... ... hotnews.ge - დაიჯესტი

ელექტრონულ სიგარეტს აკრძალავენ

ბელგიაში ელექტრონულ სიგარეტებსა და ერთჯერად „ვეიპებს“ აკრძალავენ. მათი ყიდვა არც ონლაინ იქნება შესაძლებელი. ადგილობრივი ხელისუფლება შეშფოთებულია „ვეიპინგის“ მზარდი პოპულარობით მოზარდებს შორის, იმის გათვალისწინებით, რომ კვლევებით დადგენილია მისი მავნე შედეგები ადამიანის ჯანმრთელობაზე. აკრძალვა უკვე მომავალი წლიდან - 2025 წლის იანვრიდან შევა ძალაში. მიუხედავად იმისა, რომ ამჟამად არსებული კანონმდებლობით, 18 წლამდე ახალგაზრდებისთვის ელექტროსიგარეტების მიყიდვა აკრძალულია, ის მაინც პოპულარულია მოზარდებში, როგორც ბელგიაში, ისე მის ფარგლებს გარეთაც. მარკეტოლოგები ახალგაზრდებს „ვეიპების“ მრავალფეროვანი გემოებით იზიდავენ, მათ შორის, საზამთროს, მარწყვის, კანფეტებისა და ბამბის ნაყინის გემოთი.

„ვიაგრა“ ალცჰაიმერის რისკებს ამცირებს

ცნობილი ფარმაცევტული საშუალება, რომელსაც ერექციული დისფუნქციის საწინააღმდეგოდ იყენებენ, შესაძლოა, მალე ალცჰაიმერის დაავადების რისკების შესამცირებლადაც გამოიყენონ. მასშტაბური კვლევის შედეგად დადასტურდა, რომ „ვიაგრა“ ნერვულ უჯრედებში იმ ცილების შენარჩუნებას უწყობს ხელს, რომლებიც ალცჰაიმერის განვითარებას ეწინააღმდეგებიან. კვლევებით აქამდეც დადასტურდა, რომ ფოსფოდიესტრაზას ფერმენტი (PDE) დემენციაზე პასუხისმგებელ ნეიროდეგენერაციებს ბლოკავს. ეს გასაკვირი არც უნდა იყოს, რადგან ცნობილია, რომ PDE ნეიროპლასტიურობაზე ახდენს გავლენას. ცხოველებზე ჩატარებულმა კვლევებით გაირკვა, რომ ყველაფერი ეს კოგნიტური ჯანმრთელობისა და მეხსიერების გაუმჯობესებაზე დადებითად მოქმედებს. ამჯერად, ამერიკელმა სწავლულებმა ალცჰაიმერით დაავადებული პაციენტებისგან ამოღებულ ღეროვან უჯრედებზე ექსპერიმენტი ჩაატარეს. მათ „ვიაგრას“ შემადგენლობით მკურნალობდნენ. ხუთი დღის შემდეგ, დადებითი შედეგები უკვე შესამჩნევი იყო, რამაც კიდევ ერთხელ დაადასტურა, რომ შესაძლოა, „ვიაგრა“ მართლაც იცავდეს ალცჰაიმერის განვითარებისგან.

საგრადა ფამილია ორ წელში დასრულდება

ბარსელონას სიმბოლოდ ქცეული ანტონიო გაუდის ქმნილება - საგრადა ფამილია, რომელიც 140 წელზე მეტი ხანია შენდება, 2026 წელს დასრულდება. ამ ეტაპზე, ტაძრის მეექვსე, ცენტრალური კოშკის მშენებლობა მიმდინარეობს, რომელსაც ორ წელიწადში დაასრულებენ. ამის შემდეგ, ტაძარი დასრულებულ პროექტად ჩაითვლება. საგრადას კოშკი, რომლის მშენებლობაც დღემდე გრძელდება, იესო ქრისტეს გამოხატავს. ის 172.5 მეტრი სიმაღლის იქნება და 17-მეტრიანი ჯვრის დადგმით დასრულდება. მშენებლობის დასრულების შემდეგ, საგრადა ფამილია მსოფლიოში უმაღლესი ტაძრის სტატუსს მოიპოვებს. კატალონიელი არქიტექტორი გაუდი ტაძარს 1882 წლიდან, 40 წლის განმავლობაში აშენებდა. მისი გარდაცვალებისას, პროექტის მეოთხედიც კი არ იყო დასრულებული. 1984 წელს, იუნესკო-მ საგრადა მსოფლიო მემკვიდრეობის სიაში შეიყვანა, 2010 წლიდან, პაპ ბენედიქტე XVI გადაწყვეტილებით, ტაძარში საეკლესიო მსახურებაც მიმდინარეობს.

საფირმო ჰამბურგერი ლამაზად გამელოტებისთვის

ბრაზილიური „ბურგერ კინგის“ თანამშრომლებმა გადაწყვიტეს, ყველა გააკვირვონ საკუთარი კრეატიულობით და გამელოტებული მამაკაცებისთვის აქცია წამოიწყეს. ლამაზი მელოტი თავისთვის, ისინი საფირმო ბურგერს უფასოდ მიიღებენ. ამის შესახებ კომპანიამ სოციალურ ქსელში განაცხადა. აქცია რამდენიმე დღის წინ დაიწყო და ის თვის ბოლომდე გაგრძელდება. ქვეყნის მცხოვრებლებს შეუძლიათ, ბედი სცადონ და „ბურგერ კინგის“ თანამრომლებს საკუთარი სიმელოტე წარუდგინონ. ყველაზე მიმზიდველად ითვლება გამელოტება, რომელიც შუბლიდან იწყება, ორივე მხარეს თანაბრად მიდის და თავის ზედა ნაწილში მთავრდება. პოსტი თავისი წესებით, აქციის დაწყებიდან ორიოდე დღეში, უკვე ორ მილიონზე მეტმა ადამიანმა ნახა და გააზიარა.

კორეელები ქვებს „იშინაურებენ“

გასული საუკუნის 70-იან წლებში, აშშ-ში, „შინაური“ ქვები პოპულარული სახუმარო საჩუქარი იყო. ამჯერად, ეს ტენდენცია ბრუნდება, თუმცა უკვე აზიაში, სადაც ქვებს ჩუქნიან და თავადაც იძებენ სერიოზული განზრახვით. ის მარტოობასთან გამკლავების ერთ-ერთი მეთოდი ხდება. 33 წლის ქალბატონი კუ ა-იონი აცხადებს, რომ სამსახურში შექმნილ სირთულეებზე ვერავის უყვებოდა. არ სურდა, ამის გამო, მეგობრებისა და ოჯახის წევრების შეწუხება. ვერც ოთხფეხა მეგობრის აყვანა გადაწყვიტა, მაღალი პასუხისმგებლოს გამო, ამიტომ მან ქვა „მოიშინაურა“ და მას უზიარებს საკუთარ ფიქრებსა და განცდებს, თანაც ჯიბით დააქვს სეირნობის დროს, თუ სპორტდარბაზში ვარჯიშისას. „ასე გაცილებით მშვიდად ვარ“, - აცხადებს კორეელი ქალბატონი. ახალგაზრდები არა მხოლოდ ელაპარაკებიან „შინაურ“ ქვებს, მას ალამაზებენ კიდეც - მასზე ხატავენ ან პაწაწუნა კომბინეზონებს აცმევენ. კორეულ ინტერნეტ-მაღაზიებში, კარგი „შინაური“ ქვა, დაახლოებით, 9 დოლარად იყიდება. ქვების ბუმი კორეაში კორონავირუსის პანდემიის „წყალობით“ დაიწყო. მისი პოპულარობა, ასევე, უკავშირდება იმ ადამიანების რიცხვის ზრდას, რომლებიც სიმარტოვეში ცხოვრობენ. სტატისტიკის მიხედვით, 19-დან 39 წლამდე კორეელების 3.1% მარტოხელები არიან, რომლებიც ჩაკეტილად ცხოვრობენ.

ნაყინის დღე ევროპაში

ცოტა ხნის წინ ევროკავშირის ქვეყნებმა ნაყინის ევროპული დღე აღნიშნეს. „წლის გემოდ“, ამჯერად, ბელგიური ცივი დესერტი - Gaufre de Liège აღიარეს. ამ დღესასწულის აღნიშვნა 2009 წელს ოფიციალურად დაამტკიცა ევროპარლამენტმა. მისი მიზანი ნაყინისა და ევროპის გასტრონომიული ტრადიციების პოპულარიზაციაა. ფესტივალი იმ ნაყინს ეძღვნება, რომელსაც ხელით ამზადებენ. წლევანდელი „წლის გემოდ“ აღიარებული ბელგიური დესერტი გამოირჩევა ნეიტრალური ბაზით, ვანილისა და დარიჩინის არომატით, მორთულია გახეხილი მარილიანი კარაქითა და ხრაშუნა ვაფლებით. ევროპული ნაყინის დღის ფარგლებში, Gaufre de Liège -ის მირთმევა ყველა კაფეში იყო შესაძლებელი.

საბჭოთა ტანკში ოქრო იპოვა

ბრიტანელმა მამაკაცმა, ინტერნეტის მეშვეობით, საბჭოთა ტანკი Т-55 იყიდა და მასში 5 კილოგრამი ოქრო აღმოაჩინა. 62 წლის ბიზნესმენი ნიკ მიდი სამხედრო ტექნიკის კოლექციას აგროვებს.არსენალში, რომელიც ნორტჰემპტონშირში, მის ფერმაშია განთავსებული, დაახლოებით, 300 ტანკი და სხვა საბრძოლო მანქანა შედის. მსურველებს ის ამ ტექნიკით გასეირნებასაც სთავაზობს, რასაკვირველია, გარკვეული ანაზღაურების საფუძველზე. დაახლოებით, შვიდი წლის წინ, მან ინტერნეტ-აუქციონზე ირანული ტანკი იყოდა, რომელიც საბჭოთა Т-55-ის ბაზაზეა შექმნილი. ნიკმა მასში 30 ათასი გირვანქა სტერლინგი გადაიხადა. ტანკის შესწავლისას, შიგნით 5-კილოგრამიანი ოქროს ზოდები აღმოაჩინა, რომელიც წინა მფლობელმა რატომღაც ვერ შენიშნა. მიდმა არ იცოდა, რა ექნა ამ აღმოჩენისთვის და ოქრო პოლიციაში მიიტანა. სამართალდამცავებმა ზოდები ანალიზისა და შენახვის მიზნით დაიტოვეს. მას შემდეგ, მამაკაცს ის თვალით აღარ უნახავს. ოქრო კი კუვეიტური აღმოჩნდა,გაირკვა, რომ 1991 წლის მოვლენების დროს მოიპარეს და ასე აღმოჩნდა საბრძოლო მანქანაში. ნიკი ნანობს, რომ ნაპოვნი ოქრო პოლიციას ჩააბარა, რადგან ხელცარიელი დარჩა.

ძროხა ინსულინიან რძეს იწველება

სწავლულებმა აშშ-დან და ბრაზილიიდან, გენეტიკურად მოდიფიცირებული ტრანსგენური ძროხა შექმნეს, რომელიც ადამიანის ისნულინის შემცველ რძეს იძლევა. პერსპექტივაში, ასეთ ცხოველებს შეუზლიათ გამოიმუშაონ ადამიანებისთვის საჭირო ნივთიერებების მარაგი. მკვლევარებმა ადამიანის დნმ-ის სპეციფიკური სეგმენტი, რომელიც კოდირებს პროინსულინს, ჩანერგეს ძროხის ათი ემბრიონის უჯრედულ ბირთვში. შემდეგ კი ის ჩვეულებრივი ძროხის საშვილოსნოში მოათავსეს. შედეგად, ბუნებრივი გზით დაიბადა ტრანსგენური ხბო, რომელიც ახლა უკვე რძესაც იძლევა. სპეციალისტებმა ვერ შეძლეს ამ გენმოდიფიცირებული ცხოველის განაყოფიერება, თუმცა მიაჩნიათ, რომ ეს ემბრიონის ჩამოყალიბების მეთოდით იხსნება. საბოლოოდ, სწავლულებმა„აიძულეს“ ძროხა, რძე ექსპერიმენტული ჰორმონალური ინდუქციის გზით მოეცა. მასში აღმოაჩინეს სპეციფიკური ცილები, რომელიც ადამიანის ინსულინის ანალოგიურია.

ბრმებს თვალს აუხელენ

ამერიკელი მეწარმე და პლანეტის უმდიდრესი ადამიანი ილონ მასკი აცხადებს, რომ მისი ნეიროტექნოლოგიური კომპანია Neuralink მუშაობს Blindsight-ის იმპლანტზე, რომელიც ბრმებს დანახვის საშუალებას მისცემს. აღსანიშნავია, რომ ეს იმპლანტი უკვე გამოცდილია მაიმუნებზე. თავდაპირველად მხედველობა დაბალი იქნება, თუმცა საბოლოოდ,  შესაძლოა, გადააჭარბოს ადამიანის ჩვეულებრივ მხედველობას. ერთ-ერთი პრეზენტაციისას, მასკმა ისიც თქვა, რომ მის კომპანიაში სწამთ, თვალს ისეთებსაც აუხელენ, რომლებსაც ეს ბედნიერება არასდროს ჰქონიათ. Neuralink-ი მილიარდერმა 2016 წლის ზაფხულში შექმნა.კომპანია ჩიპების შემუშავებით არის დაკავებული, რომელიც პერსპექტივაში, ადამიანის თავის ტვინში უნდა ჩაინერგოს. მასკი მიიჩნევს, რომ ასეთი ნეიროინტერფეისი ადამიანს კიბორგად გადააქცევს და ხელოვნურ ინტელექტს გაუწევს წინააღმდეგობას.

ვახშამს სტრატოსფეროში სთავაზობენ

დანიის დედაქალაქ კოპენჰაგენში მდებარე რესტორან Alchemist-ის შეფ-მზარეული, რასმუს მუნკი თანამშრომლობს კოსმოსური მოგზაურობის სააგენტო Space VIP-თან და კომპანია Space Perspective-თან, რათა 2025 წლისთვის უნიკალური, „სტრატოსფერული ვახშამი“ მოაწყოს. ხელმისაწვდიმი იქნება მხოლოდ ერთი, ექვსკაციანი სუფრა. ფრენა ექვს საათს გაგრძელდება. სტუმრები ზღის დონიდან 30.5 კილომეტრის სიმაღლეზე აფრინდებიან კოსმოსური ხომალდით „ნეპტუნი“, რომელიც Space Perspective-ის საკუთრებაა. ხომალდის კაფსულა ადის „კოსმოსური ბურთის“ და არა რაკეტის მეშვეობით. სტუმრებს, რომელთაც სპეციალურად მოდის სახლი Ogier-ი გამოაწყობს ინდივიდუალური შეკვეთით შეკერილ სამოსში, შეუძლიათ შეფ-მზარეულის კოსმოსური კერძებით ისიამოვნონ, თან მზის ამოსვლითაც დატკბნენ. ამ უნიკალური ვახშმის ღირებულება, ერთ ადამიანზე 495 ათას დოლარს შეადგენს. ღონისძიებიდან მირებული შემოსავალი კი გადაირიცხება კოსმოსური პრემიის ფონდში, რომელიც მეცნიერებასა და ტექნოლოგიებში გენდერული თანასწორობის დანერგვით არის დაკავებული.

ლონდონში Uber-ის მძღოლები კომპანიისგან £250 მილიონის კომპენსაციას მოითხოვენ

ლონდონში 10 000-ზე მეტი მძღოლი Uber-ს სასამართლოში უჩივის და კომპენსაციის სახით £250 მილიონს ითხოვს. მიზეზი Uber-ის ლიცენზირებაა, რომელიც, მძღოლების თქმით, კომპანიამ არალეგალური გზებით მოიპოვა.

სარჩელის ავტორები აღნიშნავენ, რომ სასამართლო საქმის მოგების შემთხვევაში, თითოეული მძღოლის მიერ მიღებული კომპენსაცია, შესაძლოა, £25 000 იყოს. უცხოური მედიის ცნობით, მომჩივანი მხარე ამტკიცებს, რომ ლონდონის სატრანსპორტო კომპანიამ (TfL) Uber-ს კერძო დაქირავების ოპერატორის ლიცენზია შეცდომით მიანიჭა, რადგან კომპანიის ბიზნესმოდელი გამჭვირვალე არ არის. მათი ინფორმაციით, Uber-მა TfL-ი შეცდომაში შეიყვანა და უთხრა, რომ კომპანიის გავლით შეკვეთილ თითოეულ მგზავრობაზე პასუხისმგებლობას თავად იღებდა მაშინ, როცა, რეალურად, კომპანია ჯავშნებს ინდივიდუალურ მძღოლებს აძლევდა, რაც ლონდონის სატრანსპორტო კანონის თანახმად, არალეგალურია.

აღსანიშნავია, რომ მსგავსი სარჩელი Uber-ის წინააღმდეგ მსოფლიოს სხვა ქვეყნებშიც, მათ შორის ავსტრალიაშიც შეიტანეს, სადაც 8 000 მძღოლი კომპანიისგან $178 მილიონის კომპენსაციას მიიღებს.

ლუვრი „მონა ლიზას“ სარდაფში გადატანას აპირებს

ლუვრის ხელმძღვანელობა ლეონარდო და ვინჩის „მონა ლიზას“ სარდაფში, სპეციალურ ოთახი გადატანას აპირებს. ამის შესახებ The Telegraph-ი წერს.

გამოცემის ინფორმაციით, ლუვრის დირექტორმა ლოურენს დე კარმა ეს ინიციატივა მუზეუმის დამთვალიერებლების უკმაყოფილების შესამცირებლად წამოაყენა.

თებერვალში სერვისმა CouponBirds მუზეუმების საიტებზე დამთვალიერებლების 18 ათასი შეფასება შეისწავლა და „მონა ლიზას“ „მსოფლიოში ყველაზე იმედგამაცრუებელი შედევრი“ უწოდა.

ყოველწლიურად ლუვრს დაახლოებით 9 მილიონი ადამიანი სტუმრობს, აქედან 80%-ს და ვინჩის საკულტო ტილოს ნახვა სურს. თუმცა ტყვიაგაუმტარი შუშის უკან მოთავსებული „ჯოკონდათი“ ტკბობისთვის თითოეულ მათგანს საშუალოდ 50 წამი აქვს, მანამდე კი გრძელ რიგში დგომა უწევთ.

მუზეუმის ხელმძღვანელობა შექმნილი ვითარებით შეშფოთებულია.

„მიგვაჩნია, რომ ჩვენს საქმეს სათანადოდ ვერ ვასრულებთ, იმიტომ რომ მნახველებს ნამდვილად კარგად ვერ ვიღებთ. „მონა ლიზას“ გადატანამ სხვა ოთახში შესაძლოა ბოლო მოუღოს საზოგადოების იმედგაცრუებას“, - აცხადებს დე კარი. აღსანიშნავია, რომ ახალი ოთახი მუზეუმის რეკონსტრუქციის ფარგლებში მოეწყობა, რომლის საერთო ღირებულება დაახლოებით 500 მილიონ ევროს შეადგენს.