, თუმცა გამოძიება აუცილებლად უნდა გაგრძელდეს.

ინციდენტისგან დისტანცირება მოახდინეს იორდანიის ხელისუფლებაშიც.