notnews ganivi3 

    თათია გოჩაძე

    საქართველოს პრეზიდენტი, სალომე ზურაბიშვილი ნატო-რუსეთის საბჭოს სხდომის დასრულების შემდეგ ნატოს გენერალური მდივნის, იენს სტოლტენბერგის მიერ გაკეთებულ განცხადებას მიესალმება.

    „იენს სტოლტენბერგმა დღეს მნიშვნელოვანი განცხადება გააკეთა. ამ რთულ გეოპოლიტიკურ დროში ჩვენ ვხედავთ, რომ საქართველოს თავისი პარტნიორების იმედი შეუძლია, ჰქონდეს, რომ ისინი გააგრძელებენ ჩვენი სუვერენიტეტისა და ტერიტორიული მთლიანობის მხარდაჭერას“, - დაწერა სალომე ზურაბიშვილმა Twitter-ზე.

    ცნობისთვის, ნატოს გენერალურმა მდივანმა, იენს სტოლტენბერგმა ნატო-რუსეთის საბჭოს სხდომის დასრულების შემდეგ გამართულ პრესკონფერენციაზე განაცხადა, რომ ნატო კომპრომისზე არ წავა ისეთ საკითხთან დაკავშირებით, როგორიცაა თითოეული ქვეყნის უფლება, თავად აირჩიოს საკუთარი გზა.

    „ნატო-რუსეთის საბჭოს სხდომაზე მოკავშირეებმა რუსეთს მოუწოდეს, საქართველოდან, უკრაინიდან და მოლდოვიდან თავისი ძალები გაიყვანოს და პატივი სცეს საქართველოს, უკრაინისა და მოლდოვას ტერიტორიულ მთლიანობას“, - აღნიშნა იენს სტოლტენბერგმა.

    1-ლი დეკემბრიდან საქართველოში ე.წ. მწვანე პასპორტის სისტემა ამოქმედდა. შედეგად, მომხმარებელს მხოლოდ „მწვანე სტატუსის“ ქონის შემთხვევაში შეუძლია, ესტუმროს რესტორნებს, კაფეებს და სხვადასხვა კვების ობიექტებს. გამომდინარე იქიდან, რომ ქვეყანაში მოსახლეობის დიდი ნაწილი კოვიდგადატანილი ან აცრილი არ არის, საინტერესოა, როგორ აისახა ეს შეზღუდვა სარესტორნო ბიზნესზე და რა პრობლემების წინაშე დადგა ეს სფერო. ამასთან დაკავშირებით, „ვერსია“ „რესტორატორთა ასოციაციის“ თავმჯდომარეს შოთა ბურჯანაძეს ესაუბრა.

    ინტერვიუ წაიკითხეთ აქ...

     რუსეთთან მოლაპარაკებები არ იყო მარტივი, მაგრამ შედგა აზრთა სერიოზული და პირდაპირი გაცვლა-გამოცვლა უკრაინასთან დაკავშირებით, განაცხადა ნატოს გენერალურმა მდივანმა იენს სტოლტენბერგმა რუსეთ-ნატოს საბჭოს სხდომის შემდეგ გამართულ პრესკონფერენციაზე.

    12 იანვარს ბრიუსელში გამართული შეხვედრა რუსეთ-ნატოს საბჭოს პირველი სხდომაა 2019 წლის შემდეგ. მოლაპარაკებებზე დაგეგმილი იყო რუსეთის მიერ „უსაფრთხოების გარანტიების“ თაობაზე ახლახან წამოყენებული მოთხოვნების განხილვა.

    მოსკოვი უპირველეს ყოვლისა მოითხოვს, რომ არ მოხდეს ნატოს შემდგომი გაფართოება აღმოსავლეთით, რათა ორგანიზაციამ არ მიიღოს საკუთარ რიგებში ყოფილი საბჭოთა რესპუბლიკები, პირველ რიგში - უკრაინა და საქართველო. სხდომის შემდეგ იენს სტოლტენბერგმა სიმართლესთან აბსოლუტურად შეუსაბამო უწოდა მტკიცებულებას, რომ ჩრდილოატლანტიკური კავშირის გაფართოება აგრესიული ნაბიჯია.

    „ნატოს წევრები მზად არიან რუსეთთან დიალოგისთვის, მაგრამ კომპრომისზე არ წავლენ საკუთარ საკვანძო პრინციპებთან, ევროპის ყოველი ცალკეული ქვეყნის სუვერენიტეტთან და ტერიტორიულ მთლიანობასთან მიმართებით.

    ნატოს მოკავშირეებმა დღეს რუსეთს მოუწოდეს, გაიყვანოს თავისი ჯარები საქართველოდან, მოლდოვიდან და უკრაინიდან:

    "რუსეთს არა აქვს ვეტოს უფლება გადაწყვეტილებაზე, მიღებულ უნდა იქნეს თუ არა უკრაინა ნატოში“ - განაცხადა სტოლტენბერგმა. სტოლტენბერგმა კვლავ გაიმეორა, რომ უარყოფს მოსკოვის მოთხოვნას, კიევს უარი ეთქვას ნატოში გაწევრიანების პერსპექტივაზე. შეკითხვაზე, აპირებს თუ არა ნატო აღმოსავლეთ ევროპის ქვეყნების გაძლიერებას რუსეთის მხრიდან ძალის გამოყენების შემთხვევაში, სტოლტენბერგმა განაცხადა, რომ დასავლელი მოკავშირეები შეისწავლიან ამ საკითხს. ასევე, ნატოს გენერალური მდივნის თქმით, ჩრდილოატლანტიკური კავშირი მზადაა მოსკოვთან შემდგომი მოლაპარაკებებისთვის, მათ შორის ისეთ საკითხებზე, როგორებიცაა შეიარაღება და რაკეტების განთავსება.

    რუსეთმა ამ წინადადებებზე პასუხისთვის დამატებითი დრო ითხოვა, თქვა ნატოს ხელმძღვანელმა. ოთხშაბათის კონსულტაციები 4 საათს გაგრძელდა. სტოლტენბერგის გარდა მასში მონაწილეობდნენ ალიანსის 30 წევრი ქვეყნის მუდმივი წარმომადგენლები და აშშ-ის სახელმწიფო მდივნის პირველი მოადგილე უენდი შერმანი. რუსეთის დელეგაციას მეთაურობდნენ საგარეო საქმეთა მინისტრის მოადგილე ალექსანდრ გლუშკო და თავდაცვის მინისტრის მოადგილე ალექსანდრ ფომინი. რუსეთ-ნატოს საბჭოს სხდომა მეორე შეხვედრა იყო მოლაპარაკებების სერიაში, რომელიც ეხება მოსკოვის მიერ უსაფრთხოების გარანტიების მოთხოვნას. პირველი განხილვა რუსეთის საგარეო საქმეთა სამინისტროსა და აშშ-ის სახელმწიფო დეპარტამენტის დელეგაციებს შორის გაიმართა ჟენევაში 9-10 იანვარს.

    მესამე შეხვედრა 13 იანვარს შედგება ეუთოს ფარგლებში. ორშაბათს, ჟენევაში მოლაპარაკებების შემდეგ, რუსეთის დელეგაციის ხელმძღვანელმა, საგარეო საქმეთა მინისტრის მოადგილე სერგეი რიაბკოვმა გაიმეორა, რომ რუსეთი ეწინააღმდეგება აღმოსავლეთის მიმართულებით ნატოს გაფართოებას. მისი სიტყვებით, მოსკოვი არ ენდობა ნატოს და მოითხოვს „რკინა-ბეტონის, იურიდიულად ღირებულ გარანტიებს“.

    წყარო: "რადიო თავისუფლება"

    გიორგი გახარიას პარტია "საქართველოსთვის" და "ნაციონალური მოძრაობის" პოლიტიკური გარიგების შედეგად, ჩხოროწყუს საკრებულომ თავმჯდომარის კიდევ ერთი ოპოზიციონერი მოადგილე აირჩია.

    თანამდებობა გახარიას პარტიის წევრმა დავით შენგელიამ დაიკავა - სხდომას "ქართული ოცნების" წარმომადგენლები არ დაესწრნენ.

     

    საგარეჯოს რაიონის სოფელ იორმუღანლოში 14 წლის გოგოს გატაცების საქმეზე გამოძიება სსკ-ს 143-ე თავისუფლების უკანონო აღკვეთის მუხლით დაიწყო. შსს-ს განცხადებით, საქმეში ჩართულია სახელმწიფო ზრუნვის სააგენტო, სოციალური მუშაკი.

    მედიის ინფორმაციით 14 წლის გოგო 23 დღეა, მეზობელ სოფელში, გამტაცებელი კაცის ბებიასთანაა.

    გოგოს ბებია და მამიდა ყვებიან, რომ ბავშვს სამი წლის განმავლობაში ემუქრებოდნენ გატაცებით და 11 წლის ასაკში იძულებით დანიშნეს. მათივე ინფორმაციით, გოგო ხუთმა პირმა გაიტაცა.

    ასევე, ბოლო დროს მომხდარი ინფორმაციის მიხედვით, კასპში სოფელ ფერმაში 15-16 წლის მოზარდები, სავარაუდოდ, დანიშნეს. კადრები, სადაც, სავარაუდოდ, ნიშნობა ჩანს, სოციალურ ქსელ "ტიკ-ტოკზე" გავრცელდა.

    ვიდეოში ჩანს, როგორ უკეთებს არასრულწლოვანი ბიჭი მეცხრე კლასელ გოგოს ხელზე ბეჭედს. ადგილობრივები და ოჯახის ახლობლები ამ ფაქტს უარყოფენ და აცხადებენ, რომ მსგავსი რამ არ მომხდარა.

    მოზარდი გოგოს ბაბუა, რომელიც ასევე სოფელ ფერმის საჯარო სკოლის დირექტორია, ამბობს, რომ ეს ნიშნობა არ ყოფილა, გოგონას დაბადების დღე ჰქონდა და ბეჭედი საჩუქარია.

    "არაფერი ქორწილი არ ყოფილა, ცრუ ინფორმაციაა. ბავშვი ოჯახშია, სახლშია, ყველანი თავის ოჯახებში არიან და ყველაფერი ტყუილია. ვიღაცამ ვიღაცას საჩუქარი რომ მიუტანოს, ეგ რამეს ნიშნავს? ჩვენთან დაბადების დღეებს ეგრე იხდიან ხოლმე, მაგრამ ჩვენ ხომ ვიცით, რომ 18 წლის ზევით არის ქორწინება და არა 18 წლამდე," - ამბობს მოზარდის ბაბუა, სოფელ ფერმის საჯარო სკოლის დირექტორი შახალ ისმაილოვი.

    შინაგან საქმეთა სამინისტროს საკითხის შესწავლა დაწყებული აქვს. პროცესებში ჩართულია ჯანდაცვის სამინისტროს სოციალური სამსახური და განათლების სამინისტროს რესურს ცენტრი.

    აღნიშნულ საკითხებთან დაკავშირებით ქალთა უფლებების დაცვის არასამთავრობო ორგანიზაცია „საფარის“ დამფუძნებელ ბაია პატარაიას ვესაუბრეთ. ის ამბობს, რომ აღნიშნულ ორ სოფელში ძალიან ხშირია არასრულწლოვანთა იძულებით ქორწინება:

    „სამწუხაროდ, ამ დრომდე არ გვქონია საშუალება, რომ ბავშვს შევხვედროდით იმის მიუხედავად, რომ წერილობითი სახით მოვითხოვეთ. ჩვენ ვართ ბებიის მხრიდან წარმომადგენლები, მაგრამ შინაგან საქმეთა სამინისტრო ძალიან პასიურობს, ჯანდაცვის სამინისტროსაც მივწერეთ. გაუგებარია, ამდენი ხნის განმავლობაში რატომ იწელება ეს პროცესი, თუ ბავშვი მოძალადესთან არ იმყოფება და უსაფრთხოდ არის, მაშინ რატომ არ ორგანიზდება ჩვენი და ბებიის მასთან მიყვანა? რამდენადაც ვიცით, ზოგ ნათესავს ამ ეტაზპზე აკრძალული აქვთ ბავშვთან კომუნიკაცია, სავარაუდოდ - მშობლებსაც, რადგან გარიგებით ქორწინებაში მშობლები იყვნენ ჩართულნი. ბებიას არ აქვს სამართლებრივად შეზღუდული თავისი შვილიშვილის ნახვა. ჩვენ არ გვაქვს ინფორმაცია, სად იმყოფება არასრულწლოვანი. იორმუღანლო, ადამიანების იძულებითი გათხოვების თვალსაზრისით, ნამდვილად ერთ-ერთი პრობლემური სოფელია“ - აცხადებს ბაია პატარაია.

    ინტერვიუ სრულად წაიკითხეთ აქ...

     ბათუმის საქალაქო სასამართლომ პატიმრობაში დატოვა 2021 წლის 8 ოქტომბერს კორპუსის ჩამონგრევის საქმეზე დაკავებული სამი პირი.

    მამა-შვილ სურმანიძეების და ბინის მფლობელი ზაურ ბუდაგოვის ადვოკატები 5 ათასი ლარის გირაოს სანაცვლოდ მათ გათავისუფლებას ითხოვდნენ. ბრალდებულები თავს დამნაშავედ არ ცნობენ. სამივე მათგანს ბათუმის საქალაქო სასამართლომ პატიმრობა გასული წლის 11 ოქტომბერს შეუფარდა. გამოძიება მათ სისხლის სამართლის სხვადასხვა მუხლებით სამშენებლო ან სხვა სამუშაოს წარმოებისას უსაფრთხოების წესის დარღვევას და გაუფრთხილებლობას ედავება, რამაც ადამინის სიცოცხლის მოსპობა გამოიწვია.

    ბრალის დადასტურების შემთხვევაში მამა-შვილს 3-დან 5 წლამდე პატიმრობა ემუქრებათ. ზაურ ბუდაგოვს კი- 5 წლამდე პატიმრობა. გამოძიების ვერსიით, ზაურ ბუდაგოვი7 -სართულიანი კორპუსის პირველ სართულზე, თავის კუთვნილ ფართში ნებართვის გარეშე აწარმოებდა სამუშაოებს. მისმა დაქირავებულმა მუშებმა მამა-შვილმა სურმანიძეებმა სარემონტო სამუშაოების წარმოების დროს მზიდი კედელი მოშალეს, რაც სამხარაულის სახელობის ექსპერტიზის ბიუროს დასკვნით, კორპუსის ჩამონგრევის მიზეზი გახდა. ბრალდების მხარე ექსპერტიზის ამ დასკვნას მთავარ მტკიცებულებად მიიჩნევს. საქმის პროკურორის თქმით, საქმეში არსებული დაკავებულების ჩვენებებიდან ირკვევა რომ:

    „[2021 წლის] 8 ოქტომბერს დილით ბინის კარი ვერ გახსნეს, შემდეგ მიტანილი რკინის დანადგარით მზიდი კედლების გამაგრება სცადეს, 10 წუთის შემდეგ დატოვეს საცხოვრებელი სახლი და 2 წუთში მოხდა კორპუსის ნგრევა“.

    ბრალდებულების ადვოკატები დამოუკიდებელი ექსპერტის დასკვნას ითხოვენ, ასევე იმის დადგენას, იმოქმედა თუ არა სახლის ნაწილის ჩამონგრევაზე სხვა ფაქტორებმა, ქუჩის სარეაბილიტაციო სამუშაოებმა, კორპუსზე წლების წინ 2 სართულის დაშენებამ და ჩამონგრეულ სადარბაზოსთან ლიფტის კონტრუქციის მიდგმამ. დაკავებული მამა-შვილის ნათესავები დღეს სასამართლოს შენობასთან აქციას მართავდნენ და აცხადებდნენ, რომ სურმანიძეები სამუშაოს შესრულებლები იყვნენ და მათი პასუხისმგებლობის საკითხი არ უნდა დადგეს. სასამართლო პროცესს ესწრებოდნენ ნგრევის შედეგად დაღუპულების ოჯახის წევრები. ბათუმში, 26 მაისის ქუჩაზე, 7-სართულიანი სახლის სადარბაზო 2021 წლის 8 ოქტომბერს, მოულოდნელად ჩამოინგრა. ნანგრევებში 9 ადამიანი მოჰყვა, მათგან ერთი გადარჩა, დაღუპულებს შორის იყო 3 ბავშვი.

    საახალწლო დღეებში დამწვრობის ცენტრმა 30-მდე პაციენტი მიიღო, წინა წლებთან შედარებით მომართვიანობა შემცირებულია, თუმცა სხვადასხვა კლინიკას არაერთმა დაზარალებულმა მიმართა – პრობლემაზე, რომელიც წლებია, საქართველოში გადაუჭრელად იქცა, „ვერსია“ დამწვრობის ცენტრის ხელმძღვანელს, გუგა ქაშიბაძეს დაუკავშირდა.

    გთავაზობთ ინტერვიუდან ამონარიდს:

    -როგორ უნდა გამოვიყენოთ ფოიერვერკი და რა უნდა გავაკეთოთ, თუ აფეთქების შედეგად მივიღეთ დაზიანება?

    -ჩემი აზრით, საერთოდ არ უნდა გამოვიყენოთ. ეს არ არის უსაფრთხო, რაც არ უნდა იყოს დაცული, გარკვეული ხიფათის შემცველია. ეს არ არის სათამაშო და გასართობი, რომელსაც ოჯახში მამა მიუტანს ბავშვს. ახალ წელს ევროპის ძალიან ბევრ ქვეყანაში არის აკრძალული, მოქალაქეს კი არა, თვითონ პიროტექნიკოსებსაც ეშლებათ და სხვადასხვა დაზიანებას იღებენ. ჩვენთან კანონმდებლობით აკრძალულია ბავშვებისთვის მიყიდვა, მაგრამ როგორ მუშაობს კანონი, ეს მეორე საკითხია. მე ვარ მომხრე, რომ საერთოდ აიკრძალოს პიროტექნიკის გამოყენება. დაზიანებას რაც შეეხება, გააჩნია, როგორ დაზიანებას მიიღებენ, თუ ჭრილობა და სისხლდენაა, სხვანაირი დახმარება სჭირდება, დამწვრობას - სხვანაირი და ა.შ.

    ინტერვიუ სრულად წაიკითხეთ აქ...

    მამუკა ხაზარაძე, ბადრი ჯაფარიძე და ავთანდილ წერეთელი სასამართლომ დამნაშავედ სცნო, თუმცა მოსამართლემ მუხლის კვალიფიკაცია შეცვალა და სამივე მათგანი ჯგუფურ თაღლითობაში დამნაშავედ გამოაცხადა. თითოეულს თავისუფლების აღკვეთა შეეფარდა 7 წლის ვადით, თუმცა მუხლის ხანდაზმულობის გამო დანიშნული სასჯელისგან გათავისუფლდნენ.

    მოსამართლის გადაწყვეტილებით, მამუკა ხაზარაძესა და ბადრი ჯაფარიძეს წარდგენილი ბრალდება სისხლის სამართლის კოდექსის 194 მუხლის მე-2 ნაწილის ,,ა“ და მე-3 ნაწილის „გ“ ქვეპუნქტით, რაც ჯგუფურად 16 664 000 ამერიკული დოლარის უკანონო შემოსავლის ლეგალიზაციის გულისხმობდა, გადაუკვალიფიცირდათ სისხლის სამართლის კოდექსის 180-ე მუხლის მეორე ნაწილის „ა“ და მესამე ნაწილის „ბ“ ქვეპუნქტებით, რაც დიდი ოდენობით ჯგუფურ თაღლითობას გულისხმობს.

    რაც შეეხება ავთანდილ წერეთელს, მას ბრალი წარდგენილი ჰქონდა სისხლის სამართლის კოდექსის 25/194-ე მუხლის მეორე ნაწილის "ა" და მესამე ნაწილის "ბ" ქვე პუნქტით, რაც უკანონო შემოსავლების ლეგალიზებაში დახმარებას გულისხმობდა. მას მოსამართლის გადაწყვეტილებით ბრალი 25/180-ე მუხლის მეორე მუხლის მეორე ნაწილის „ა“ და მესამე ნაწილის „ბ“ ქვეპუნქტებით, რაც დიდი ოდენობით ჯგუფურ თაღლითობაში დახმარებას გულისხმობს.

    ამასთან, სასამართლოს გადაწყვეტილებით, ბრალდებულების მიმართ შეფარდებული გირაო გაუქმდა, ასევე გაუქმდა დადებული ყადაღებიც.

    „ჰოთნიუსი“ ე.წ. ფულის გათეთრების საქმის ბრალდებულების ადვოკატს, ზვიად კორძაძეს ესაუბრა, რომელმაც განმარტა, რომ ბრალდებულები გირაოს გარეშე გათავისუფლდნენ, მათ 2019 წელს დაკისრებული გირაოც კი გაუუქმდათ და ეს თანხა მათ უკან დაუბრუნდებათ. კორძაძის განმარტებით, ბრალდებულებს მოეხსნათ ნასამართლეობის სტატუსიც.

     

    რა გახდა მარსელში 25 წლის ალექსი გოგუას მკვლელობის მიზეზი - ცხედრის ჩამოსვენებას მშობლიურ სოფელში ახლობლები და ოჯახის წევრები ელოდებიან.

    25 წლის მამაკაცი ქალაქ მარსელში საცხოვრებელ სახლთან ახლოს, ქუჩაში მოკლეს. სახლში ახლა მოკლულის მამა და და ცხოვრობენ, ტრაგედიაზე საუბარი ჯერ არ სურთ და გადმოსვენების პროცედურების დასრულებას ელოდებიან. ოჯახის ახლობლებმა მკვლელობის შესახებ მოკლულის მეუღლისგან გაიგეს. იციან, რომ 25 წლის მამაკაცი ურთიერთშელაპარაკებისას უცხო ქვეყნის მოქალაქემ მოკლა. ალექსი გოგუა ახალი დაოჯახებული იყო და ის საფრანგეთში სამუშაოდ, ცოლთან ერთად, 5თვის წინ წავიდა.

    ურთიერთშელაპარაკების ნიადაგზე ჩადენილი დანაშაული - სწორედ ამ მიზეზს ასახელებენ ფრანგი სამართალდამცველები მკვლელობის ოფიციალურ მოტივად. დამატებითი დეტალები ჯერ არ გასაჯაროებულა.

    "კურიერის" ინფორმაციით კი, უცხო ქვეყნის მოქალაქე, ალექსი გოგუას მეუღლის მობილურს მოპარვას ცდილობდა, წინააღმდეგობის გაწევის დროს, ჯიბიდან დანა ამოიღო და მრავლობითი ჭრილობები მიაყენა. დაჭრილი ადგილობრივ საავადმყოფოში გადაიყვანეს , თუმცა მისი გადარჩენა ექიმებმა ვეღარ შეძლეს. მარსელში მომხდარი მკვლელობის შესახებ იციან ქალაქში მცხოვრებმა ქართველებმაც, "კურიერთან" ამბობენ, რომ პოლიციამ დამნაშავე მალევე დააკავა.

    გავრცელებული ინფორმაციით, საქმეზე სასამართლოც ჩატარდა და მკვლელი პატიმრობაში დატოვეს. 25 წლის ქართველს მარსელიდან ჩხოროწყუში სამ დღეში გადმოასვენებენ. პროცესში ჩართულია საქართველოს საგარეო საქმეთა სამინისტროს და ხარჯებს სახელმწიფო სრულად დაფარავს. 

     „ომიკრონმა” კიდევ ერთხელ დაგვანახა, რომ „მწვანე პასპორტის“ საფუძველი არის ცვლადი და უნდა დაექვემდებაროს გარკვეულ რევიზიას, – ამის შესახებ დღეს ჯანდაცვის მინისტრის მოადგილემ, თამარ გაბუნიამ განაცხადა. მისივე განმარტებით, ჯერჯერობით, შენარჩუნდება ის სტატუსი, რომელიც მთავრობას „მწვანე პასპორტებთან“ მიმართებაში აქვს.

    „მნიშვნელოვანია მისი არსებული კრიტერიუმების აღსრულება. ბევრმა ქვეყანამ „მწვანე პასპორტში“ გაითვალისწინა „ბუსტერ“ დოზის აუცილებლობა და იქ გადატანის სტატუსს ნაკლები პასუხისმგებლობა ეთმობა. ეს ყველაფერი არის მიმდინარე, რა თქმა უნდა, „მწვანე პასპორტს“, რომელიც დღეს გვაქვს, კარგი აღსრულების პირობებში მოსალოდნელი აქვს პოზიტიური ეფექტი, განვითარების და გაუმჯობესების შესაძლებლობა ყოველთვის არსებობს, ამდენად, მაინც დღეს მნიშვნელოვანია „მწვანე პასპორტის“ პირობების და რეგულაციების აღსრულება“, – განაცხადა გაბუნიამ. ჯანდაცვის მინისტრის მოადგილემ ბიზნესსექტორზეც ისაუბრა და თქვა, რომ ბიზნესისთვის სავალდებულო ტესტირების უფასოობის პროგრამა 1-ელ თებერვლამდე გახანგრძლივდა. გაბუნიას განცხადებით, იანვრის ბოლომდე ჯანდაცვის სამინისტრო სავალდებულო ტესტირების ჩასანაცვლებელ მოდელზე იმსჯელებს.

    Please publish modules in offcanvas position.